နည်းပညာသစ်များကို မိတ်ဖက်နိုင်ငံများအား မျှဝေမည်ဟု တရုတ်ပြော

ဇွန် ၈၊ ၂၀၁၉
M-Media

-5G ဆက်သွယ်ရေးကွန်ယက် အပါအ၀င် နိုင်ငံရဲ့ အဆင့်မြင့် နည်းပညာတွေကို မိတ်ဖက်နိုင်ငံတွေဆီ မျှဝေဖို့ အဆင်သင့်ပဲလို့ တရုတ်သမ္မတ ရှီကျင့်ဖျင်က မနေ့မှာ ပြောကြားလိုက်ပါတယ်။

တရုတ်အစိုးရအတွက် သူလျှိုလုပ်ပေးတယ်ဆိုတဲ့ စွပ်စွဲချက်နဲ့ တရုတ်ထိပ်တန်း ဆက်သွယ်ရေးကုမ္ပဏီ Huawei ကို အမေရိကန်က ပြီးခဲ့တဲ့လမှာ အမည်ပျက်စာရင်းသွင်းပြီး နည်းပညာတွေ မရောင်းရလို့ တားမြစ်ပိတ်ပင်ခဲ့ပါတယ်။ ဒီကိစ္စအတွက် တရုတ်နဲ့ အမေရိကန်တို့အကြား တင်းမာမှုတွေ ရှိနေပါတယ်။

ရုရှားနိုင်ငံ စိန့်ပီတာစဘတ်က စီးပွားရေးဖိုရမ်မှာ ရုရှားသမ္မတ ပူတင်နဲ့အတူ ပါဝင်ခဲ့တဲ့ ရှီက တရုတ်ဟာ နောက်ဆုံးပေါ် နည်းပညာအသစ်အဆန်းတွေ၊ အထူးသဖြင့် 5G နည်းပညာကို မိတ်ဖက်နိုင်ငံတွေထံ မျှဝေဖို့ အဆင်သင့်ရှိနေတယ်လို့ ပြောကြားခဲ့ပါတယ်။

5G နည်းပညာကို Huawei ကုမ္ပဏီက ကမ္ဘ္ဘာတစ်ဝှမ်းမှာ ဦးဆောင် ဖြန့်ကျက်ဖို့ စီစဉ်နေပြီး အခုတစ်ပတ်အစောပိုင်းမှာ ရုရှားက Huawei နဲ့ ပူးပေါင်းကာ 5G ကွန်ယက် တည်ဆောက်ဖို့ လက်မှတ်ရေးထိုးခဲ့ပါတယ်။ ယူကေ အပါအ၀င် ဥရောပက အမေရိကန်ရဲ့ မဟာမိတ်နိုင်ငံ တော်တော်များများကလည်း 5G ကွန်ယက်အတွက် Huawei နဲ့ ပူးပေါင်းဖို့ စီစဉ်နေပါတယ်။ ဒီလိုလုပ်ရင်
မိမိတို့နဲ့ ဆက်ဆံရေး ထိခိုက်လိမ့်မယ်လို့ အမေရိကန်က မဟာမိတ်နိုင်ငံတွေကို သတိပေးထားပါတယ်။

ရှီက တရုတ်ဟာ တန်းတူညီမျှမှု၊ အပြန်အလှန် လေးစားမှုကို အခြေခံပြီး မိတ်ဖက်နိုင်ငံတွေနဲ့ အကျိုးရှိတဲ့ ပူးပေါင်းဆောင်ရွက်မှုမျိုး လုပ်ဆောင်သွားချင်တယ်လို့လည်း မနေ့က ဖိုရမ်မှာ ထည့်သွင်း ပြောကြားခဲ့ပါတယ်။

Ref: CNA