တရားမ၀င် နိုင်ငံခြားငါးဖမ်းသင်္ဘောများကို နှစ်မြှုပ်ပစ်မည်ဟု အင်ဒိုကြေငြာ

မေ ၅၊ ၂၀၁၉
M-Media

-မိမိတို့ရေပိုင်နက်မှာရှိနေတဲ့ တရားမ၀င် ငါးဖမ်းသင်္ဘောတွေကို နှစ်မြှုပ်သွားတော့မယ်လို့ အင်ဒိုနီးရှားနိုင်ငံက ဒီကနေ့မှာ ထုတ်ပြန်ပြောကြားလိုက်ပြီး တောင်တရုတ်ပင်လယ်အနီးမှာ အင်ဒိုရေတပ်ကို ဗီယက်နမ်ကမ်းခြေစောင့်တပ်ဖွဲ့က နှောက်ယှက်ခဲ့ပြီးတဲ့နောက် ဒီတုန့်ပြန်မှု ပေါ်ထွက်လာတာ ဖြစ်ပါတယ်။

ဗီယက်နမ်၊ မလေးရှားနဲ့ တရုတ်နိုင်ငံတွေက အပါအ၀င် တရားမ၀င် နိုင်ငံခြား ငါးဖမ်းသင်္ဘော ၅၁ စီးလောက် ရှိနေပြီး လာမယ့် သီတင်းနှစ်ပတ်အတွင်း နှစ်မြှုပ်သွားမယ်လို့ အင်ဒိုအာဏာပိုင်တွေက ပြောပါတယ်။ စနေနေ့က ကလီမန်တန်ပြည်နယ်မှာ ငါးဖမ်းသင်္ဘော တစ်ဒါဇင်ကျော်ကို နှစ်မြှုပ်ခဲ့ပါတယ်။

အင်ဒိုနီးရှား ငါးလုပ်ငန်းဝန်ကြီး ဆူဆီ ပူဂျီယက်စ်တူတီက မိမိတို့နိုင်ငံဟာ တရားမ၀င် ငါးဖမ်းလုပ်ငန်းတွေကို ပြတ်ပြတ်သားသား နှိမ်နှင်းတယ်ဆိုတာ အိမ်နီးချင်းနိုင်ငံတွေကို သတိပေးဖို့ လိုအပ်တယ်လို့ ပြောကြားခဲ့ပါတယ်။

“ကျွန်မတို့မှာ တစ်ခြားနည်းလမ်းမရှိဘူး။ နှစ်မြှုပ်ပစ်တာက ကျွန်မတို့တိုင်းပြည်အတွင်း အသင့်လျော်ဆုံး နည်းလမ်းပါ။ ဒါပေမယ့် တစ်ခြားနိုင်ငံတွေအတွက်တော့ ကြောက်စရာ ဖြစ်နေမှာပေါ့”

နိုင်ငံရဲ့ ဥပဒေတွေအားနည်းမှုကြောင့် နိုင်ငံခြားငါးဖမ်းသင်္ဘောတွေဟာ အင်ဒိုနီးရှားရေပိုင်နက်မှာ ၀င်ရောက် ငါးဖမ်းမှုတွေ ရှိနေပြီး တိုင်းပြည်ရဲ့စီးပွားရေး အကြီးအကျယ် ဆုံးရှုံးနေတယ်လို့လည်း ၀န်ကြီးက ထည့်သွင်း ပြောဆိုခဲ့ပါတယ်။

၂၀၁၄ ခုနှစ် သမ္မတ ဂျိုကို ၀ီဒိုဒို အာဏာရပြီးနောက်ပိုင်း အင်ဒိုနီးရှားဟာ တရားမ၀င် နိုင်ငံခြားငါးဖမ်းသင်္ဘောတွေကို နှစ်မြှုပ်ခဲ့ပြီး တစ်ဝက်ကျော်ကျော်လောက်က ဗီယက်နမ်ငါးဖမ်းသင်္ဘောတွေ ဖြစ်ပါတယ်။

ဒီလိုနှစ်မြှုပ်မှုကို အင်ဒိုနီးရှားက လနဲ့ချီ ရပ်ဆိုင်းထားခဲ့ပေမယ့် ပြီးခဲ့တဲ့တစ်ပတ်မှာတော့ ဗီယက်နမ်ကမ်းခြေစောင့်တပ်ဖွဲ့နဲ့ အင်ဒိုနီးရှားရေတပ်တို့ ထိပ်တိုက်တွေ့ဆုံမှု ဖြစ်ခဲ့ပါတယ်။ အင်ဒိုနီးရှားရေတပ်က တရားမ၀င် ငါးဖမ်းသင်္ဘောတစ်စီးကို ဖမ်းဆီးဖို့ကြိုးစားစဉ်မှာ ဗီယက်နမ် ကမ်းခြေစောင့် မော်တော်ဘုတ်တစ်စင်းက ၀င်ရောက်နှောက်ယှက်ခဲ့တာပါ။

အင်ဒိုနီးရှား ငါးဖမ်လုပ်ငန်းဝန်ကြီး ဆူဆီ ပူဂျီယက်စ်တူတီက မိမိတို့အနေနဲ့ ပြတ်ပြတ်သားသားအရေးမယူရင် ဒီလို အတင့်ရဲမှုတွေ ပိုမိုဖြစ်လာမှာဖြစ်ပြီး၊ တစ်ချိန်ကျရင် အခုထပ်ဆိုးတဲ့ ထိပ်တိုက်တွေ့မှုတွေ ဖြစ်လာမယ့်အတွက် အရေးယူရတာ ဖြစ်တယ်လို့ ထည့်သွင်းပြောကြားခဲ့ပါတယ်။

Ref: CNA