အိန္ဒိယနိုင်ငံခြားရေးဝန်ကြီး၏ ခရီးစဉ်အတွင်း မြန်မာနှင့် သဘောတူညီချက် ၇ ခု လက်မှတ်ထိုး

မေ ၁၁၊ ၂၀၁၈
M-Media

– အိန္ဒိယ နိုင်ငံခြားရေးဝန်ကြီး ဆူရှမာ ဆွာရက်ဂ်ျရဲ့ မြန်မာနိုင်ငံခရီးစဉ်အတွင်း နယ်စပ် အပြန်အလှန် ဖြတ်ကျော်သွားလာမှု၊ ပုဂံက စေတီပုထိုးတွေ ပြင်ဆင်မှုကိစ္စတွေ အပါအ၀င် သဘောတူညီချက် ၇ ခုကို လက်မှတ်ရေးထိုးနိုင်ခဲ့ပါတယ်။

ဝန်ကြီးဟာ ၂ ရက်တာခရီးစဉ်အဖြစ် မြန်မာနိုင်ငံကို မနေ့မှာ ရောက်ခဲ့တာဖြစ်ပြီး သမ္မတ ဦးဝင်းမြင့်၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်တို့နဲ့ တွေ့ဆုံခဲ့ပါတယ်။

အဲဒီလို တွေ့ဆုံမှုအတွင်း နှစ်နိုင်ငံ နယ်နမိတ်၊ နယ်စပ်ဒေသဆိုင်ရာ ကိစ္စရပ်တွေ၊ ငြိမ်းချမ်းရေးနဲ့ လုံခြုံရေးကိစ္စတွေ၊ ထွက်ပြေးသွားသူတွေ နေရပ်ပြန်နိုင်ရေး အပါအ၀င် ရခိုင်ပြည်နယ်က အခြေအနေတွေ၊ မြန်မာနိုင်ငံမှာ အိန္ဒိယရဲ့ အကူအညီပေးနေမှုတွေနဲ့ ဆောင်ရွက်နေတဲ့ စီမံကိန်းတွေ၊ နှစ်နိုင်ငံ အကျိုးစီးပွားဆိုင်ရာ ကိစ္စတွေ ဆွေးနွေးခဲ့တယ်လို့ တရားဝင်ထုတ်ပြန်တဲ့ ကြေငြာချက်မှာ ဖော်ပြထားပါတယ်။

လက်မှတ်ရေးထိုးခဲ့တဲ့ သဘောတူညီချက် ၇ ခုမှာ အရေးပါဆုံးက နှစ်နိုင်ငံ နယ်စပ်ဖြတ်ကျော်ရေးကိစ္စဖြစ်ပြီး ဒီသဘောတူညီချက်ကြောင့် နှစ်နိုင်ငံပြည်သူတွေဟာ နယ်စပ်ကနေ နိုင်ငံကူးလက်မှတ်၊ ဗီဇာတွေနဲ့ ၀င်ထွက်သွားလာနိုင်မှာ ဖြစ်ပါတယ်။

ပုဂံက ငလျင်ဒဏ်ကြောင့် ပျက်ဆီးသွားတဲ့ စေတီပုထိုးတွေကို ပြင်ဆင်ရာမှာ အကူအညီပေးနိုင်ရေးအတွက်လည်း အိန္ဒိယဟာ မြန်မာအစိုးရနဲ့ နားလည်မှုစာချွန်လွှာတစ်ခုကို လက်မှတ်ရေးထိုးခဲ့ပါတယ်။

မုံရွာမှာ စက်မှုလေ့ကျင်ရေးစင်တာ (ITC) တည်ဆောက်ရေးနဲ့ အရင်ကရှိခဲ့တဲ့ ITC တွေကို ကြီးကြပ်ထိန်းသိမ်းနိုင်မယ့် ကာလ တိုးမြှင့်ရေးကိစ္စတွေလည်း သဘောတူညီချက်ထဲမှာ ပါဝင်ပါတယ်။

အိန္ဒိယနိုင်ငံခြားရေးဝန်ကြီး ဆွာရက်ဂ်ျက ရခိုင်ပြည်နယ်နဲ့ ဆက်နွယ်နေတဲ့ ကိစ္စတွေမှာ မြန်မာအစိုးရကို ကူညီပေးဖို့ စိတ်ပိုင်းဖြတ်ထားမှု၊ အဆင်သင့်ရှိမှုတွေကို ထပ်လောင်းအသိပေးခဲ့ပါတယ်။ ရခိုင်ပြည်နယ်က အခြေအနေတွေနဲ့ပတ်သက်လို့ မြန်မာအစိုးရရဲ့ ဆောင်ရွက်မှုတွေကို ကြိုဆိုကြောင်းလည်း သူမက ပြောကြားခဲ့
ပါတယ်။

Ref: The Hindu