လူသတ်ဒရုန်းများကို တရုတ်က အရှေ့အလယ်ပိုင်းနိုင်ငံများသို့ တင်ပို့နေ

နိုဝင်ဘာ ၈၊ ၂၀၁၉
M-Media

-တရုတ်ဟာ မောင်းသူမဲ့ လူသတ်ဒရုန်းတွေကို ပဋိပက္ခတွေဖြစ်ပွားနေတဲ့ အရှေ့အလယ်ပိုင်းနိုင်ငံတွေဆီ တင်ပို့နေတယ်လို့ အမေရိကန် ကာကွယ်ရေးဝန်ကြီး မာ့ခ် အက်စ်ပါက အခုတစ်ပတ်အစောပိုင်းမှာ ပြောကြားလိုက်ပြီး ဒီကိစ္စနဲ့ပတ်သက်လို့ အမေရိကန်ဖက်က ပထမဆုံး ထုတ်ဖော်ပြောဆိုမှုလည်း ဖြစ်ပါတယ်။

အင်အားကြီးနိုင်ငံတွေအကြား ဉာဏ်ရည်တုနည်းပညာ AI အသုံးပြုတဲ့ လက်နက်တွေ အပြိုင်အဆိုင် ထုတ်လုပ်မှုအတွက် ကမ္ဘာကြီးမှာ စိုးရိမ်မှုတွေ မြင့်တက်လာနေတာပါ။

Ziyan လို တရုတ်ကုမ္ပဏီတွေကလည်း မောင်းသူမဲ့ အဆင့်မြင့် ဒရုန်းလက်နက်တွေကို ပိုမိုတင်ပို့ဖို့ ကြိုးပမ်းလာကြပါတယ်။ Ziyan ကထုတ်လုပ်တဲ့ Blowfish A3 ဒရုန်းရဟတ်ယာဉ်ဆိုရင် စက်သေနတ် တပ်ဆင်ထားပြီး ပစ်မှတ်ကို အလိုအလျောက် ထောက်လှမ်း၊ ချိန်ဆ ပစ်ခတ်နိုင်စွမ်းရှိပါတယ်။

ကာကွယ်ရေးဝန်ကြီး အက်စ်ပါက တရုတ်စစ်တပ်ဟာ သူတို့ရဲ့ အဆင့်မြင့် ဒရုန်းအချို့ကို အရှေ့အလယ်ပိုင်းနိုင်ငံတွေထံ တင်ပို့နေပြီး ကိုယ်ပျောက် UAV တွေလို မျိုးဆက်သစ် ဒရုန်းတွေကိုလည်း တင်ပို့ဖို့ စီစဉ်နေတယ်လို့ ‌ဝါရှင်တန်ဒီစီမှာပြုလုပ်ခဲ့တဲ့ AI ဆိုင်ရာ နိုင်ငံတော်ကာကွယ်ရေး ကော်မရှင်ညီလာခံမျာ ပြောကြားခဲ့ပါတယ်။

အမေရိကန်ကာကွယ်ရေးဝန်ကြီးဌာနရဲ့ AI စင်တာက မဟာဗျူဟာနဲ့ ဆက်ဆံရေးဆိုင်ရာ အကြီးအကဲ ဂရက်ဂျ် အေလန်က AI လက်နက်တွေအတွက် စိုးရိမ်‌မှုရှိနေပေမယ့် တရုတ်ခေါင်းဆောင်တွေက စစ်တပ်မှာ ဒီလိုလက်နက်မျိုး အသုံးပြုမှုကို ရှောင်ရှားလို့မရတဲ့အတွက် အကြီးအကျယ် ထုတ်လုပ်ဖို့ ရည်ရွယ်နေတယ်လို့ ဖေဖော်ဝါရီလက ထုတ်ပြန်တဲ့စာတမ်းတစ်ခုမှာ ပြောကြားခဲ့ပါတယ်။

အက်စ်ပါကတော့ တရုတ်ရဲ့ စောင့်ကြည့်ရေး ဆော့ဖ်ဝဲတွေနဲ့ ဟာ့ဒ်ဝဲ ကွန်ယက်တွေကလည်း AI နည်းပညာ ပိုမိုတိုးတက်ဖို့အတွက် အထောက်အကူ ဖြစ်စေလိမ့်မယ်လို့ ထည့်သွင်းပြောဆိုခဲ့ပါတယ်။

အမရိကန်ရဲ့ ကာကွယ်ရေးတီထွင်ဖန်တီးမှု ဘုတ်အဖွဲ့ဟာ အမေရိကန်စစ်တပ်အတွက် AI ဆိုင်ရာ စည်းကမ်းသတ်မှတ်ချက်တွေကို ထုတ်ပြန်ခဲ့ပြီး အဓိကသတ်မှတ်ချက်က လူသားတွေရဲ့ ထိန်းချုပ်မှုနဲ့ မလွတ်ကင်းဖို့ ဖြစ်ပါတယ်။

Ref: Asia Times