ယူအေအီးနှင့် တရုတ်တို့ စီးပွားရေးသဘောတူညီချက် ၁၃ ခု လက်မှတ်ထိုး

ဇူလိုင် ၂၁၊ ၂၀၁၈
M-Media

ယူအေအီးသို့ ရောက်ရှိလာသည့် တရုတ်သမ္မတ ဂုဏ်ပြုတပ်ဖွဲ့ကို စစ်ဆေးနေစဉ်

– နှစ်နိုင်ငံ ကုန်သွယ်မှုနဲ့ ပူးပေါင်းဆောင်ရွက်မှုတွေ တိုးမြှင့်ဖို့အတွက် ယူအေအီးနဲ့ တရုတ်တို့ဟာ သဘောတူညီချက် ၁၃ ခုကို လက်မှတ်ရေထိုးခဲ့ပါတယ်။

သဘောတူညီချက်တွေမှာ နှစ်နိုင်ငံ သံရုံးတွေ၊ ယဉ်ကျေးမှုစင်တာတွေ ဆောက်လုပ်ရေး၊ စွမ်းအင်၊ စိုက်ပျိုးရေးနဲ့ အီလက်ထရောနစ် ကုန်သွယ်ရေးလုပ်ငန်းတွေမှာ ပူးပေါင်းဆောင်ရွက်ရေး၊ စိုက်ပျိုးရေးနဲ့ မွေးမြူရေးလုပ်ငန်းတွေက ထွက်ကုန်တွေကို ရောင်းချနိုင်မယ့် လက်ကားဈေးကွက်တစ်ခု ဖွင့်လှစ်ရေး၊ ကမ္ဘာ့အကြီးဆုံး နေစွမ်းအင်သုံး စီမံကိန်းတစ်ခုကို ပူးပေါင်းရင်းနှီးမြှုပ်နှံရေးတွေ ပါဝင်ပါတယ်။

တရုတ်သမ္မတ ရှီကျင့်ဖျင် ယူအေအီးနိုင်ငံကို ၃ ရက်တာ လာရောက်မှုအတွင်း ဒီ သဘောတူညီချက်တွေကို လက်မှတ်ရေးထိုးခဲ့တာ ဖြစ်ပါတယ်။ ရှီကျင့်ဖျင်ဟာ ၂၉ နှစ်အတွင်း ယူအေအီးနိုင်ငံကို လာရောက်တဲ့ ပထမဆုံး တရုတ်သမ္မတလည်း ဖြစ်ပါတယ်။

ရှီဟာ အဘူဒါဘီ အိမ်ရှေ့မင်းသား မိုဟာမက် ဘင် ဇာယဒ်၊ ယူအေအီး ဒုတိယသမ္မတ ရှိခ် မိုဟာမက် ဘင် ရာရှစ်တို့နဲ့ တွေ့ဆုံခဲ့ပါတယ်။

တရုတ်နိုင်ငံဟာ ယူအေအီးရဲ့ ဒုတိယအကြီးဆုံး ကုန်သွယ်ဖက်နိုင်ငံဖြစ်ပြီး အရှေ့အလယ်ပိုင်းကို တရုတ်ရဲ့ တင်ပို့မှု ၆၀ ရာခိုင်နှုန်းလောက်ဟာ ယူအေအီးကနေတစ်ဆင့် ၀င်ရောက်တာဖြစ်ပါတယ်။ တရုတ်ရဲ့ အာရပ်ကမ္ဘာ ကုန်သွယ်ရေးမှာ ယူအေအီးက ၂၅ ရာခိုင်နှုန်း ရယူထားပါတယ်။

၂၀၁၇ ခုနှစ်အတွင်း ယူအေအီးကို လာရောက်လည်ပတ်တဲ့ တရုတ်နိုင်ငံသား အရေအတွက်ဟာ ၁ သန်းကျော် ရှိခဲ့ပြီး၊ နှစ်နိုင်ငံ ကုန်သွယ်ရေးတန်ဖိုးက ကန်ဒေါ်လာ ၅၄.၅ ဘီလီယံ ရှိပါတယ်။ ရှိခ် မိုဟာမက် ဘင် ရာရှစ်က ဒီပမာဏကို နှစ်ဆတိုးဖို့ ရည်ရွယ်ထားတယ်လို့ ကြာသာပတေးနေ့က Twitter စာမျက်နှာမှာ ရေးသားခဲ့ပါတယ်။

ယူအေအီးနဲ့ တရုတ်တို့ဟာ ရေနံကုမ္ပဏီတွေ ပူးပေါင်းဆောင်ရွက်ရေး သဘောတူညီချက်တစ်ခုကိုလည်း ရရှိခဲ့ပြီး ဒူဘိုင်းအခြေစိုက် ဆောက်လုပ်ရေးလုပ်ငန်း Emaar က သူတို့အနေနဲ့ အရှေ့အလယ်ပိုင်းမှာ အကြီးဆုံးဖြစ်လာမယ့် တရုတ်တန်းကို ယူအေအီးမှာ ဖော်ဆောင်သွားမယ်လို့ ကြေငြာခဲ့ပါတယ်။

ကြာသာပတေးနေ့က ယူအေအီးကို ရောက်ရှိနေတဲ့ တရုတ်သမ္မတ ရှီကျင့်ဖျင်ဟာ အဲဒီကနေတစ်ဆင့် ဆီနီဂေါ၊ ရ၀မ်ဒါနဲ့ တောင်အာဖရိကတို့ကို သွားရောက်မှာ ဖြစ်ပါတယ်။

Ref: Abrab News