စီးပွားရေးဆိုင်ရာ နိုဘယ်ဆုကို အမေရိကန်နှစ်ဦး ရရှိ

အောက်တိုဘာ ၉၊ ၂၀၁၈
M-Media

– ၂၀၁၈ ခုနှစ်အတွက် စီးပွားရေးးဆိုင်ရာ နိုဘယ်ဆုအတွက် အမေရိကန် စီးပွားရေးပညာရှင်နှစ်ဦးဖြစ်တဲ့ ၀ီလီယံ နော့ဒ်ဟက်စ်နဲ့ ပေါလ် ရိုမာတို့ကို ရွေးချယ်လိုက်ပြီး စီးပွားရေးကဏ္ဍမှာ နည်းလမ်းအသစ်တွေ၊ တိုးတက်မှုအသစ်တွေ ရရှိအောင် လုပ်ဆောင်နိုင်တဲ့အတွက်ကြောင့် ဖြစ်တယ်လို့ နိုဘယ်ဆုရွေးချယ်ရေးအဖွဲ့က ပြောကြားခဲ့ပါတယ်။

နော့ဒ်ဟက်စ်ဟာ ယေးလ်တက္ကသိုလ်က ပါမောက္ခတစ်ဦးဖြစ်ပြီး၊ လက်ရှိ နယူးယောက်တက္ကသိုလ်ရဲ့ Stern စီးပွားရေးကောလိပ်မှာ တာဝန်ထမ်းဆောင်နေတဲ့ ရိုမာဟာ ကမ္ဘာ့ဘဏ်ရဲ့ စီးပွားရေးဆိုင်ရာ အကြီးအကဲဟောင်း ဖြစ်ပါတယ်။

နိုဘယ်ဆုရွေးချယ်ရေးအဖွဲ့က သူတို့နှစ်ဦးဟာ “စီးပွားရေး ရေရှည်ဖွံ့ဖြိုးတိုးတက်အောင် ဘယ်လို ဆောင်ရွက်ရမလဲဆိုတဲ့ ယနေ့ခေတ် အခြေခံအကျဆုံး၊ ဖိအားအများဆုံး ပြဿနာကို” ဖြေရှင်းပေးခဲ့တယ်လို့ မနေ့ကထုတ်ပြန်တဲ့ ကြေငြာချက်မှာ ဖော်ပြခဲ့ပါတယ်။

အသက် ၇၇ နှစ်အရွယ် နော့ဒ်ဟက်စ်ဟာ “ရေရှည်စီးပွားရေး သုံးသပ်မှုမှာ ရာသီဥတုပြောင်းလဲမှုကို ထည့်သွင်းခဲ့တဲ့အတွက်” နိုဘယ်ဆုကို ချီးမြှင့်ခံရတာဖြစ်ပြီး၊ အသက် ၆၂ နှစ်အရွယ် ရိုမာက ” စီးပွားရေးဆိုင်ရာ ဆန်းစစ်မှုမှာ နည်းပညာ ဆန်းသစ်မှုတွေကို ထည့်သွင်းခဲ့တဲ့အတွက်” ချီးမြှင့်ခံရတာ ဖြစ်ပါတယ်။

ပြီးခဲ့တဲ့နှစ် စီးပွားရေးဆိုင်ရာ နိုဘယ်ဆုကိုလည်း အမေရိကန် စီးပွားရေးပညာရှင် ရစ်ချက်သာလာက ရရှိခဲ့ပါတယ်။

Ref: Aljazeera