တောင်အာဖရိကမှ နာမည်ကျော်မွတ်စလင်တရားဟောဆရာ၏သား လုပ်ကြံခံရ

ဇန်နဝါရီ ၁၈၊ ၂၀၂၀
M-Media

-တောင်အာဖရိကက ကမ္ဘာကျော် မွတ်စလင်တရားဟောဆရာ ရှိခ် အဟ်မဒ် ဒီးဒတ်ရဲ့ သားဖြစ်သူ ယူစွဖ် ဒီးဒတ်ဟာ ဒါဘန်မြို့မှာ သေနတ်နဲ့ပစ်ခံရပြီး ကွယ်လွန်သွားခဲ့ပါတယ်။

အသက် ၆၅ နှစ်အရွယ် ယူစွဖ်ဟာ ဗုဒ္ဓဟူးနေ့က ဇနီးဖြစ်သူနဲ့အတူ မိသားစုတရားရုံးကို သွားရောက်စဉ်မှာ အမည်မသိသူ တစ်ဦးရဲ့ သေနတ်နဲ့ပစ်ခတ်မှုကို ခံခဲ့ရတာပါ။ ဦးခေါင်းမှာရရှိခဲ့တဲ့ဒဏ်ရာကြောင့် ဆေးရုံကို ပို့ဆောင်ကုသခဲ့ပေမယ့် သောကြာနေ့မှာတော့ ကွယ်လွန်သွားခဲ့ပါတယ်။

ယူစွဖ်ဟာ ဒါဘန်မြို့မှာ ထင်ရှားတဲ့ တက်ကြွလှုပ်ရှားသူ၊ ပရဟိတသမားတစ်ဦး ဖြစ်ပါတယ်။ ဘာ့ကြောင့် ဒီလို လုပ်ကြံခံရလဲဆိုတာ မသိရသေးဘဲ သေနတ်သမားကိုလည်း ဖမ်းမိခြင်း မရှိသေးပါဘူး။ ယူစွဖ်ရဲ့ ဈာပနအခမ်းအနားကို တနင်္ဂနွေနေ့မှာ ပြုလုပ်ဖို့ ရှိနေပါတယ်။။

ဒါဘန်မြို့ဆင်ခြေဖုံးက အီမာမ် ဟူစိန်ဗလီရဲ့ ဂေါပကဥက္ကဌ အဇစ် ဒီးဒတ်က ယူစွဖ်ဟာ ဗလီဝတ်ကျောင်းတော်အတွက် လိုအပ်တဲ့အချိန် အမြဲတမ်းကူညီပေးခဲ့သူဖြစ်ပြီး အခုလို ကွယ်လွန်သွားတဲ့အတွက် ဝမ်းနည်း တုန်လှုပ်မိတယ်လို့ ပြောကြားခဲ့ပါတယ်။

ဖခင်ဖြစ်သူ အဟ်မဒ် ဒီးဒတ်ဟာ တောင်အာဖရိကက ထင်ရှားတဲ့ မွတ်စလင်တရားဟောဆရာဖြစ်ပြီး၊ ဘာသာပေါင်းစုံ ချစ်ကြည်ညီညွတ်ရေးကို စိတ်နှစ်လုပ်ဆောင်ခဲ့သူ ဖြစ်ပါတယ်။ ကမ္ဘာတစ်ဝှမ်းက ထင်ရှားကျော်ကြားသူတွေနဲ့ ကောင်းမွန်တဲ့ ဆက်ဆံရေးရှိသလို အစ္စလာမ်၊ ခရစ်ယာသာသနာတို့နဲ့ပတ်သက်ပြီး စာအုပ်စာတမ်းပေါင်းများစွာကို ရေးသားခဲ့ပါတယ်။

အစ္စလာမ်သာသနာကို ကမ္ဘာတစ်ဝှမ်းက နားလည်သဘောပေါက်နိုင်ရေးအတွက် သာသနာပြုစင်တာ Islamic Propagation Centre International တစ်ခုကိုလည်း အဟ်မဒ် ဒီးဒတ်က တည်ထောင်ခဲ့ပါတယ်။

Ref: Aljazeera