သောကြာနေ့မနက် နိုင်ငံတကာသတင်းများ

သြဂုတ် ၂၄၊ ၂၀၁၈
M-Media

ပျောက်ဆုံးရေဒီယိုသတ္ထုကြွပစ္စည်း ရှာဖွေရေး မလေးရှားက အထူးအဖွဲ့ဖွဲ့
=============
အခုလအစောပိုင်းက မြို့တော် ကွာလာလမ်ပူ ဆင်ခြေဖုံးမှာ ပျောက်ဆုံးသွားတဲ့ ရေဒီယိုသတ္တုကြွပစ္စည်းပါ ကိရိယာတစ်ခုကို ရှာဖွေရေး အထူးအဖွဲ့တစ်ခုကို မလေးရှားက မနေ့မှာ ဖွဲ့စည်းလိုက်ပါတယ်။ အဲဒီကိရိယာကို စစ်သွေးကြွတွေ ရရှိကာ ဗုံးပြုလုပ်မှာကို စိုးရိမ်မှုတွေ ရှိနေပြီး ဆီလန်ဂေါပြည်နယ် ရဲတပ်ဖွဲ့အကြီးအကဲ မဇ်လန် မန်ဆူရ်က လက်ရှိအချိန်အထိ ဒီကိရိယာ ဘယ်ရောက်နေလဲဆိုတာ မသိရသေးဘူးလို့ ဆိုပါတယ်။ ဒါပေမယ့် အကြမ်းဖက်သမားတွေရဲ့လက်ထဲ ရောက်သွားတဲ့ လက္ခဏာမျိုး မရှိသေးဘူးလို့လည်း မလေးရှားရဲတပ်ဖွဲ့က ထုတ်ပြန်ထားပါတယ်။

တရုတ်-အမေရိကန် ကုန်သွယ်ရေးဆွေးနွေးပွဲ အဖြေမထွက်
================
ကုန်သွယ်ရေးဆိုင်ရာ တင်းမာနေမှုကို လျှော့ဖို့အတွက် အမေရိကန်နဲ့ တရုတ်တာဝန်ရှိသူတွေရဲ့ ၂ ရက်တာအစည်းအဝေးဟာ မနေ့မှာ ပြီးဆုံးခဲ့ပေမယ့် ဒီပြဿနာဖြေရှင်းနိုင်မယ့် သဘောတူညီချက်မျိုးတော့ မရခဲ့ပါဘူး။ အမေရိကန်နဲ့ တရုတ်တို့ဟာ ကန်ဒေါ်လာ ဘီလီယံ ၅၀ ဖိုးရှိတဲ့ ကုန်စည်တွေအတွက် အပြန်အလှန် အခွန်တိုးမြှင့်မှုတွေ ပြုလုပ်ထားပါတယ်။ အခုဆွေးနွေးပွဲမှာ ကုန်သွယ်ရေးဆိုင်ရာ မျှတမှု၊ အမေရိကန်ရဲ့ ဉာဏထုတ်ကုန်တွေကိစ္စ၊ နည်းပညာလွှဲပြောင်းပေးရေး ပေါ်လစီတွေအကြောင်း ဆွေးနွေးခဲ့ကြပါတယ်။

ဂျပန်နိုင်ငံတွင် တိုင်ဖုန်းမုန်တိုင်းတစ်ခု ၀င်ရောက်နေ
================
ပြီးခဲ့တဲ့လက ရေကြီးမှုဒဏ်ကို ဆိုးဆိုးရွားရွား ခံစားခဲ့ရတဲ့ ဂျပန်နိုင်ငံ အနောက်ပိုင်းမှာ မနေ့ကစတင်ကာ ဆီမာရွန်လို့ အမည်ရတဲ့ တိုင်ဖုန်းမုန်တိုင်းတစ်ခု ၀င်ရောက်နေတာကြောင့် လေယာဉ်ခရီးစဉ်တွေ၊ ရထားလိုင်းတွေ ရပ်ထားရပြီး ဓာတ်အားပြတ်တောက်မှုတစ်ချို့လည်း ရှိနေပါတယ်။ ဒီကနေ့မနက်အထိ အသေအပျောက်မရှိသေးဘဲ ထိခိုက်ဒဏ်ရာရမှုတစ်ချို့ ပျက်ဆီးမှုတစ်ချို့ ရှိနေပါတယ်။ အာဏာပိုင်တွေက ရေကြီးမှု၊ မြေပြိုမှု၊ လှိုင်းကြီးမှုတွေ ရှိနိုင်တယ်လို့ သတိပေးထားပါတယ်။ မုန်တိုင်းဟာ ဒီကနေ့နှောင်းပိုင်းမှာ ကုန်းတွင်းပိုင်းကို ၀င်ရောက်ဖို့ ရှိနေပါတယ်။

Ref: CNA