အတိုက်အခံခေါင်းဆောင်ကို အင်ဒိုသမ္မတက ကာကွယ်ရေးဝန်ကြီးခန့်

အောက်တိုဘာ ၂၃၊ ၂၀၁၉
M-Media

-ဧပြီလက ဒုတိယအကြိမ် သမ္မတရွေးကောက်ပွဲမှာ ခါးသီးတဲ့ပြိုင်ဘက် ဖြစ်ခဲ့သူ ပရာဘို၀ို ဆူဘီယန်တိုကို အင်ဒိုနီးရှားသမ္မတ ဂျိုကိုဝီဒိုဒိုက ဒီကနေ့မှာ ကာကွယ်ရေးဝန်ကြီးအဖြစ် ခန့်အပ်လိုက်ပါတယ်။

ဆူဘီယန်တိုဟာ ဝီဒိုဒိုရဲ့ ပထမဆုံး သမ္မတသက်တမ်းမှာ အတိုက်အခံခေါင်းဆောင် ဖြစ်ခဲ့ပြီး ဝီဒိုဒိုကို ၂ ကြိမ်တိုင်တိုင် ရှုံးနိမ့်ခဲ့သူလည်း ဖြစ်ပါတယ်။ ရွေးကောက်ပွဲ ပြန်လည်အနိုင်ရပြီး ၆ လအ‌ကြာ ဒီကနေ့ အမျိုးသားနဲ့ အမျိုးသမီး ၃၄ ဦးပါဝင်တဲ့ အစိုးရအဖွဲ့ကို မိတ်ဆက်ခဲ့ရာမှာ ဆူဘီယန်တိုက ကာကွယ်ရေးဝန်ကြီးအဖြစ် ပါဝင်လာခဲ့တာ ဖြစ်ပါတယ်။

“ဒီရာထူးနဲ့ပတ်သက်ပြီး ကျွန်တော့်အနေနဲ့ သိပ်ပြောစရာမလိုဘူးလို့ ယုံကြည်တယ်။ ကျွန်တော်သိတာထက် သူက ပိုသိပါတယ်” လို့ ဆူဘီယန်တိုကို ခန့်အပ်မှုနဲ့ပတ်သက်ပြီး ပြောကြားခဲ့ပါတယ်။

ဆူဘီယန်တိုကတော့ တိုင်းပြည်ရဲ့ နောက်ဆုံးအခြေအနေကို လေ့လာပြီး ချက်ခြင်း တာဝန်ထမ်းဆောင်သွားမယ်လို့ ပြောကြားခဲ့ပါတယ်။

ဧပြီလရွေးကောက်ပွဲကို ဝီဒိုဒိုအစိုးရက စနစ်တကျ လိမ်လည်ပြီး လုပ်ခဲ့တယ်ဆိုတဲ့သတင်းတွေ ထွက်ခဲ့တာကြောင့် ရွေးကောက်ပွဲနောက်ပိုင်းမှာ ဆန္ဒပြမှုတွေ ဖြစ်ခဲ့ပြီး အနည်းဆုံး လူ ၉ ဦး သေဆုံးခဲ့ပါတယ်။

ဒီအဖြစ်အပျက်တွေဖြစ်ပွားပြီးနောက် ဝီဒိုဒိုနဲ့ ဆူဘီယန်တိုတို့ဟာ လူမြင်ကွင်းမှာ ပိုမိုနွေးထွေးစွာ ဆက်ဆံလာခဲ့ပါတယ်။ ဝီဒိုဒိုက ဆူဘီယန်တိုဟာ သူ့ရဲ့ အကောင်းဆုံးသူငယ်ချင်းဖြစ်တယ်လို့ ဆိုရှယ်မီဒီယာမှာ ရေးသားခဲ့သလို ဆူဘီယန်တိုကလည်း Gerindra ပါတီက သူနဲ့ အခြားတစ်ယောက်ကို အစိုးရမှာ တာဝန်ထမ်းဆောင်ဖို့ ဝီဒိုဒိုက ကမ်းလှမ်းခဲ့တယ်လို့ တနင်္လာနေ့မှာ ဖွင့်ဟပြောကြားခဲ့ပါတယ်။

ဝီဒိုဒိုရဲ့ အစိုးရသစ်မှာ တိုင်းပြည်အတွင်းက ထင်ရှားကျော်ကြားတဲ့ လုပ်ငန်းရှင်တွေ၊ ပညာတတ်တွေ တော်တော်များများ ပါဝင်လာခဲ့ပါတယ်။

Ref: Aljazeera