လူမျိုးစုများအပေါ် ကျူးလွန်မှုအတွက် အာဏာရှင်ဟောင်းကို ဆူဒန်စုံစမ်းစစ်ဆေး

ဒီဇင်ဘာ ၂၄၊ ၂၀၁၉
M-Media

-ဒါဖာရ်ဒေက ပဋိပက္ခအတွင်း ကျူးလွန်မှုတွေနဲ့ ပတ်သက်ပြီး အာဏာရှင်ဟောင်း အိုမာရ် အလ်-ဘရှီးရ်နဲ့ အပေါင်းအပါတစ်ချို့ကို စုံစမ်းစစ်ဆေးမှုတွေ စတင်လုပ်ဆောင်နေပြီလို့ ဆူဒန်နိုင်ငံက မနေ့မှာ ကြေငြာလိုက်ပါတယ်။

ဘရှီးရ်အစိုးရနဲ့ လူမျိုးစုလက်နက်ကိုင်တစ်ခုအကြား ၂၀၀၃ ခုနှစ်က စတင်ခဲ့တဲ့ အဲဒီ ပဋိပက္ခကြောင့် လူပေါင်း ၃ သိန်းလောက် သေဆုံးခဲ့ပြီး ၂.၅ သန်းလောက် အိုးအိမ်စွန့်ခွာ ထွက်ပြေးခဲ့ရတယ်လို့ ကုလသမဂ္ဂက ထုတ်ပြန်ခဲ့ပါတယ်။

ဆူဒန်ရှေ့နေချုပ် တာဂီလ်ဆာရ် အလ်-ဟီဘာရ်က ဒါဖာရ်မှာ ကျူးလွန်မှုတွေနဲ့ပတ်သက်ပြီး အာဏာရှင်ဟောင်း ဘရှီးရ်နဲ့ သူ့အစိုးရက တာဝန်ရှိသူတစ်ချို့ကို စုံစမ်းစစ်ဆေးနေတယ်လို့ မနေ့က မြို့တော် ခါတွန်မှာ ပြောကြားခဲ့ပါတယ်။ ထောက်လှမ်းရေးအကြီးအကဲဟောင်း ဆာလာဟ် ဂို့ရှ်လည်း စုံစမ်းစစ်ဆေးခံရသူတွေထဲမှာ ပါဝင်ပါတယ်။

နိုင်ငံတကာ ရာဇဝတ်ခုံရုံး ICC ကလည်း ဘရှီးရ်ကို အလိုရှိနေပြီး လူမျိုးတုန်းသတ်ဖြတ်မှု၊ စစ်ရာဇဝတ်မှု၊ လူသားထုအပေါ် ကျူးလွန်တဲ့ ရာဇဝတ်မှုတွေအတွက် ၂၀၀၉ နဲ့ ၂၀၁၀ ခုနှစ်တွေမှာ ဖမ်းဝရမ်း ထုတ်ထားပါတယ်။

လူထုအုံကြွမှုတွေ ဖြစ်ပေါ်ခဲ့ပြီးတဲ့နောက် အာဏာရှင်ဟောင်း ဘရှီးရ်ရဲ့အစိုးရဟာ အခုနှစ် ဧပြီလမှာ ပြုတ်ကျသွားခဲ့တာဖြစ်ပါတယ်။ အဲဒီနောက်ပိုင်း တက်လာတဲ့ အစိုးရသစ်က ဒါဖာရ်ဒေသ အပါအဝင် ပဋိပက္ခဖြစ်ပွားနေတဲ့ဒေသမှာ ငြိမ်းချမ်းရေးရရှိအောင် လုပ်ဆောင်သွားမယ်လို့ ကတိပြုထားပါတယ်။

ဘရှီးရ်ဟာ လက်ရှိမှာ စွဲချက်ပေါင်းများစွာနဲ့ တရားစွဲဆိုခံထားရပြီး ဒီဇင်ဘာ ၁၄ ရက်‌နေ့က ခြစားမှုစွဲချက်တစ်ခုနဲ့ ထောင်ဒဏ် ၂ နှစ် ချမှတ်ခံခဲ့ရပါတယ်။ ၁၉၈၉ ခုနှစ် အာဏာသိမ်းမှုနဲ့ပတ်သက်လို့လည်း ဘရှီးရ်ဟာ တရားစွဲဆို ခံနေရပါတယ်။

Ref: Aljazeera