ဘာဘရီဗလီအငြင်းပွားမှု အန္ဒိယတရားရုံးချုပ်က နိုဝင်ဘာတွင် အမိန့်ချမည်

အောက်တိုဘာ ၁၆၊ ၂၀၁၉
M-Media

-အိန္ဒိယနိုင်ငံမြောက်ပိုင်း အယွဒ္ဒယမြို့က ဘာဘရီဗလီမြေကို ဟိန္ဒူနဲ့ မွတ်စလင်လူ့အဖွဲ့အစည်းတွေထံ ခွဲဝေပေးရေး ကြားနာမှုတွေကို အိန္ဒိယ တရားရုံးချုပ်က အဆုံးသတ်လိုက်ပြီး အမိန့်ကို လာမယ့် နိုဝင်ဘာလအလယ်မှာ ထုတ်ပြန်သွားမယ်လို့ ဆိုပါတယ်။

မြေအကျယ်အဝန်း ၂.၇၇ ဧကရှိပြီး ၁၆ ရာစုက ဆောက်လုပ်ထားတဲ့ အဲဒီဗလီဟာ ၁၉၉၂ ခုနှစ်မှာ ဟိန္ဒူတွေရဲ့ ဖျက်ဆီးမှုကိုခံခဲ့ရပါတယ်။ အဲဒီလုပ်ရပ်ရဲ့ နောက်ဆက်တွဲအဖြစ် အိန္ဒိယနိုင်ငံမှာ ဟိန္ဒူနဲ့ မွတ်စလင်လူ့အဖွဲ့အစည်းအကြား အဓိကရုဏ်းတွေ ဖြစ်ပွားကာ လူ ၂ ထောင်လောက် သေဆုံးခဲ့ပါတယ်။

ဗလီနေရာမှာ အရင်က ဟိန္ဒူဘုရားကျောင်းရှိခဲ့တယ်လို့ဆိုကာ ဟိန္ဒူတွေက ဘုရားကျောင်းပြန်ဆောက်ဖို့ စီစဉ်နေကြတာ ဖြစ်ပါတယ်။

ဒီကိစ္စနဲ့ပတ်သက်ပြီး လူ့အဖွဲ့အစည်းနှစ်ခုအကြား ညှိနှိုင်းဆွေးနွေးမှုတွေ ပြုလုပ်ခဲ့ပေမယ့် မအောင်မြင်ခဲ့တာကြောင့် ၂၀၁၉ ခုနှစ် ဩဂုတ်လကစလို့ တရားရုံးချုပ် တရားသူကြီး ၅ ဦးပါတဲ့ ခုံအဖွဲ့က ကိုင်တွယ်ခဲ့တာပါ။ ခုံအဖွဲ့ဟာ ဗလီမြေနေရာကို ဟိန္ဒူနဲ့ မွတ်စလင်တွေကို ခွဲဝေပေးရမယ်ဆိုတဲ့ ၂၀၁၀ ခုနှစ် အောက်ရုံးရဲ့ ဆုံးဖြတ်ချက်၊ အဲဒီဆုံးဖြတ်ချက်ကို ကန့်ကွက်ထားတဲ့ အယူခံလွှာ ၁၄ ခုတို့ကို စစ်ဆေးခဲ့တာ ဖြစ်ပါတယ်။

Ref: AP