သမ္မထရမ့်၏ နျူကိစ္စမှတ်ချက် ဒေသတွင်းမတည်ငြိမ်အောင်လုပ်ခြင်းဟု အီရန်တုန့်ပြန်

မေ ၂၈၊ ၂၀၁၉
M-Media

-အမေရိကန်သမ္မတ ဒေါ်နယ်ထရမ့်ရဲ့ နျူလက်နက်နဲ့ပတ်သက်တဲ့ မှတ်ချက်ကို အီရန်နိုင်ငံခြားရေးဝန်ကြီးက ရှုတ်ချလိုက်ပြီး ဒေသတွင်း မတည်မငြိမ်ဖြစ်အောင်လုပ်ဖို့ ရည်ရွယ်တဲ့ စွပ်စွဲချက် ဖြစ်တယ်လို့ တုန့်ပြန် ပြောဆိုလိုက်ပါတယ်။

ဂျပန်ကိုရောက်ရှိနေတဲ့ ထရမ့်က အမေရိကန်ဟာ အီရန်အစိုးရ ပြုတ်ကျဖို့ ဆောင်ရွက်နေတာမဟုတ်ဘဲ နျူလက်နက် မရအောင် တားဆီးနေတာ ဖြစ်တယ်လို့ မနေ့က သတင်းစာရှင်းလင်းပွဲမှာ ပြောကြားခဲ့ပါတယ်။ အီရန်အနေနဲ့ သဘောတူညီချက်တစ်ခု ရရှိအောင်လုပ်မယ်လို့ ယုံကြည်ကြောင်း ထည့်သွင်းပြောဆိုခဲ့ပါတယ်။

အီရန်နိုင်ငံခြားရေးဝန်ကြီး ဂျာဗဒ်ဇာရစ်ဖ်က မိမိတို့အနေနဲ့ နျူလက်နက်ရရှိအောင် လုပ်ဆောင်နေတာမျိုး မရှိဘဲ အမေရိကန်ဟာ ဒေသတွင်း တင်းမာမှု မြင့်တက်ဖို့၊ အီရန်ပြည်သူတွေကို နာကျင်စေဖို့ စွပ်စွဲပြောဆိုနေတာသာ ဖြစ်တယ်လို့ မနေ့က Twitter စာမျက်နှာမှာ ရေးသားခဲ့ပါတယ်။

“အီရန်အဓိပတိ အယာတိုလာ အလီခါမေနီက နျူလက်နက်ပိတ်ပင်တဲ့ ဖသ်ဝါဓမ္မသတ်ကို အရင်ကတည်းက ထုတ်ပြန်ကာ အီရန်ဟာ နျူလက်နက် ဖန်တီးမှာမဟုတ်ဘူးလို့ ပြောထားပြီးသားပါ”

၂၀၁၅ ခုနှစ် နျူသဘောတူညီချက်နေ နှုတ်ထွက်ကြောင်း သမ္မတထရမ့်က ပြီးခဲ့တဲ့နှစ်မေလမှာ ကြေငြာပြီးနောက်ပိုင်း အမေရိကန်နဲ့ အီရန်တို့အကြား တင်းမာမှုတွေ မြင့်တက်ခဲ့တာပါ။ အခုလမှာတော့ အမေရိကန်ဟာ အရှေ့အလယ်ပိုင်းမှာ လေယာဉ်တင်သင်္ဘောတစ်စီးကို စေလွှတ်ကာ၊ ဗုံးကြဲလေယာဉ်အုပ်နဲ့ ပက်ထရီယော့ ဒုံးခွင်းစနစ်တွေကို တပ်တိုး ချထားခဲ့ပါတယ်။

ဒါ့အပြင် နောက်ထပ် တပ်ဖွဲ့ဝင် ၁၅၀၀ ကို ထပ်မံ စေလွှတ်မယ်လို့ ပြီးခဲ့တဲ့တစ်ပတ်မှာ အမေရိကန်က ထုတ်ပြန်ခဲ့ပါတယ်။ ဒီလို တပ်တွေ ထပ်တိုးချထားရတာဟာ အီရန်ရဲ့ တိုက်ခိုက်နိုင်မှုကို ကာကွယ်ဖို့ ဖြစ်တယ်လို့လည်း အမေရိကန် ပြောကြားထားပါတယ်။

Ref: Aljazeera