ဆီးရီးယားကိုပစ်မယ့် ဒုံးကျည်အတွက် အသင့်ပြင်ထားဖို့ ရုရှားကို ထရမ့်သတိပေး

ဧပြီ ၁၁၊ ၂၀၁၈
M-Media

– ဆီးရီးယားကို မိမိတို့က ဒုံးကျည်နဲ့ ပစ်ခတ်တိုက်ခိုက်မှုအတွက် ပြင်ဆင်ထားဖို့ အမေရိကန်သမ္မတ ဒေါ်နယ်ထရမ့်က ရုရှားကို ဒီကနေ့မနက်ပိုင်းမှာ Twitter ကနေတစ်ဆင့် ပြောကြားလိုက်ပါတယ်။

သူပုန်တွေထိန်းချုပ်ထားတဲ့ ဒေသကို ဆီးရီးယားအစိုးရတပ်က ပြီးခဲ့တဲ့ရက်ပိုင်းအတွင်း ဓာတုလက်နက်နဲ့ တိုက်ခိုက်ခဲ့တယ်ဆိုတဲ့ ကိစ္စအတွက် အမေရိကန်က လက်တုန့်ပြန်ဖို့ စီစဉ်နေတာပါ။

လက်ဘနွန်ဆိုင်ရာ ရုရှားသံအမတ်က အမေရိကန်အနေနဲ့ ဆီးရီးယားကို ဒုံးကျည်နဲ့ တိုက်ခိုက်မယ်ဆိုရင် သမ္မတပူတင်နဲ့ စစ်ဦးစီးအရာရှိချုပ်တို့ရဲ့ စကားအတိုင်း ဒီဒုံးကျည်တွေကို ပစ်ချသွားမှာဖြစ်သလို၊ ဒုံးကျည်တိုက်ခိုက်တဲ့နေရာကိုလည်း ချေမှုန်းသွားမယ်လို့ မနေ့က အင်တာဗျူးတစ်ခုမှာ ပြောကြားခဲ့ပါတယ်။

ထရမ့်ရဲ့ ဒီနေ့မနက် Twitter မှတ်ချက်မှာ ဆီးရီးယားသမ္မတ ဘာရှာ အလ်အာဆတ်ကို ရုရှားက ပံ့ပိုးမှုအတွက်လည်း ဝေဖန်ပြစ်တင်ခဲ့ပါတယ်။

“ဆီးရီးယားကိုပစ်တဲ့ ဘယ်လိုဒုံးကျည်ကိုမဆို ပစ်ချမယ်လို့ ရုရှားက သန္ဓိဌာန်ချထားတယ်။ အဲဒါဆိုရင် အဆင်သင့်သာလုပ်ထားလိုက်ပါ ရုရှားရေ။ ဒုံးကျည်တွေလာတော့မှာ၊ တော်တော်ကောင်းတဲ့ စမတ်ကျတဲ့ ဒုံးကျည်အသစ်တွေပေါ့။ ကိုယ့်ပြည်သူကိုသတ်ပြီး ပျော်နေတဲ့ ဓာတ်ငွေ့တိရစ္ဆာန်လိုကောင်နဲ့ မင်းတို့ မိတ်ဆွေမဖြစ်သင့်ဘူး”

မြို့တော်ဒမတ်စကတ် ဆင်ခြေဖုံး အရှေ့ဂူတာဒေသက သူပုန်တွေ ထိန်းချုပ်ထားတဲ့ ဒူးမားမြို့မှာ စနေနေ့က ဆီးရီးယားအစိုးတပ်ရဲ့ တိုက်ခိုက်မှုမှာ အမျိုးသမီးတွေနဲ့ ကလေးတွေအပါအ၀င် လူ ၇၀ ကျော်လောက် သေဆုံးခဲ့ပါတယ်။

အကူအညီပေးရေးအဖွဲ့တွေက အဲဒီတိုက်ခိုက်မှုမှာ ဓာတုလက်နက် အသုံးပြုခဲ့တယ်လို့ ပြောကြားခဲ့ပြီး အမေရိကန်နဲ့ အခြား ဥရောပနိုင်ငံ တော်တော်များများက ဒီကိစ္စအတွက် ဆီးရီးယားအစိုးရကို စစ်ရေးနဲ့ လက်တုန့်ပြန်ဖို့ အခုရက်ပိုင်းအတွင်းမှာ ပြောဆိုနေကြတာ ဖြစ်ပါတယ်။

ဆီးရီးယားအစိုးရနဲ့ ရုရှားတို့ကတော့ ဓာတုလက်နက်နဲ့ တိုက်ခိုက်တယ်ဆိုတဲ့သတင်းတွေကို ငြင်းဆိုထားပါတယ်။

Ref: Aljazeera