အီရန်၏ တိုက်ခိုက်မှုအတွင်း တပ်ဖွဲ့ဝင်တစ်ချို့ ဒဏ်ရာရဟု အမေရိကန် ထုတ်ပြန်

ဇန်နဝါရီ ၁၇၊ ၂၀၂၀
M-Media

-ဇန်နဝါရီ ၈ ရက်နေ့ အီရတ်ကစစ်စခန်းတွေကို အီရန်ရဲ့တိုက်ခိုက်မှုမှာ တပ်ဖွဲ့ ၁၁ ဦး ဒဏ်ရာရရှိခဲ့တယ်လို့ အမေရိကန်စစ်တပ်က မနေ့မှာ ထုတ်ပြန်လိုက်ပြီး ဒါဟာ အထိအခိုက်မရှိဘူးဆိုတဲ့ ကနဦးထုတ်ပြန်ချက်နဲ့ ကွဲလွဲနေတာဖြစ်ပါတယ်။

ထိပ်တန်းဗိုလ်ချုပ် ကာစင် ဆိုလိုင်မာနီကို အမေရိကန်က လုပ်ကြံမှုကို လက်တုန့်ပြန်တဲ့အနေနဲ့ အီရတ်နိုင်ငံအနောက်ပိုင်းက အိန် အလ်-အာဆတ် လေတပ်စခန်း၊ မြောက်ပိုင်း ကာ့ဒ်ဒေသက စစ်စခန်းတွေကို အီရန်က ဒုံးကျည် အနည်းဆုံး တစ်ဒါဇင်လောက်နဲ့ တိုက်ခိုက်ခဲ့တာ ဖြစ်ပါတယ်။

သမ္မတထရမ့်နဲ့ အမေရိကန်စစ်တပ်တို့က တပ်ဖွဲ့ဝင်တွေ ထိခိုက်ဒဏ်ရာရတာ မရှိဘူးလို့ တိုက်ခိုက်မှုအပြီးမှာ ထုတ်ပြန်ပြောကြားခဲ့ပါတယ်။ အထက်ကအမိန့်ကြောင့် ကန်တပ်ဖွဲ့ဝင် ၁၅၀၀ လောက်ဟာ မြေအောက်ဘန်ကာတွေမှာ ပုန်းခို‌နေခဲ့တာပါ။

မနေ့က အမေရိကန်အလယ်ပိုင်းစစ်ဌာနချုပ်ရဲ့ ထုတ်ပြန်ချက်မှာတော့ တိုက်ခိုက်မှုအတွင်း တပ်ဖွဲ့ဝင်တွေ သေဆုံးတာမျိုး မရှိပေမယ့် တစ်ချို့ ထိခိုက်ဒဏ်ရာရခဲ့တယ်လို့ ပြောရေးဆိုခွင့်ရှိသူ ဗိုလ်ကြီး ဘီလ် အာဘန်က ပြောကြားခဲ့ပါတယ်။

ကြိုတင်ကာကွယ်တဲ့အနေနဲ့ တစ်ချို့တပ်ဖွဲ့ဝင်တွေကို ဂျာမနီနဲ့ ကူဝိတ်တို့မှာရှိတဲ့ အမေရိကန်စစ်စခန်းတွေကို ပို့ဆောင်ကာ စောင့်ကြည့်မှုတွေ လုပ်ဆောင်နေတယ်လို့လည်း သူက ဆိုပါတယ်။

Ref: Aljazeera