ဂျာနယ်လစ်ကာရှိုဂျီ အသတ်ခံရမှု ဆော်ဒီအစိုးရလက်ချက်ဟို ကုလပြော

ဖေဖော်ဝါရီ ၈၊ ၂၀၁၉
M-Media

– ၀ါရှင်တန်ပို့စ်က ဂျာနယ်လစ် ကာရှိုဂျီသေဆုံးမှုကို စုံစမ်းစစ်ဆေးရာမှာ ဆော်ဒီအစိုးရအာဏာပိုင်တွေက ကြိုတင်စီစဉ် သတ်ဖြတ်တယ်ဆိုတာကို တွေ့ခဲ့ရကြောင်း ကုလသမ္မဂ လူ့အခွင့်အရေးဆိုင်ရာ အထူးကိုယ်စားလှယ် အဂ်နက်စ် ကာလာမဒ်က ပြောကြားလိုက်ပါတယ်။

မနေ့က သတင်းစာရှင်းလင်းပွဲမှာ ကာလာမဒ်က သူမနဲ့အဖွဲ့ဟာ တူရကီထောက်လှမ်းရေးထံကနေ ကာရှိုဂျီ အသတ်ခံရမှုကို ဖမ်းယူထားတဲ့ ‘ရက်စက်ကြောက်မယ်ဖွယ်’ အသံမှတ်တမ်း တစ်စိတ်တစ်ပိုင်းကို နားထောင်ခဲ့ရတယ်လို့ ပြောကြားခဲ့ပါတယ်။

ဒီကိစ္စကို စုံစမ်းဖော်ထုတ်ဖို့ တူရကီရဲ့ ကြိုးပမ်းအားထုတ်မှုတွေကို ဆော်ဒီအာရေဗျက ဖျက်လိုဖျက်ဆီး လုပ်တယ်လို့လည်း သူမက ထည့်သွင်းပြောဆိုခဲ့ပါတယ်။

ကုလက ပညာရှင် ၄ ဦးပါဝင်တဲ့အဖွဲ့ဟာ တူရကီကိုသွားရောက်ကာ တစ်ပတ်ကြာ စုံစမ်းစစ်ဆေးမှု ပြုလုပ်ခဲ့တာပါ။

ကာလာမဒ်က သူတို့အဖွဲ့ဟာ ဆော်ဒီကို ၀င်ရောက်ခွင့်ရရေး တောင်းဆိုခဲ့တယ်လို့ ပြောကြားခဲ့ပြီး ကာရှိုဂျီအသတ်ခံရမှုအတွက် ဆော်ဒီအစိုးရက ဖမ်းဆီးထားတဲ့ လူ ၁၁ ဦး တရားရင်ဆိုင်မှုမှာ မျှတမှုမရှိမှာကို စိုးရိမ်တယ်လို့ ဆိုပါတယ်။

သူမဟာ အဖွဲ့ရဲ့ တွေ့ရှိချက် နောက်ဆုံး အစီရင်ခံစာကို ဇွန်လမှာပြုလုပ်မယ့် ကုလ လူ့အခွင့်အရေးကောင်စီ အစည်းအဝေးမှာ တင်ပြဖို့ ရှိနေပါတယ်။

ဆော်ဒီအစိုးရနဲ့ တော်ဝင်မိသားစုကို ဝေဖန်ရေးသားလေ့ရှိတဲ့ ဂျာနယ်လစ် ဂျမားလ်ကာရှိုဂျီဟာ ပြီးခဲ့တဲ့နှစ် အောက်တိုဘာ ၂ ရက်နေ့က အစ္စတန်ဘူလ်မှာရှိတဲ့ ဆော်ဒီကောင်စစ်ဝန်ရုံးထဲ ၀င်သွားပြီးတဲ့နောက် အသတ်ခံလိုက်ရတာ ဖြစ်ပါတယ်။

အစပိုင်းမှာ ဆော်ဒီအစိုးရက ကာရှိုဂျီ အသတ်ခံရမှုကို ငြင်းဆိုခဲ့ပေမယ့် နောက်ပိုင်းမှာ ၀န်ခံခဲ့ပြီး ၀န်ထမ်းတွေနဲ့ စကားများ ထိုးကြိတ်ရာကနေ သေဆုံးသွားတာဖြစ်တယ်လို့ ထုတ်ပြန်ခဲ့ပါတယ်။ တူရကီက ဒီသတ်ဖြတ်မှုမှာ ဆော်ဒီအစိုးရ ထိပ်ပိုင်းအရာရှိတွေ ပါဝင်နေတယ်လို့ ပြောကြားခဲ့ပြီး အမေရိကန်ထောက်လှမ်းရေးက
အိမ်ရှေ့မင်းသား မိုဟာမက် ဘင် ဆလ်မန်ကိုယ်တိုင် သတ်ဖြတ်ဖို့ အမိန့်ပေးခဲ့တာလို့ ယုံကြည်နေပါတယ်။

ဆော်ဒီအစိုးရက ဒီသတ်ဖြတ်မှုအတွက် ထောက်လှမ်းရေးအကြီးအကဲဟောင်းအပါအ၀င် လူ ၁၁ ဦးကို ဖမ်းဆီးကာ တရားစွဲဆိုထားတယ်လို့ နောက်ပိုင်းမှာ ထုတ်ပြန်ခဲ့ပါတယ်။

Ref: Aljazeera