အီတလီနိုင်ငံတွင် အိမ်တစ်လုံး ၁ ဒေါ်လာဖြင့်ရောင်းချသည့်စျေးကွက် မြင့်တက်

ဒီဇင်ဘာ ၁၈၊ ၂၀၁၉
M-Media

-အီတလီနိုင်ငံ စစ္စလီကျွန်းပေါ်က ဘီဗိုနာဆိုတဲ့မြို့ငယ်လေးမှာ အိမ်တစ်လုံးကို ၁ ဒေါ်လာနဲ့ ရောင်းချနေပြီး ဝယ်ယူသူတွေအနေနဲ့ တစ်ခြားခံစားခွင့်တွေလည်း ရရှိမယ်လို့ ဆိုပါတယ်။

ပညာရေး၊ စီးပွားရေး အခွင့်အလမ်းတွေ ပိုများမယ့် မြို့ကြီးတွေကို ရွှေ့ပြောင်းနေသူတွေ များလာတာကြောင့် ‌အီတလီနိုင်ငံရဲ့ ဒေသတစ်ချို့က မြို့ငယ်တွေမှာ လူနေထိုင်မှုတွေ နည်းလာပါတယ်။ ဒါ့ကြောင့် အာဏာပိုင်တွေက မြို့တွေ မပျောက်သွားရေး နည်းလမ်းမျိုးစုံနဲ့ ကြိုးစားနေကြပါတယ်။

နိုင်ငံတောင်ပိုင်း စစ္စလီကျွန်းက ဘီဗိုနာဆိုတဲ့မြို့လေးမှာလည်း ဒီလိုအခြေအနေမျိုးကို ကြုံတွေ့နေရပါတယ်။ ၁၆ ရာစုလောက်ကနေ စည်ကားခဲ့တဲ့ ဒီမြို့မှာ လွန်ခဲ့တဲ့ နှစ် ၄၀ အတွင်း လူဦးရေ ထက်ဝက်လောက် ကျဆင်းသွားပြီး ဒီကနေ့မှာတော့ လူဦးရေ ၃၈၀၀ သာ ကျန်ရှိပါတော့တယ်။

မြို့မသေဆုံးဖို့အတွက် မြို့တော်ကောင်စီက မြို့တွင်းမှာရှိနေတဲ့ နေအိမ်တွေကို တစ်ဒေါ်လာနဲ့ ရောင်းချပေးမယ့်အပြင် အခွန်ကင်းလွတ်ခွင့်ပါ ပေးမယ်လို့ ကမ်းလှမ်းထားပါတယ်။

မြို့တောင်ကောင်စီရဲ့ ယဉ်ကျေးမှုဆိုင်ရာ တာဝန်ရှိသူ အိန်ဂျလာ ကာနီဇာရိုက ဒီဆောင်ရွက်ချက်ဟာ တစ်ချိန်က စည်ကားခဲ့တဲ့ မြို့ရဲ့သမိုင်းကြောင်းကို ထိန်းသိမ်းဖို့ဖြစ်တယ်လို့ ပြောကြားခဲ့ပါတယ်။

ဘီဗိုနာမြို့အပြင် စစ္စလီကျွန်းက အခြားမြို့တွေမှာလည်း လူနေထိုင်မှု နည်းလာတာကြောင့် နေအိမ်တွေကို ၁ ဒေါ်လာလောက်နဲ့ ရောင်းချမှုတွေ ပြုလုပ်နေပါတယ်။ တစ်ချို့ဒေသတွေမှာဆိုရင် ဝယ်ယူသူတွေကို ထောက်ပံ့ကြေးပေးမယ်၊ စီးပွာရေးလုပ်ငန်း ထူထောင်ပေးမယ်ဆိုတဲ့ ကမ်းလှမ်းမှုတွေတောင် ရှိနေပါတယ်။

အဲဒီတစ်ဒေါ်လာဟာ အိမ်ရဲ့ တန်ဖိုးဖြစ်ပြီး မဝယ်ခင်မှာ ဒေါ်လာ ၃ ထောင်ကနေ ၅ ထောင်အထိ စပေါ်ပေးရတာတွေ ရှိပါတယ်။ ၁ နှစ်ကနေ ၃ နှစ်အတွင်း အိမ်ကို ပြင်ဆင်မယ်ဆိုတဲ့ ကတိကဝတ်နဲ့ စပေါ်ပေးထားရတာဖြစ်ပြီး အဲဒီကာလမှာ အိမ်ပြင်ဆင်ပြီးရင်တော့ စပေါ်ငွေကို ပြန်ထုတ်နိုင်မှာပါ။

Ref: CNN