လစ်ဗျားကို စစ်တပ်စေလွှတ်မည်ဟု တူရကီသမ္မတပြော

ဒီဇင်ဘာ ၂၆၊ ၂၀၁၉
M-Media

-နိုင်ငံတကာက အသိအမှတ်ပြုထားတဲ့ လစ်ဗျားအစိုးရက တောင်းဆိုလာတာကြောင့် စစ်ရေးအရ‌ ပံ့ပိုးကူညီသွားမယ်လို့ တူရကီသမ္မတ အာဒိုဂန်က ဒီကနေ့မှာ ကြေငြာလိုက်ပြီး စစ်တပ်တွေစေလွှတ်မှု ပါဝင်မှာ ဖြစ်ပါတယ်။

လစ်ဗျားကို တူရကီစစ်တပ်တွေ စေလွှတ်ခွင့်ပြုမယ့် ဥပဒေမူကြမ်းကို ဇန်နဝါရီမှာ တူရကီလွှတ်တော်က အတည်ပြုမှာပါ။

တူနီးရှားနိုင်ငံကို မနေ့က ရုတ်တရက်သွားရောက်ကာ သမ္မတ ကာအစ် စအစ်နဲ့ တွေ့ဆုံပြီးတဲ့နောက် အာဒိုဂန်က ဒီလို ထုတ်ပြန်ကြေငြာလိုက်တာ ဖြစ်ပါတယ်။ ခေါင်းဆောင်နှစ်ဦးဟာ လစ်ဗျားမှာ အပစ်ရပ်နိုင်ရေး၊ လက်နက်ကိုင်ခေါင်းဆောင်တွေကို စားပွဲ၀ိုင်းခေါ်ရေး ကိစ္စတွေကို ဆွေးနွေးခဲ့ကြပါတယ်။

လစ်ဗျားက နိုင်ငံတကာအသိအမှတ်ပြု GNA အစိုးရဟာ ပြီးခဲ့တဲ့လတုန်းက တူရကီအစိုးရ တာဝန်ရှိသူတွေနဲ့တွေ့ဆုံကာ လုံခြုံရေးနဲ့ စစ်ရေးဆိုင်ရာ ပူးပေါင်းဆောင်ရွက်ရေး နားလည်မှုစာချွန်လွှာတွေကို လက်မှတ်ရေးထိုးခဲ့ကြပါတယ်။

GNA အစိုးရက တောင်းဆိုလာရင် စစ်တပ်တွေ လစ်ဗျားကို စေလွှတ်ဖို့ ဆန္ဒရှိတယ်လို့ အာဒိုဂန်က အရင်ကတည်းက ပြောကြားခဲ့ဖူးပါတယ်။

အာဏာရှင်ဟောင်း မွမ်မာ ကဒါဖီ ပြုတ်ကျသွားတဲ့ ၂၀၁၁ ခုနှစ်ကစလို့ ရေနံကြွယ်၀တဲ့ လစ်ဗျားနိုင်ငံမှာ ပြည်တွင်းစစ် စဖြစ်ခဲ့ပြီး ၂၀၁၄ ခုနှစ်မှတော့ နိုင်ငံအရှေ့ပိုင်းနဲ့ အနောက်ပိုင်းတို့မှာ အစိုးရ ၂ ရပ် ပေါ်ပေါက်လာခဲ့ပါတယ်။

နိုင်ငံအရှေ့ပိုင်းကို အုပ်စိုးနေတဲ့ GNA အစိုးရကို နိုင်ငံတကာအသိုင်းအ၀ိုင်းက အသိအမှတ်ပြုထားပါတယ်။ နိုင်ငံအနောက်ပိုင်းကိုတော့ ဘက်ပြောင်း တပ်မှူး ခါလီဖာ ဟက်ဖ်တာရ်ရဲ့ လစ်ဗျားအမျိုးသားစစ်တပ် (LNA) က ထိန်းချုပ်ထားပါတယ်။

Ref: Aljazeera