နှစ် ၃၀ အရင်က မွတ်စလင်များအား အစုလိုက်သတ်ခဲ့သည့် ရဲ ၁၆ ဦးကို အိန္ဒိယက တစ်သက်တစ်ကျွန်းချ

အောက်တိုဘာ ၃၁၊ ၂၀၁၈
M-Media

အရပ်သားများအား အိန္ဒိယစစ်သားများက သေနတ်ချိန်ထားစဉ်

– ၁၉၈၇ ခုနှစ်က အူတာပရာဒက်ရ်ှပြည်နယ် ရွာတစ်ရွာမှာ မွတ်စလင်အမျိုးသား ၄၂ ဦးကို သတ်ဖြတ်ခဲ့မှုအတွက် အငြိမ်းစား ပြည်နယ်ရဲအရာရှိ ၁၆ ဦးကို အိန္ဒိယ တရားရုံးတစ်ခုက ဒီကနေ့မှာ ထောင်ဒဏ်တစ်သက် ချမှတ်လိုက်ပါတယ်။

အောက်ရုံးက တရားသေလွှတ်ပေးလိုက်တဲ့ ဆုံးဖြတ်ချက်ကို ဒီကနေ့ ဒေလီဟိုက်ကုတ်ရုံးက ပယ်ချကာ လူသတ်မှု၊ ပြန်ပေးဆွဲမှု၊ ကြံရာပါမှု၊ သက်သေအထောက်အထား ဖျောက်ဖျက်မှုတွေနဲ့ အခုလို ပြစ်ဒဏ်ပေးလိုက်တာ ဖြစ်ပါတယ်။

လက်နက်မဲ့ မွတ်စလင်တွေကို ဒီလို အစုလိုက်အပြုံလိုက် သတ်ဖြတ်မှုဟာ ‘ကြိုတင်ကြံစည် သတ်ဖြတ်မှု’ ဖြစ်တယ်လို့ တရားသူကြီးတွေက ပြောကြားခဲ့ပါတယ်။

“ဒီအဖြစ်အပျက်ဟာ ဖမ်းဆီးထားစဉ် သတ်ဖြတ်မှုတွေရဲ့ ဥပမာတစ်ခုဖြစ်ပြီး ဒီလို အခွင့်အရေး ချိုးဖောက်သူတွေကို တရားရေးစနစ်က ထိထိရောက်ရောက် အရေးမယူနိုင်ခဲ့ပါဘူး။ လက်ရှိအမှုရဲ့ စက်ဆုပ်စရာ အချက်တစ်ခုက လူနည်းစု လူ့အဖွဲ့အစည်းက လူတွေကို ပစ်မှတ်ထား သတ်ဖြတ်မှု ဖြစ်ပါတယ်” လို့ တရားရုံးရဲ့ ကြေငြာချက်မှာ ဖော်ပြထားပါတယ်။

အူတာပရာဒက်ရ်ှပြည်နယ် မီရွတ်ခရိုင်မှာ လူမျိုးရေးအဓိကရုဏ်း ဖြစ်ပွားမှု နောက်ဆက်တွဲအဖြစ် ၁၉၈၇ ခုနှစ် မေလ ၂၂ ရက်နေ့ညမှာ ရဲတပ်ဖွဲ့က ဟာရှင်မ်ပူရွာကို ၀င်စီးကာ မွတ်စလင်အမျိုးသားတွေကို ဖမ်းဆီးပစ်သတ်ခဲ့တာ ဖြစ်ပါတယ်။ အလောင်းအများစုကို အနားက ချောင်းတစ်ခုမှာ ပစ်ချခဲ့ပါတယ်။

ဒေလီဟိုက်ကုတ်ရုံးက အမျိုးသား လူ့အခွင့်အရေး ကော်မရှင်ရဲ့ လျှောက်ထားချက်၊ မျက်မြင်သက်သေရဲ့ ထွက်ဆိုချက်တွေ၊ အောက်ရုံးက တရားသေလွှတ်ပေးမှု အမိန့်နဲ့ အခြား သက်ဆိုင်တဲ့ စာရွက်စာတမ်းတွေကို ပြန်လည်သုံးသပ်ကာ အခုလို တစ်သက်တစ်ကျွန်းပြစ်ဒဏ် ချမှတ်ခဲ့တာ ဖြစ်ပါတယ်။

Ref: Aljazeera