လူထုဆန္ဒပြမှုကြောင့် အီရတ်ဝန်ကြီးချုပ် နှုတ်ထွက်စာတင်

ဒီဇင်ဘာ ၁၊ ၂၀၁၉
M-Media

-မြို့တော် ဘဂ္ဂဒတ်နဲ့ နိုင်ငံတောင်ပိုင်းတွေမှာ အစိုးရဆန့်ကျင်ရေး ဆန္ဒပြမှုတွေ အကြီးအကျယ် ဖြစ်ပွားခဲ့ပြီးတဲ့နောက် အီရတ်ဝန်ကြီးချုပ် အဒဲလ် အဘ်ဒူလ် မဟ်ဒီဟာ မနေ့က လွှတ်တော်မှာ နှုတ်ထွက်စာ တင်လိုက်ပါတယ်။

ခြစားမှု၊ အလုပ်အကိုင်မပေးနိုင်မှု၊ အစိုးရဝန်ဆောင်မှုတွေ ညံ့ဖျင်းမှုတွေကြောင့် အီရတ်နိုင်ငံတစ်ဝှမ်း အောက်တိုဘာ ၁ ရက်နေ့ကနေစပြီး ဆန္ဒပြမှုတွေ ဖြစ်ပွားခဲ့တာပါ။ လုံခြုံရေးတပ်ဖွဲ့တွေကလည်း ပြင်းပြင်းထန်ထန် နှိမ်နှင်းခဲ့ပြီး လူပေါင်း ၄၀၀ ကျော်လောက် သေဆုံးခဲ့ပါတယ်။ ၂၀၀၃ ခုနှစ် အမေရိကန်ရဲ့ ကျူးကျော်တိုက်ခိုက်မှုအပြီး ပေါ်ပေါက်လာတဲ့ နိုင်ငံရေးစနစ်ကို အဆုံးသတ်ဖို့လည်း ပြည်သူတွေက တောင်းဆိုခဲ့ကြပါတယ်။

ရာထူးကနေ နှုတ်ထွက်မယ့်အကြောင်းကို မဟ်ဒီက သောကြာနေ့မှာကတည်းက အတည်ပြု ပြောကြားခဲ့တာ ဖြစ်ပါတယ်။ ဒီကနေ့ကျင်းပမယ့် အီရတ်လွှတ်တော်မှာ မဟ်ဒီရဲ့ နှုတ်ထွက်မှုကို လက်ခံမလားဆိုတာ အမတ်တွေက မဲခွဲဆုံးဖြတ်မှာပါ။

မဟ်ဒီဦးဆောင်တဲ့ အစိုးရကို မထောက်ခံ‌တော့ကြောင်း နိုင်ငံရဲ့ ထိပ်တန်း ရှီအာဘာသာရေးခေါင်းဆောင်က သောကြာနေ့မှာ ပြောကြားခဲ့ပါတယ်။

Ref: Aljazeera