ကမ္ဘာ့ဖလား ပရိတ်သတ်များနေထိုင်ရန် ကာတာက ဇိမ်ခံသင်္ဘော ၂ စီး စီစဉ်ပေးမည်

နိုဝင်ဘာ ၁၉၊ ၂၀၁၉
M-Media

-၂၀၂၂ ခုနှစ် ကမ္ဘာ့ဖလားပြိုင်ပွဲ လာရောက်ကြည့်ရှုမယ့် ပရိတ်သတ်တွေ နေထိုင်ရေးအတွက် ဇိမ်ခံသင်္ဘော ၂ စီး စီစဉ်ပေးသွားမယ်လို့ ကတာနိုင်ငံက မနေ့မှာ ကြေငြာလိုက်ပါတယ်။

ပြိုင်ပွဲကျင်းပရေးကို ကြီးကြပ်ကွပ်ကဲနေတဲ့ ကာတာက Supreme Committee for Delivery and Legacy အဖွဲ့ဟာ ဇိမ်ခံသင်္ဘော ၂ စီး ငှားရမ်းနိုင်ရေးအတွက် ဆွီဒင်အခြေစိုက် ဇိမ်ခံသင်္ဘောကုမ္ပဏီ MSC Cruises နဲ့ တနင်္လာနေ့မှာ စာချုပ်ချုပ်ဆိုခဲ့တာပါ။

လက်ရှိ ဒိုဟာမြို့ ဆိပ်ကမ်းတစ်ခုမှာ ဆိုက်ကပ်ထားတဲ့ အဲဒီ သင်္ဘော ၂ စီးဟာ စုစုပေါင်း လူ ၄၀၀၀ လောက် တည်းခိုနိုင်မှာဖြစ်ပါတယ်။

“၂၀၂၂ မှာလာမယ့် ပရိတ်သတ်တွေအတွက် ထူးခြားတဲ့နေရာထိုင်ခင်း စီစဉ်ပေးရေး MSC Cruises နဲ့ ပူးပေါင်း ဆောင်ရွက်ခွင့်ရတာကို ကျွန်တော်တို့ ကျေနပ်မိပါတယ်။ ဇိမ်ခံသင်္ဘောတစ်စီးမှာ နေထိုင်ရမယ့် အနေအထားအတွက် ကမ္ဘာစ်ဝှမ်းက ပရိတ်သတ်တွေ စိတ်လှုပ်ရှားနေမယ်ဆိုတာလည်း ကျွန်တော်တို့ သိပါတယ်။ အနောက်ပင်လယ်အော်ရှုခင်းကို ကောင်းကောင်း ကြည့်နိုင်မှာဖြစ်သလို အားကစားကွင်းတွေနဲ့ ပရိတ်သတ်သီးသန့်နေရာတွေကိုလည်း မြန်မြန်ဆန်ဆန် သွားလာနိုင်မှာပါ” လို့ Supreme Committee for Delivery and Legacy အဖွဲ့ရဲ့ အထွေထွေအတွင်းရေးမှူး ဟာဆန် အလ်-သာဝါဒီက ပြောကြားခဲ့ပါတယ်။

ရေပေါ်ဟိုတယ်အပြင် တိုက်ခန်းတွေ၊ ပရိတ်သတ်ရွာတွေနဲ့ ဟိုတယ်တွေလို အခြား နေရာထိုင်ခင်းတွေကိုလည်း ကာတာက စီစဉ်ပေးထားပါတယ်။

၂၀၂၂ ခုနှစ် ကာတာ ကမ္ဘာ့ဖလားပြိုင်ပွဲဟာ အရှေ့အလယ်ပိုင်းမှာ ပထမဆုံး ကျင်းပမယ့်ပြိုင်ပွဲဖြစ်ပါတယ်။ Supreme Committee က ပြိုင်ပွဲကျင်းပမယ့် ကစားကွင်းတွေထဲက ၂ ခုအပါအဝင် ပြိုင်ပွဲအတွက် လိုအပ်တဲ့ပြင်ဆင်မှု ၇၅ ရာခိုင်နှုန်း ပြီးစီးသွားပြီလို့ ပြောကြားခဲ့ပါတယ်။ နောက်ထပ် ကစားကွင်း ၆ ကွင်းကတော့ ဆောက်လုပ်ဆဲဖြစ်ပါတယ်။

Ref: Aljazeera