နိုင်ငံသားဥပဒေပြင်ဆင်ချက်အတွက် မစိုးရိမ်ရန် မွတ်စလင်များကို အိန္ဒိယဝန်ကြီးချုပ် ပြော

ဒီဇင်ဘာ ၂၄၊ ၂၀၁၉
M-Media

-နိုင်ငံသားဥပဒေ ပြင်ဆင်ချက်နဲ့ပတ်သက်ပြီး မစိုးရိမ်ကြဖို့ နိုင်ငံသားမွတ်စလင်တွေကို အိန္ဒိယဝန်ကြီးချုပ် နရန်ဒရာမိုဒီက ပြောကြားလိုက်ပြီး၊ အတိုက်အခံတွေက ကောလဟာလတွေ လွှင့်နေတယ်လို့ အပြစ်တင်ခဲ့ပါတယ်။

အခုလအတွင်း အတည်ပြုခဲ့တဲ့ နိုင်ငံသားဥပဒေ ပြင်ဆင်ချက်ဟာ ပါကစ္စတန်၊ အာဖဂန်နစ္စတန်နဲ့ ဘင်္ဂလားဒေ့ရှ်ကနေ အိန္ဒိယနိုင်ငံကို ဝင်ရောက်အခြေချ‌ နေထိုင်သူတွေထဲမှာ မွတ်စလင်ကလွဲလို့ အခြားဘာသာဝင်တွေကို နိုင်ငံသားပေးနိုင်ရေး ဖြစ်ပါတယ်။

ဒီ‌ပြင်ဆင်ချက်ကြောင့် မွတ်စလင်တွေအပါအဝင် အိန္ဒိယနိုင်ငံတစ်ဝှမ်းမှာ ပြီးခဲ့တဲ့ ၂ ပတ်အတွင်း ဆန္ဒပြမှုတွေ အကြီးအကျယ် ဖြစ်ပေါ်နေပြီး အနည်းဆုံး ၂၅ ဦး သေဆုံးခဲ့ပါတယ်။

နယူးဒေလီမှာ တနင်္ဂနွေနေ့က BJP ပါတီ ထောက်ခံသူတွေကို ပြောကြားတဲ့ မိန့်ခွန်းမှာ မိုဒီက နိုင်ငံသားဥပဒေ ပြင်ဆင်ချက်အတွက် မစိုးရိမ်ကြဖို့ နိုင်ငံသားမွတ်စလင်တွေကို တိုက်တွန်းခဲ့ပါတယ်။

“အမိအိန္ဒိယရဲ့ သားသမီးတွေကနေ ပေါက်ဖွားလာကြတဲ့ မွတ်စလင်တွေအနေနဲ့ စိုးရိမ်စရာ မလိုပါဘူး”

နိုင်ငံအတွင်းမှာရှိနေတဲ့ မွတစ်လင်တွေအားလုံးကို ထိန်းသိမ်းရေးစခန်း ပို့တော့မယ်ဆိုတာ အပါအဝင် ကောလဟာလတွေ ပြန့်နှံ့မှုအတွက် အတိုက်အခံ ကွန်ဂရက်ပါတီကို မိုဒီက အပြစ်တင်ခဲ့ပြီး ပြဿနာကို ပိုမိုကြီးထွားအောင် လုပ်ဆောင်နေတယ်လို့ ဝေဖန်ခဲ့ပါတယ်။

နိုင်ငံသားဥပဒေ ပြင်ဆင်ချက်ဟာ အိန္ဒိယနိုင်ငံရဲ့ ဘာသာရေးမစွက်တဲ့ အခြေခံဥပဒေကို ဆန့်ကျင်ပြဌာန်းမှုဖြစ်တယ်ဆိုတဲ့ ဝေဖန်မှုတွေလည်း ပေါ်ပေါက်လာပါတယ်။ အိန္ဒိယအစိုးရကတော့ ပြင်ဆင်ချက်ဟာ အိမ်နီးချင်းနိုင်ငံမှာ ဖိနှိပ်ချုပ်ချယ်ခံရမှုကြောင့် ထွက်ပြေးလာသူတွေကို‌ ဖေးမဖို့ရည်ရွယ်ပြီး အဲဒီနိုင်ငံတွေမှာ မွတ်စလင်တွေက လူများစုဖြစ်တဲ့အတွက် ဖိနှိပ်မခံရတာကြောင့် ဥပဒေမှာ မထည့်သွင်းခဲ့တာလို့ ရှင်းလင်းခဲ့ပါတယ်။

Ref: AFP