ဆီးရီးယားမြောက်ပိုင်းကို ကျူးကျော်တိုက်ခိုက်မှု တူရကီ ရပ်ဆိုင်းမည်

အောက်တို ၁၈၊ ၂၀၁၉
M-Media

-ဆီးရီး‌ယားမြောက်ပိုင်းမှာ ကျူးကျော်တိုက်ခိုက်မှုတွေ လုပ်နေတာကို ယာယီရပ်တန့်ဖို့အတွက် တူရကီဟာ အမေရိကန်နဲ့ သဘောတူညီချက်တစ်ခု ရရှိခဲ့ပြီး ဆီးရီးယားက ကာ့ဒ်တပ်ဖွဲ့ SDF ကလည်း ဒီသဘောတူညီချက်ကို လိုက်နာမယ်လို့ ထုတ်ပြန်ခဲ့ပါတယ်။

SDF ဟာ ဆီးရီးယားက IS အကြမ်းဖက်အဖွဲ့ကို သုတ်သင်ရှင်းလင်းရာမှာ အဓိကအခန်းကဏ္ဍကနေ ပါဝင်ခဲ့တဲ့အဖွဲ့ဖြစ်ပြီး လက်ရှိ မြောက်ပိုင်းဒေသကိုလည်း တည်ငြိမ်အောင် ထိန်းထားနိုင်ပါတယ်။

တူရကီက SDF ကို အကြမ်းဖက်အဖွဲ့လို့သတ်မှတ်ကာ ပြီးခဲ့တဲ့တစ်ပတ် ဗုဒ္ဓဟူးနေ့ကစလို့ ဆီးရီးယားမြောက်ပိုင်းကို ကျူးကျော်တိုက်ခိုက်ခဲ့တာ‌ဖြစ်ပါတယ်။

မနေ့မှာတော့ အမေရိကန် ဒုတိယသမ္မတ မိုက် ပန့်စ်နဲ့ တူရကီသမ္မတ အာဒိုဂန်တို့ ဆွေးနွေးကာ ၅ ရက်ကြာ အပစ်ရပ်ရေး သဘောတူညီခဲ့ပါတယ်။ အပြန်အလှန်အားဖြင့် အမေရိကန်ကလည်း တူရကီအပေါ် မကြာသေးခင်က ပြုလုပ်ထားတဲ့ ပိတ်ဆို့မှုတွေကို ဖယ်ရှားပေးမှာ ဖြစ်ပါတယ်။

တူရကီနိုင်ငံခြားရေးဝန်ကြီး Mevlut Cavusoglu က အပစ်ရပ်ရေးသဘောတူညီချက် ရရှိ‌ကြောင်း အတည်ပြုခဲ့ပါတယ်။

အမေရိကန်သမ္မတ ဒေါ်နယ်ထရမ့်ကတော့ သူ့ရဲ့ ပိတ်ဆို့မှု နောက်ဆက်တွဲအဖြစ် ဒီလိုအပစ်ရပ်ရေး ဖြစ်လာတာဖြစ်ကြောင်း၊ တူရကီသမ္မတ အာဒိုဂန်ဟာ မှန်ကန်တဲ့ဆုံးဖြတ်ချက်ကို ချတတ်တဲ့ လေးစားစရာ ခေါင်းဆောင်မျိုးဖြစ်ကြောင်း Twitter စာမျက်နှာမှာ ရေးသားခဲ့ပါတယ်။

ကုလသမဂ္ဂ အထွေထွေအတွင်းရေးမှူး အန်တိုနီယို ဂူတာရက်စ်ကလည်း ဒီအပစ်ရပ်ရေးကို ကြိုဆိုကြောင်း ထုတ်ပြန်ခဲ့ပါတယ်။

ဆီးရီးယားမြောက်ပိုင်းကို တူရကီရဲ့ ကျူးကျော်တိုက်ခိုက်မှုအတွင်း အရပ်သားအမြောက်အများ သေဆုံးခဲ့သလို၊ သိန်းနဲ့ချီတဲ့ ပြည်သူတွေလည်း အိုးအိမ်စွန့်ခွာ ထွက်ပြေးခဲ့ရပါတယ်။ SDF က ဖမ်းဆီးအကျဉ်းကျထားတဲ့ IS အကြမ်းဖက်သမားတွေ လွတ်မြောက်သွားတာလည်းရှိခဲ့ပြီး ဒီအတွက် စိုးရိမ်ကြောင်း နိုင်ငံတကာအသိုင်းအဝိုင်းက ပြောကြားထားပါတယ်။

Ref: Aljazeera