တနင်္လာနေ့ ဘောလုံးသတင်းများ

သြဂုတ် ၂၇၊ ၂၀၁၉
M-Media

ပြိုင်ဘက်ကို မလေးမစားလုပ်မိသည့်အတွက် ဘာစီလိုနာ ပြန်တောင်းပန်
===============
ပြိုင်ဘက် ရီးယဲလ်ဘက်တစ်ကို လှောင်ပြောင်သလိုဖြစ်သွားခဲ့တဲ့ ဆိုရှယ်မီဒီယာပို့စ်အတွက်ဘာစီလိုနာအသင်းက လူသိရှင်ကြား ပြန်လည်တောင်းပန်လိုက်ပါတယ်။ မနေ့က အိမ်ကွင်းမှာ ကစားခဲ့တဲ့လာလီဂါပွဲမှာ ၅ ဂိုး ၂ ဂိုးနဲ့ အနိုင်ရခဲ့ပြီးတဲ့နောက် နောက်ခံလူ ဂျူနီယာ ဖီရ်ပို လက် ၅ ချောင်းထောင်ထားတဲ့ပုံကို’ဂျူနီယာတောင် သိနေတယ်’ ဆိုတဲ့ စာသားနဲ့တွဲကာဘာစီလိုနာက သူတို့ရဲ့ Twitter စာမျက်နှာမှာ လွှင့်တင်ခဲ့ပါတယ်။ ဂျူနီယာဟာ အခုလအတွင်းကမှ ရီးယဲလ်ဘက်တစ်က ပြောင်းလာတာဖြစ်ပြီး ဒီလိုလွှင့်တင်မှုကြောင့် ပြိုက်ဘက်အသင်းကို မလေးမစားလုပ်တယ်ဆိုတဲ့ဝေဖန်မှုတွေလည်း ပေါ်ထွက်လာခဲ့ပါတယ်။ ဘာစီလိုနာအသင်းကတော့ ဒီပို့စ်ကို မလေးစားတဲ့ သဘောနဲ့တင်ခဲ့တာမဟုတ်ကြောင်း ဒီလိုတင်မိခဲ့တဲ့အတွက် အနူးအညွတ်တောင်းပန်ပါကြောင်း ပြန်လည် ရေးသားခဲ့ပါတယ်။

လူမျိုးရေးခွဲခြားမှုကြောင့် ကစားသမားက ပရိတ်သတ်ကို တိုက်ခိုက်လာနိုင်သည်ဟု သတိပေး
=====================
လူမျိုးရေးခွဲခြားမှုတွေကို အဏာပိုင်တွေက ထိထိရောက်ရောက် အရေးမယူဘူးဆိုရင် မန်ယူကွင်းလယ်လူဟောင်း အဲရစ်ကန်တိုနာလို ရုပ်ပျက်ဆင်းပျက် အနေအထားမျိုးအထိ ဖြစ်လာနိုင်တယ်လို့ လူရေးခွဲခြားမှု တိုက်ဖျက်ရေးအဖွဲ့ Kick It Out က တာဝန်ရှိသူ ဂါ့သ် ကရုစ်က ပြောကြားခဲ့ပါတယ်။ ပြီးခဲ့တဲ့တစ်ပတ်အတွင်း မန်ယူကစားသမားတွေဖြစ်တဲ့ ပေါ့ဘာနဲ့ ရက်ရ်ှဖို့ဒ်တို့ဟာ ပင်နယ်တီမ၀င်တာကြောင့် ဆိုရှယ်မီဒီယာမှာ လူမျိုးရေး ခွဲခြား စော်ကားခံခဲ့ရပါတယ်။ ကရုစ်ကတော့စော်ကားတဲ့ ပရိတ်သတ်ကို ကွန်ဖူးကစ်နဲ့ ကန်ခဲ့တဲ့ ကန်တိုနာရဲ့ ၁၉၉၅ ခုနှစ်က အဖြစ်အပျက်မျိုးထပ်ဖြစ်လာမယ်ဆိုရင် အပြစ်တင်ရမယ့်သူတွေက ပရီးမီးယားလိဂ် တာဝန်ရှိသူတွေ ဖြစ်လာလိမ့်မယ်လို့ သတိပေးခဲ့ပါတယ်။

Ref: BBC