ဆော်ဒီတွင် ပါကစ္စတန်တပ်ဖွဲ့များ ထပ်ချရန် ပြင်ဆင်

ဖေဖော်ဝါရီ ၂၂၊ ၂၀၁၈
M-Media

– အင်အား တစ်ထောင်ကျော်လောက်ပါမယ့် တပ်ဖွဲ့တစ်ခုကို ဆော်ဒီမှာ ထပ်ချထားဖို့ ပါကစ္စတန်က ပြင်ဆင်နေပြီး ဒီကိစ္စနဲ့ပတ်သက်လို့ ပါကစ္စတန်အစိုးရက အသေးစိတ် ထုတ်ဖော်ပြောဆိုဖို့ ငြင်းဆိုထားပါတယ်။

ပါကစ္စတန်တပ်တွေ ဆော်ဒီမှာ ချထားမယ့်ကိစ္စနဲ့ပတ်သက်လို့ တနင်္လာနေ့က ပါကစ္စတန် ကာကွယ်ရေးဝန်ကြီး ခူရမ် ဒက်စ်ဂီရ်ခန်းဟာ လွှတ်တော်မှာ တင်ပြခဲ့ပြီး လေ့ကျင့်မှုနဲ့ အကြံပေးမှုတွေလုပ်ဖို့ ဖြစ်တယ်လို့ ပြောကြားခဲ့ပါတယ်။

ဒါပေမယ့် ဆော်ဒီဦးဆောင်တဲ့ မဟာမိတ်အဖွဲ့က ယီမင်မှာပြုလုပ်နေတဲ့ တိုက်ခိုက်မှုတွေမှာ ပါကစ္စတန်တပ်ဖွဲ့တွေ ပါဝင်လာနိုင်တယ်ဆိုတဲ့ စိုးရိမ်မှုတွေလည်း ရှိပါတယ်။ ပါကစ္စတန်အစိုးရနဲ့ စစ်တပ်ကတော့ ချထားမယ့် သူတို့တပ်ဖွဲ့တွေဟာ ဆော်ဒီနယ်နမိတ်အပြင်ဖက် ကိစ္စတွေမှာ ပါဝင်မှာမဟုတ်ဘူးလို့ ပြောကြားထားပါတယ်။

ပါကစ္စတန်လွှတ်တော်ဥက္ကဌ ရာဇာ ရဘ္ဘာနီက ပါကစ္စတန်တပ်ဖွဲ့တွေရဲ့ ဆော်ဒီမှာလုပ်ဆောင်မယ့် အခန်းကဏ္ဍကို အသေးစိတ် ဖော်ပြခဲ့ခြင်းမရှိတဲ့အတွက် ကာကွယ်ရေးဝန်ကြီးရဲ့ ဒီတင်ပြမှုကို ကျေနပ်မှုမရှိဘူးလို့ တုန့်ပြန် ပြောကြားခဲ့ပါတယ်။

လက်ရှိ ဆော်ဒီမှာ ပါကစ္စတန်တပ်ဖွဲ့ဝင် ၁၆၀၀ လောက် ရှိနေပြီး ၁၉၈၂ ခုနှစ်မှာ နှစ်ဖက် ချုပ်ဆိုထားတဲ့ စစ်ဖက် ပူးပေါင်းဆောင်ရွက်ရေး သဘောတူညီချက်ကြောင့် ဖြစ်ပါတယ်။

ဒီစာချုပ်မှာ ပါကစ္စတန်တပ်ဖွဲ့တွေဟာ ဆော်ဒီ တပ်ဖွဲ့တွေကို လေ့ကျင့်ပေးဖို့၊ ပြည်တွင်းလုံခြုံရေးကိစ္စတွေမှာ ကူညီပေးဖို့ ပါဝင်ပါတယ်။

၁၉၆၇ ခုနှစ်ကတည်းက ပါကစ္စတန်ဟာ ဆော်ဒီတပ်ဖွဲ့ဝင် ၈၂၀၀ ကျော်ကို လေ့ကျင့်ပေးခဲ့ပြီး ပူးတွဲ စစ်ရေးလေ့ကျင့်မှု တော်တော်များများကိုလည်း လုပ်ဆောင်ခဲ့ပါတယ်။

ယီမင်ပြည်တွင်းစစ်မှာ ပါဝင်ဖို့အတွက် ဆော်ဒီဟာ ၂၀၁၅ ခုနှစ်မှာ သူ့ရဲ့ မဟာမိတ်နိုင်ငံတွေကို တောင်းဆိုခဲ့ပေမယ့် ပါကစ္စတန်လွှတ်တော်က တိုင်းပြည်ရဲ့စစ်တပ်အနေနဲ့ ဒီကိစ္စမှာ မပါဝင်ဖို့နဲ့၊ ဆော်ဒီပိုင်နက်၊ မြင့်မြတ်ရာ နေရာတွေဖြစ်တဲ့ မက္ကာနဲ့ မဒီနာတို့ကို ကာကွယ်ရာမှာ အသုံးပြုဖို့ပဲ တပ်ဖွဲ့တွေ ချထားရမယ်ဆိုတဲ့ ဆုံးဖြတ်ချက်တစ်ခုကို အတည်ပြုခဲ့ပါတယ်။

Ref: Aljazeera