ဟဂ်ျပြုရန်သွားမည့် တရုတ်မွတ်စလင်များကို တရုတ်အစိုးရက ဘက်စုံသုံး GPS ကိရိယာ ထောက်ပံ့

သြဂုတ် ၁၊ ၂၀၁၈
M-Media

– ယခုနှစ် ဟဂ်ျရာသီမှာ ဆော်ဒီကို ဘုရားဖူးသွားရောက်ကြမယ့် တရုတ်မွတ်စလင်တွေ အဆင်ပြေလွယ်ကူ ချောမွေ့စေရေးအတွက် တရုတ်အစိုးရနဲ့ ‘တရုတ်အစ္စလာမ်အသင်း’ တို့ပူးပေါင်းကာ ဘက်စုံသုံး GPS ကိရိယာတွေ ထောက်ပံ့ပေးမယ်လို့ သိရပါတယ်။

အလွယ်တကူသယ်သွားလို့ရပြီး၊ လက်ကိုင်ဖုန်းအရွယ်လောက်သာရှိတဲ့ အဲဒီ ကိရိယာကို တရုတ်အစိုးရရဲ့ အစီအစဉ်နဲ့ ဟဂ်ျပြုဖို့သွားတဲ့ လူပေါင်း ၁၁,၀၀၀ ကျော်က အချို့သူတွေ ကိုင်ဆောင်ရမှာ ဖြစ်ပါတယ်။

ကိရိယာမှာ ကိုင်ဆောင်သူရဲ့ အမည်၊ ဓာတ်ပုံ၊ နိုင်ငံကူးလက်မှတ်နံပါတ်နဲ့ အခြား အချက်အလက်တွေကို တရုတ်၊ အင်္ဂလိပ် နှစ်ဘာသာနဲ့ ရေးသားထားပြီး WeChat အခြေပြု အက်ပလီကေးရှင်းနဲ့ ချိတ်ဆက်ထားတဲ့ QR code ကိုလည်း နောက်ကျောမှာ ထည့်သွင်းပေးထားပါတယ်။

WeChat က အဲဒီအက်ပလီကေးရှင်းကို ‘တရုတ်အစ္စလာမ်အသင်း’ က စီမံပြီး ဟဂ်ျကျင့်စဉ်ဆိုင်ရာ သိမှတ်ဖွယ်ရာတွေ၊ အရေးပေါ်ဆက်သွယ်ရမယ့် ဖုန်းနံပါတ်တွေနဲ့ အခြားသိမှတ်ဖွယ်ရာတွေကို တင်ပေးမှာ ဖြစ်ပါတယ်။

GPS ကိရိယာမှာ အရေးပေါ် SOS ခလုပ်တစ်ခုကိုလည်း ထည့်သွင်းပေးထားပြီး နှိပ်လိုက်မယ်ဆိုရင် ရောက်ရှိနေတဲ့နေရာနဲ့ သတိပေးချက်ကို တရုတ်အစ္စလာမ်အသင်းဆီ ပေးပို့ပေးမှာ ဖြစ်ပါတယ်။

အသင်းရဲ့ တာဝန်ရှိသူ အမျိုးသမီးက ဒီကိရိယာဟာ တရုတ်မွတ်စလင်ရဲ့ တည်နေရာနဲ့ အခြေအနေတွေကို အစိုးရတာဝန်ရှိသူတွေက အချိန်နဲ့တစ်ပြေးညီ သိရှိနိုင်မှာဖြစ်ပြီး ရက်ပေါင်း ၄၀ ကြာမြင့် ဟဂ်ျကျင့်စဉ်အတွင်း ဘုရားဖူးတွေ အဆင်ပြေလွယ်ကူစေလိမ့်မယ်လို့ ပြောကြားခဲ့ပါတယ်။

ဒီကိရိယာကို ရှေ့ပြေးစမ်းသပ်မှုအဖြစ် ဟဂ်ျဘုရားဖူးသွားရောက်မယ့် တရုတ်မွတ်စလင် ၃၃၀၀ ကို ပေးအပ်သွားမှာဖြစ်ပြီး ရလဒ်ကိုကြည့်ကာ နောက်ပိုင်းမှာ အကုန်လုံးအတွက် စီစဉ်ပေးသွားမှာ ဖြစ်ပါတယ်။

အခုနှစ် ဟဂ်ျရာသီမှာ တရုတ်မွတ်စလင် တစ်သောင်းကျော်လောက် သွားရောက်ဖို့ရှိပြီး တနင်္ဂနွေနေ့မှာ လူ ၅၀၀ ဟာ ပထမဆုံးအဖြစ် ဆော်ဒီအာရေဗျကို သွားရောက်ခဲ့ကြပါတယ်။

Ref: Asia Times