တောင်တရုတ်ပင်လယ်ကိစ္စ ၀င်မစွက်ရန် အမေရိကန်ကို တရုတ်သတိပေး

ဇွန် ၃၊ ၂၀၁၈
M-Media

တရုတ်စစ်သားများ

– အမေရိကန် ကာကွယ်ရေးဝန်ကြီး ဂျိမ်းစ် မာတစ်ဟာ တာဝန်မဲ့တဲ့စကားတွေ ပြောဆိုပြီး၊ မိမိတို့နိုင်ငံရဲ့ ပြည်တွင်းရေးကိစ္စကို ၀င်ရောက်စွက်ဖက်တယ်လို့ တရုတ်ဗိုလ်ချုပ်တစ်ဦးက ဝေဖန်ပြောဆိုလိုက်ပါတယ်။

စင်ကာပူနိုင်ငံမှာ ကျင်းပပြုလုပ်နေတဲ့ ရှန်ဂရီလာဆွေးနွေးပွဲမှာ မာတစ်က တောင်တရုတ်ပင်လယ် အငြင်းပွား ရေပိုင်နက်တွေမှာ တရုတ်က သြဇာလွှမ်းမိုးအောင် လုပ်ဆောင်မှုတွေကို ပြင်းပြင်းထန်ထန် ရင်ဆိုင်တုန့်ပြန်သွားမယ်လို့ သောကြာနေ့က ပြောကြားခဲ့တာပါ။

ဆွေးနွေးပွဲကို တက်ရောက်လာခဲ့တဲ့ တရုတ်စစ်တပ်က ဗိုလ်ချုပ် ဟီလေက မာတစ်ရဲ့ ဒီလို တာဝန်မဲ့တဲ့စကားတွေကို လက်သင့်မခံနိုင်ဘူးလို့ သူ့ရဲ့မိန့်ခွန်းမှာ ထည့်သွင်းပြောဆိုခဲ့ပါတယ်။

“ဒီကိစ္စနဲ့ပတ်သက်ပြီး တစ်ခြားနိုင်ငံတွေက အသံထွက်ဖို့ ကြိုးစားမှုဟာ ကျွန်တော်တို့ရဲ့ ပြည်တွင်းရေးကိစ္စကို ၀င်ရောက်စွက်ဖက်မှုလို့ပဲ ကျွန်တော်တို့ ရှုမြင်ပါတယ်”

မာတစ်က တောင်တရုတ်ပင်လယ်မှာ တရုတ်နိုင်ငံရဲ့ ပေါ်လစီဟာ သူတို့ရဲ့ ပွင့်လင်းတဲ့ မဟာဗျူဟာ ကတိကတ်ဝတွေနဲ့ ဆန့်ကျင်နေပြီး၊ ခြိမ်းခြောက်တာ အကြပ်ကိုင်တာမျိုးတွေကိုလည်း တရုတ်က လုပ်နေကြောင်း၊ ဒါ့ကြောင့် ဒီလိုလုပ်ရပ်တွေဟာ မေးခွန်းထုတ်စရာ ဖြစ်နေကြောင်း စွပ်စွဲ ပြောကြားခဲ့ပါတယ်။

ဗိုလ်ချုပ် ဟီလေကတော့ အငြင်းပွားနေတဲ့ ကျွန်းတွေအားလုံးဟာ သူတို့အပိုင်သာဖြစ်ပြီး သမိုင်းနဲ့ချီ သက်သေပြလို့ရကြောင်း ထည့်သွင်း ပြောဆိုခဲ့ပါတယ်။

“စစ်သားတွေ တပ်စွဲထားတာ၊ လက်နက်တွေ ချထားတာတွေနဲ့ပတ်သက်လို့ ဘာမှ ငြင်းစရာမလိုပါဘူး။ ဒါဟာ တရုတ်ရဲ့ အချုပ်အခြာပိုင်စိုးမှု ပြယုဂ်တစ်ခု ဖြစ်ပါတယ်”

အမေရိကန်ဟာ လွတ်လပ်စွာ ရေကြောင်းသွားလာခွင့်ကို အသုံးချပြီး တောင်တရုတ်ပင်လယ်မှာ စစ်ရေးပြင်ဆင်မှုတွေ လုပ်နေတယ်လို့လည်း ဗိုလ်ချုပ်ဟီလေက တန်ပြန်စွပ်စွဲခဲ့ပါတယ်။

Ref: RT