အာကာသအမှိုက်ရှင်းလင်းရေး လုပ်ငန်းကို ဥရောပအာကာသအေဂျင်စီက စတင်ဆောင်ရွက်မည်

ဒီဇင်ဘာ ၁၂၊ ၂၀၁၉
M-Media

-ကမ္ဘာပတ်လမ်းကြောင်းမှာရှိနေတဲ့ အမှိုက်တွေကို ရှင်းလင်းရေး လုပ်ငန်းတစ်ခုကို ပထမဆုံး စတင်သွားမယ်လို့ ဥရောပအာကာသအေဂျင်စီ ESA က အခုတစ်ပတ်အစောပိုင်းမှာ ထုတ်ပြန်ပြောကြားလိုက်ပါတယ်။

Clear Space-1 လို့ အမည်ပေးထားတဲ့ ဒီရှင်းလင်းရေးကို ဆွီဒင်ကုမ္ပဏီ Clear Space က ဖန်တီးထားတဲ့ လက်တံလေးခုပါ စက်ရုပ်နဲ့ ဆောင်ရွက်မှာ ဖြစ်ပါတယ်။ ကမ္ဘာပတ်လမ်းကြောင်းမှာ အသုံးမပြုတော့တဲ့ ဂြိုဟ်တုတွေ၊ ဒုံးကျည်အပိုင်းအစတွေ၊ ဂြိုဟ်တုတွေက ကွာကြတဲ့ဆေးတွေ စတဲ့ အမှိုက်သရိုက် မြောက်များစွာ ရှိနေတာပါ။

ESA ရဲ့ အခုစီမံကိန်းကို ၂၀၂၀ အစောပိုင်းမှာ စတင်သွားမှာ ဖြစ်ပါတယ်။ စက်ရုပ်ဟာ ၂၀၁၃ ခုနှစ် ESA ရဲ့ ဂြိုဟ်တုလွှတ်တင်မှုမှာ ကျန်ရစ်ခဲ့တဲ့ ဒုံးကျည်အပိုင်းအစတွေကို ရှင်းလင်းမှာပါ။ အမှိုက်သရိုက်တွေကို သိမ်းဆည်းပြီးတဲ့နောက် စက်ရုပ်ဟာ ကမ္ဘာကို ပြန်လာမှာဖြစ်ပြီး လေထုထဲဝင်ရောက်တဲ့အခါမှာ အမှိုက်တွေကိုရော၊ စက်ရုပ်ကိုပါ မီးရှို့ဖျက်ဆီးသွားဖို့ ပြင်ဆင်ထားပါတယ်။

ဒီအစီအစဉ် အောင်မြင်မယ်ဆိုရင် ကမ္ဘာပတ်လမ်းက အခြားကြီးမားတဲ့အရာတွေကို ရှင်းလင်းဖို့ ရှိနေပါတယ်။ ၂၀၂၅ ခုနှစ်ကျရင် အာကာသ အမှိုက်သရိုက်ရှင်းလင်းရေးလုပ်ငန်းကို တရားဝင် စတင်ဆောင်ရွက်မှာ ဖြစ်ပါတယ်။

ESA က ထုတ်ပြန်တဲ့ကြေငြာချက်မှာ လက်ရှိ ကမ္ဘာပတ်လမ်းကြောင်းမှာ အသုံးပြုနေတဲ့ ဂြိုဟ်တုအရေအတွက်က ၂ ထောင်နီးပါးရှိပြီး အသုံးမပြုတော့တာတွေက ၃ ထောင်ကျော်ရှိနေကြောင်း အာကာသက အမှိုက်ပြဿနာဟာ အရင်ကထက် ပိုမိုကြီးထွားလာကြောင်း ဖော်ပြထားပါတယ်။

မသုံးတော့တဲ့ ဂြိုဟ်တုတွေအပြင် ကမ္ဘာပတ်လမ်းကြောင်းမှာ လှည့်ပတ်နေတဲ့ အမှိုက်အရေအတွက်ဟာ သန်း ၁၇၀ လောက် ရှိမယ်လို့ ESA က ခန့်မှန်းတွက်ချက်ထားပါတယ်။ အချို့အမှိုက်တွေဟာ သေနတ်ကျည်ဆံထက် လျင်မြန်တဲ့အရှိန်နဲ့ လှည့်ပတ်နေတာကြောင့် ဂြိုဟ်တုတွေ၊ လူလိုက်ပါတဲ့ အာကာသယာဉ်တွေအတွက် အန္တရာယ်ရှိတယ်လို့လည်း ESA က ထည့်သွင်းပြောကြားခဲ့ပါတယ်။

Ref: CNN