စစ်ပွဲစလျှင် မဆုံးနိုင်ဖြစ်မည်ဟု အမေရိကန်နှင့် ဆော်ဒီကို အီရန် သတိပေး

စက်တင်ဘာ ၂၀၊ ၂၀၁၉
M-Media

-အမေရိကန်နဲ့ ဆော်ဒီတို့က တိုက်ခိုက်မှုတွေ ပြုလုပ်လာရင် မဆုံးနိုင်တဲ့စစ်ပွဲ ဖြစ်ပွားမယ်လို့
အီရန်နိုင်ငံခြားရေးဝန်ကြီး ဂျာဗဒ်ဇာရစ်ဖ်က မနေ့မှာ သတိပေးလိုက်ပါတယ်။

ပြီးခဲ့တဲ့စနေနေ့က ဆော်ဒီက ရေနံထုတ်လုပ်ရာနေရာတွေ တိုက်ခိုက်ခံရမှုအပြီး ဆော်ဒီ၊ အမေရိကန်နဲ့ အီရန်တို့အကြား တင်းမာမှုတွေ မြင့်တက်လာခဲ့တာပါ။ တိုက်ခိုက်မှုကြောင့် ကမ္ဘ္ဘာရေနံထုတ်လုပ်မှုရဲ့ ၅ ရာခိုင်နှုန်းလောက် ရပ်ဆိုင်းခဲ့ရပါတယ်။

ယီမင် ဟူသီသူပုန်အဖွဲ့က တိုက်ခိုက်မှုဟာ သူတို့လက်ချက်လို့ ပြောပေမယ့် အမေရိကန်ကတော့ ဒီနောက်ကွယ်မှာ အီရန်က ပါဝင်ပတ်သက်နေတယ်လို့ စွပ်စွဲထားပါတယ်။

ကျူးလွန်သူတွေကို တုန့်ပြန်ဖို့အတွက် လက်နက်တွေ အသင့်ပြင်ထားပြီလို့လည်း အမေရိကန်က ပြောကြားခဲ့ပါတယ်။

“ကျွန်တော်တို့ စစ်ကိုမလိုလားဘူး။ စစ်လည်းမတိုက်ချင်ဘူး။ ဒါပေမယ့် တိုင်းပြည်ကို ကာကွယ်ဖို့အတွက်ဆိုရင်တော့ မျက်စိမှိတ်နေမှာ မဟုတ်ပါဘူး” လို့ အီရန်နိုင်ငံခြားရေးဝန်ကြီး ဇာရစ်ဖ်က CNN သတင်းဌာနနဲ့ မနေ့ကအင်တာဗျူးမှာ ဖြေကြားခဲ့ပါတယ်။

အမေရိကန် ဒါမှမဟုတ် ဆော်ဒီက အီရန်အပေါ် တိုက်ခိုက်လာမယ်ဆိုရင် ဘယ်လိုလုပ်မလဲလို့ မေးမြန်းရာမှာတော့ မဆုံးနိုင်တဲ့စစ်ပွဲ ဖြစ်သွားလိမ့်မယ်လို့ ဇာရစ်ဖ်က ပြန်လည်ဖြေကြားခဲ့ပါတယ်။

ဆော်ဒီကတော့ တိုက်ခိုက်မှုကို အီရန်က စပွန်ဆာပေးတာဖြစ်ပြီး၊ လက်နက်တွေဟာ အီရန်လုပ် လက်နက်တွေ ဖြစ်တယ်လို့ ဗုဒ္ဓဟူးနေ့မှာ ထုတ်ပြန်ခဲ့ပါတယ်။ ဒါပေမယ့် တိုက်ရိုက် အပြစ်တင်တာမျိုးတော့ မလုပ်ခဲ့ပါဘူး။

ဇာရစ်ဖ်က ဒါတွေဟာ စစ်ပွဲစတင်ချင်လို့ မုသားတွေ၊ လှည့်ဖျားမှုတွေနဲ့ လုပ်ကြံဖန်တီးထားတာ ဖြစ်တယ်လို့ တုန့်ပြန်ပြောကြားခဲ့ပါတယ်။

Ref: CNN