နောက်ဆုံးပေါ် F-35 တိုက်လေယာဉ် ရောင်းချမှု ရပ်ဆိုင်းမည်ဟု တူရကီကို အမေရိကန်အသိပေး

ဇွန် ၈၊ ၂၀၁၉
M-Media

-ရုရှားထံကနေ S-400 ဒုံးခွင်းစနစ် ၀ယ်ယူမယ့်ကိစ္စကို ရှေ့ဆက်တိုးမယ်ဆိုရင် F-35 တိုက်လေယာဉ်တွေ ရောင်းချမယ့်အစီအစဉ်ကို ပယ်ဖျက်သွားမယ်လို့ အမေရိကန် ခေတ္တ ကာကွယ်ရေးဝန်ကြိး ပက်ထရစ် ရှာနာဟန်က တူရကီကို အကြောင်းကြားစာ ပေးပို့ခဲ့ပါတယ်။

F-35 ရောင်းချရေးအစီအစဉ် တစ်စိတ်တစ်ပိုင်းအဖြစ် တူရကီတိုက်လေယာဉ်မှူးတွေကို အမေရိကန်က လေ့ကျင့်သင်ကြားပေးနေပါတယ်။ ရှာနာဟန်ရဲ့ စာမှာ လေ့ကျင့်ပေးတဲ့ အဒီအစဉ်ကို ဇူလိုင်လ ၃၁ ရက်နေ့မှာ ရပ်ဆိုင်းမှာဖြစ်ပြီး တူရကီလေယာဉ်မှူးတွေအားလုံး အဲဒီနေ့ နောက်ဆုံးထာကာ တိုင်းပြည်က ထွက်ခွာရမယ်လို့လည်း ဖော်ပြထားပါတယ်။

နှစ်ကုန်ပိုင်းမှာ F-35 တိုက်လေယာဉ်မောင်း လေ့ကျင့်ရေးအတွက် တူရကီကျောင်းသား ၃၄ ဦး အမေရိကန်ကို လာရောက်မယ့်အစီအစဉ်လည်း ပျက်ပြယ်မှာ ဖြစ်ပါတယ်။

ရုရှားထံကနေ S-400 ဒုံးခွင်းစနစ် ၀ယ်ယူမယ့်အစီအစဉ်ဟာ နေတိုးအဖွဲ့မှာ တူရကီရဲ့ ပါဝင်မှု၊ တူရကီရဲ့ စီးပွားရေးတို့ကို ထိခိုက် ပျက်ဆီးစေမှာဖြစ်ပြီး ရုရှားအပေါ် အလွန်အမင်း မှီခိုရမှုလည်း ဖြစ်သွားစေနိုင်တယ်လို့ ရှာနာဟန်ရဲ့ စာထဲမှာ သတိပေးခဲ့ပါတယ်။

S-400 ဒုံးခွင်းစနစ် ၀ယ်ယူမယ့်ကိစ္စအတွက် မေရိကန်နဲ့ တူရကီတို့ဟာ ပြီးခဲ့တဲ့လ အနည်းငယ်ကတည်းက တင်းမာမှုတွေ ဖြစ်ပေါ်ခဲ့တာ ဖြစ်ပါတယ်။ အမေရိကန်က တူရကီအနေနဲ့ ဒီဒုံးခွင်းစနစ်ကို ၀ယ်မယ်ဆိုရင် သူတို့ထံကနေ F-35 တိုက်လေယာဉ်ကို ရရှိမှာ မဟုတ်ဘူးလို့ သတိပေးထားပါတယ်။

ရုရှားက ဒုံးခွင်းစနစ်ကို တူရကီထံ မကြာခင်မှာ ပို့ဆောင်သွားမှာဖြစ်ပြီး အားလုံး အစီအစဉ်အတိုင်း အဖြစ်နေတယ်လို့လည်း မနေ့မှာ ထုတ်ဖော်ပြောဆိုခဲ့ပါတယ်။

Ref: Aljazeera