ဂါဇာရှိ မိသားစု ၆ သောင်းအတွက် ကာတာက ထောက်ပံ့ကြေးပေး

ဇွန် ၂၀၊ ၂၀၁၉
M-Media

-အီဂျစ်နဲ့ အစ္စရေးတို့က ပိတ်ဆို့မှုတွေကြောင့် အတိဒုက္ခရောက်နေတဲ့ ဂါဇာပြည်သူတွေအတွက် ကာတာနိုင်ငံက ပြီးခဲ့တဲ့တစ်ပတ် နှောင်းပိုင်းမှာ ငွေသားထောက်ပံ့မှု ပြုလုပ်ခဲ့ပါတယ်။

ဂါဇာကမ်းမြှောင်ကို ထိန်းချုပ်ထားတဲ့ ဟားမက်စ်နဲ့ အစ္စရေးတို့အကြား နိုဝင်ဘာလက ရရှိထားတဲ့ ငြိမ်းချမ်းရေး သဘောတူညီချက်နဲ့အညီ လှူဒါန်းခဲ့တာဖြစ်ပြီး၊ ပါလက်စတိုင်းပြည်သူတွေ ပုံမှန်ဘ၀ ပြန်ရောက်နိုင်ရေး အကူအညီဖြစ်စေဖို့ ရည်ရွယ်တယ်လို့ ကာတာက ပြောကြားခဲ့ပါတယ်။

ကာတာရဲ့ ဒီအကူအညီဟာ အတိဒုက္ခရောက်နေတဲ့ မိသားစုတွေကို ပုံမှန် ကန်ဒေါ်လာ ၁၀၀ ထောက်ပံ့တာဖြစ်ပြီး ပါလက်စတိုင်းဆိုင်ရာ ကာတာသံအမတ် မိုဟာမက် အလ်-အီမာဒီက ကနဦးအနေနဲ့ မိသားစု ၆ သောင်းကို ပေးအပ်သွားမယ်လို့ ပြောကြားခဲ့ပါတယ်။

အစောပိုင်းက မိသားစု တစ်သိန်းလောက်ကို ပေးအပ်ဖို့ စီစဉ်ထားပေမယ့် နောက်ပိုင်းမှာ အရေအတွက်ကို လျှော့ချလိုက်ပြီး ပိုလာတဲ့ ဒေါ်လာ ၄ သန်းကို ရေရှည်တည်တံ့နေမယ့် စီမံကိန်းတွေ ဖော်ဆောင်ပေးသွားမယ်လို့လည်း သံအမတ်က ပြောပါတယ်။

ဒီထောက်ပံ့ငွေ ရရှိတဲ့ မိသားစုဝင်တွေရဲ့စာရင်းကို ဂါဇာ ဆက်သွယ်ရေးဝန်ကြီးဌာနက သူတို့ရဲ့ ၀ဘ်ဆိုက်မှာ လွှင့်တင်ပေးထားပြီး ဂါဇာစီးတီးမြို့ စာတိုက်ကနေ ငွေသားတွေ ထုတ်ပေးတာ ဖြစ်ပါတယ်။ ကာတာနိုင်ငံနဲ့ ဂါဇာကမ်းမြှောင်အကြား ဓာတ်အားလိုင်းအသစ်တစ်ခု သွယ်တန်းဖို့အတွက် ကာတာ ကိုယ်စားလှယ်အဖွဲ့ တစ်ခုဟာ အခုတစ်ပတ် အစောပိုင်းက အစ္စရေးနဲ့ ဂါဇာကမ်းမြှောင်တို့ကို သွားရောက် ဆွေးနွေးခဲ့ပါတယ်။

ဂါဇာကမ်းမြှောင်ကို အစ္စရေးနဲ့ အီဂျစ်တို့က ၂၀၀၇ ခုနှစ်ကတည်းကစလို့ ကုန်း၊ ရေ၊ လေ လမ်းကြောင်းအားလုံးကို ပိတ်ဆို့ထားပြီး၊ ဂါဇာပြည်သူတွေဟာ ပညာရေး၊ ကျန်းမာရေး၊ စီးပွားရေး စတဲ့ နယ်ပယ်အားလုံးမှာ အတိဒုက္ခ ရောက်နေကြပါတယ်။

Ref: Aljazeera