တူရကီနှင့် ကာတာခေါင်းဆောင်တို့ တွေ့ဆုံဆွေးနွေးမည်

နိုဝင်ဘာ ၂၅၊ ၂၀၁၉
M-Media

-တူရကီသမ္မတ အာဒိုဂန်နဲ့ ကာတာစော်ဘွား ရှိခ် တာမင် ဘင် ဟာမဒ် အလ် သာနီတို့ဟာ ဒီကနေ့ ကာတာမြို့တော် ဒိုဟာမှာ တွေ့ဆုံပြီး အရှေ့အလယ်ပိုင်း အရေးကိစ္စတွေကို ဆွေးနွေးဖို့ရှိတယ်လို့ သိရပါတယ်။

ကာတာနဲ့ တူရကီတို့ဟာ ခိုင်မာတဲ့ဆက်ဆံရေးတစ်ခု ရှိနေပြီး ဆီးရီးယား၊ ပါလက်စတိုင်းနဲ့ အီဂျစ်လို ဒေသတွင်းနိုင်ငံတွေက နိုင်ငံရေးနဲ့ စစ်ရေးပြဿနာတွေမှာလည်း တူညီတဲ့ ရပ်တည်ချက်မျိုး ရှိနေတာ ဖြစ်ပါတယ်။ ၂၀၁၇ ခုနှစ် ဆော်ဒီ၊ ယူအေအီး၊ ဘာရိန်းနဲ့ အီဂျစ်တို့က ကာတာနဲ့ အဆက်အသွယ် ဖြတ်တောက်ပြီးနောက်ပိုင်း တူရကီနဲ့ ကာတာတို့အကြား စီးပွားရေး ဆက်ဆံမှုကလည်း ပိုမို အားကောင်းလာခဲ့ပါတယ်။

ဆီးရီးယားနိုင်ငံမြောက်ပိုင်းကို ကျူးကျော်ကာ ကာ့ဒ်တပ်ဖွဲ့တွေကို တိုက်ခိုက်တဲ့ တူရကီရဲ့ စစ်ဆင်ရေးကို ကာတာက ထောက်ခံထားပါတယ်။

စစ်ဖက်ဆိုင်ရာမှာလည်း ကာတာနဲ့ တူရကီတို့ဟာ ခိုင်မာတဲ့ ဆက်ဆံရေးတစ်ရပ် ရှိနေပြီး ၂၀၁၅ ခုနှစ်ကတည်းက တူရကီဟာ ကာတာနိုင်ငံမှာ စစ်အခြေစိုက်စခန်းတစ်ခု ထားရှိပြီး၊ နှစ်နိုင်ငံ ပူးတွဲစစ်ရေးလေ့ကျင့်မှုတွေကိုလည်း လုပ်ဆောင်ခဲ့ပါတယ်။

Ref: Aljazeera