ဆီးရီးယားရှိ ကာ့ဒ်လက်နက်ကိုင်အဖွဲ့က အစိုးရနှင့် ဖက်ဒရယ်ကိစ္စ ဆွေးနွေးမည်

ဇူလိုင် ၂၈၊ ၂၀၁၈
M-Media

ကာ့ဒ်တပ်ဖွဲ့ဝင်တစ်ဦး

– ဆီးရီးယားနိုင်ငံမှာ အမေရိကန် ကျောထောက်နောက်ခံပြုထားတဲ့ ကာ့ဒ်တပ်ဖွဲ့ SDF က ဒီမိုကရေစီနည်းကျပြီး ဗဟိုချုပ်ကိုင်မှုကင်းတဲ့ ဆီးရီးယားနိုင်ငံ ဖြစ်လာရေး အစိုးရနဲ့ ပူးပေါင်းဆောင်ရွက်ဖို့ သဘောတူထားတယ်လို့ ပြောကြားလိုက်ပါတယ်။

SDF ရဲ့ နိုင်ငံရေးအဖွဲ့ဖြစ်တဲ့ SDC က မနေ့မှာ ကြေငြာချက်တစ်ခု ထုတ်ပြန်ခဲ့ပြီး အာဆတ်အစိုးရနဲ့ ဆွေးနွေးဖို့အတွက် ကော်မတီတွေ ဖွဲ့စည်းသွားမယ်လို့ ဖော်ပြခဲ့ပါတယ်။

ဆီးရီးယားပြည်တွင်းစစ် ဖြစ်ပွားခဲ့ပြီးနောက် ၂၀၁၅ ခုနှစ်မှာ ဖွဲ့စည်းခဲ့တဲ့ SDF ဟာ နိုင်ငံနယ်မြေရဲ့ ၂၅ ရာခိုင်နှုန်းကနေ ၃၀ ရာခိုင်နှုန်းအထိ ထိန်းချုပ်ထားပြီး၊ ဆီးရီးယားနိုင်ငံ ဖက်ဒရယ်စနစ်ဖြစ်လာရေး တောင်းဆိုထားတဲ့အဖွဲ့ ဖြစ်ပါတယ်။

သူတို့ထိန်းချုပ်ထားတဲ့ နိုင်ငံမြောက်ပိုင်းမှာလည်း ကာ့ဒ်လူမျိုးတွေ အများစုရှိတဲ့ နေရာတွေအပါအ၀င် ဒေသတစ်ခုချင်းစီတိုင်းမှာ ကိုယ်ပိုင်အခွန်ကောက်ခံ၊ သုံးစွဲမှုစနစ်၊ ကိုယ်ပိုင်ရဲတပ်ဖွဲ့နဲ့ ကိုယ်ပိုင်အစိုးရစနစ်တွေကို ဖော်ဆောင်ပေးထားပါတယ်။

SDC အဖွဲရဲ့ ပူးတွဲဥက္ကဌဖြစ်တဲ့ ရီအဒ် ဒါရာက ဆီးရီးယားအစိုးရနဲ့ ဆွေးနွေးမယ့်ကိစ္စဟာ ဆီးရီးယားနိုင်ငံမြောက်ပိုင်းကိစ္စ ပြေလည်ရေးအတွက်ဖြစ်ပြီး ကိုယ့်ပြဿနာကို ကိုယ်တိုင်ဖြေရှင်းဖို့ အချိန်ဖြစ်တယ်လို့ သောကြာနေ့မှာ ပြောကြားခဲ့ပါတယ်။

Ref: Aljazeera