အိန္ဒိယတွင် ၁၅ မိနစ်တိုင်း အမျိုးသမီး ၁ ဦး အဓမ္မကျင့်ခံနေရ

ဒီဇင်ဘာ ၁၀၊ ၂၀၂၀
M-Media

-အိန္ဒိယနိုင်ငံမှာ ၂၀၁၈ ခုနှစ်အတွင်း ပျမ်းမျှ ၁၅ မိနစ်ကို အမျိုးသမီးတစ်ယောက်နှုန်း အဓမ္မကျင့်ခံနေရတယ်လို့ အစိုးရမှတ်တမ်းတွေအရ သိရပြီး၊ ကမ္ဘာပေါ်မှာ အမျိုးသမီးတွေအပေါ် အဆိုးဝါးဆုံး ပြုမှုတဲ့ နိုင်ငံတစ်နိုင်ငံအဖြစ် ရပ်တည်နေပါတယ်။

ကြာသာပတေးနေ့က အစိုးရရဲ့ ထုတ်ပြန်ချက်မှာ ၂၀၁၈ ခုနှစ်အတွင်း အမျိုးသမီး ၃၄၀၀၀ နီးပါး အဓမ္မပြုကျင့်ခံခဲ့ရပြီး ၂၀၁၇ ခုနှစ်က အရေအတွက်ထက် ကွာဟမှု သိပ်မရှိပါဘူး။ ကျူးလွန်မှုတွေထဲက ၈၅ ရာခိုင်နှုန်းကို တရားစွဲဆိုနိုင်ခဲ့ပြီး ပြစ်ဒဏ်ချမှတ်မှုက ၂၇ ရာခိုင်နှုန်း ရှိပါတယ်။

အိန္ဒိယနိုင်ငံမှာ အမျိုးသမီးတွေအပေါ် ဆိုးဆိုးဝါးဝါး အဓမ္မကျင့် သတ်ဖြတ်မှုတွေဟာ နှစ်အတော်ကြာကတည်းက ရှိခဲ့ပေမယ့် ၂၀၁၂ ခုနှစ် မြို့တော် နယူးဒေလီက ဘတ်စ်ကားတစ်စီးပေါ်မှာ အမျိုးသမီးတစ်ဦး အုပ်စုဖွဲ့ အဓမ္မကျင့် သတ်ဖြတ်ခဲ့ရပြီးတဲ့နောက်ပိုင်း ကမ္ဘာက အိန္ဒိယအပေါ် ပိုမို အာရုံစိုက်လာပါတယ်။

အမျိုးသမီးအခွင့်အရေး အဖွဲ့တွေက အမျိုးသမီးတွေအပေါ် ကျူးလွန်တဲ့ ရာဇဝတ်မှုတွေကို အာဏာပိုင်တွေက သိပ်အလေးမထားဘဲ၊ ရဲတပ်ဖွဲ့ရဲ့ စုံစမ်းစစ်ဆေးမှုတွေကလည်း ထိရောက်မှုမရှိဘူးလို့ ပြောကြားခဲ့ပါတယ်။

၂၀၁၇ ခုနှစ်က အာဏာရ BJP ပါတီအမတ်လောင်း ကူလ်ဒိပ် ဆင်း ဆန်ဂါက ဆယ်ကျော်သက် အမျိုးသမီးတစ်ဦးကို အဓမ္မကျင့်မှုဟာ နိုင်ငံတစ်ဝှမ်းရဲ့ အာရုံစိုက်မှုကို ခံခဲ့ရပါတယ်။ ရဲတပ်ဖွဲ့က ထိထိရောက်ရောက် မကိုင်တွယ်တဲ့အတွက် ကျူးလွန်ခံရသူ အမျိုးသမီးဟာ မိမိကိုယ်ကို သေကြောင်းကြံခဲ့ပါတယ်။

ဆန်ဂါကို ပြီးခဲ့တဲ့ ဒီဇင်ဘာမှာ ပြစ်ဒဏ်ချနိုင်ခဲ့ပေမယ့် အဲဒီမတိုင် ၅ လအလိုမှာ ကျူးလွန်ခံရသူ အမျိုးသမီးနဲ့ မိသားစုဝင်တွေ လိုက်ပါလာတဲ့ ကားကို ကုန်တင်ကားတစ်စီးက ဝင်တိုက်ခဲ့တာကြောင့် မိသားစုဝင် ၂ ဦး သေဆုံးခဲ့ပြီး ကျူးလွန်ခံရသူ အမျိုးသမီးက ဒဏ်ရာ ရရှိခဲ့ပါတယ်။

ရာဇဝတ်မှုတွေကို ကိုင်တွယ်တဲ့ တရားရုံးတွေမှာ တရားသူကြီး လုံလုံလောက်လောက် မရှိတာကြောင့် အမှုတစ်ခုကို ပျမ်းမျှ ၈ လခွဲလောက် အချိန်ယူရပြီး ဒါဟာ ဥပဒေမှာ သတ်မှတ်ထားတဲ့ အချိန်ကာလထက် ၄ ဆလောက် ကြာမြင့်နေတာ ဖြစ်ပါတယ်။

အဓမ္မမကျင့်မှု ခံရသူ တော်တော်များများဟာ ရဲတပ်ဖွဲ့ထံ တိုင်ကြားမှု မရှိတာကြောင့် မနေ့က အိန္ဒိယ ပြည်ထဲရေးဝန်ကြီးဌာနရဲ့ ထုတ်ပြန်ချက်ဟာ မြေပြင်မှာ အမှန်တကယ်ဖြစ်ပွားမှုထက် အများကြီး လျော့နည်းနေတယ်လို့ သုံးသပ်မှုတွေလည်း ရှိနေပါတယ်။

Ref: Reuters