အိန္ဒိယနိုင်ငံ မြို့တော်ဒေလီတွင် မွတ်စလင်များ အကြမ်းဖက်တိုက်ခိုက်ခံရ၊ အနည်းဆုံး လူ ၂၀ သေဆုံး

ဖေဖော်ဝါရီ ၂၆၊ ၂၀၂၀၂
M-Media

-အိန္ဒိယနိုင်ငံမြို့တော် နယူးဒေလီမှာ မွတ်စလင်တွေဟာ ဟိန္ဒူလူအုပ်ရဲ့ အကြမ်းဖက်တိုက်ခိုက်မှုကို ခံခဲ့ရတာကြောင့် အနည်းဆုံး လူ ၂၀ သေဆုံးပြီး ဗလီတွေ၊ နေအိမ်တွေ၊ စီးပွားရေးလုပ်ငန်းတွေလည်း မီးရှို့ဖျက်ဆီးခံခဲ့ရပါတယ်။

နိုင်ငံသားဥပဒေ ပြင်ဆင်ချက်အသစ်ကို ဆန့်ကျင်တဲ့ ဒေလီက ထိုင်သပိတ်ကို ဟိန္ဒူလူအုပ်က ပြီးခဲ့တဲ့ ၃ ရက်အရင်မှာ စတင်တိုက်ခိုက်ခဲ့ပြီးတဲ့နောက်ပိုင်းကစလို့ ဒေလီမှာရှိတဲ့ မွတ်စလင်ရပ်ကွက်တွေ ဆက်တိုက် အကြမ်းဖက် တိုက်ခိုက်ခံလာရတာ ဖြစ်ပါတယ်။

ဟိန္ဒူလူအုပ်ဟာ အာရှိုခ့်နာဂါက ဗလီဝတ်ကျောင်းတော်တစ်လုံး မီးရှို့ခဲပြီးတဲ့ ရာမနတ်ဘုရားကို ပူဇော်တဲ့ ဘုရားစာ ရွတ်ဖတ်အောင်ပွဲခံခဲ့ကြတာကို ဆိုရှယ်မီဒီယာမှာ ပြန့်နှံ့လာတဲ့ ဗီဒီယိုမှာ တွေ့မြင်ခဲ့ရပါတယ်။ ဒေလီမြို့ အရှေ့မြောက်ဖက်မှာ ဟိန္ဒူလူအုပ်ဟာ တုတ်တွေ၊ သံပိုက်တွေ၊ ခဲလုံးတွေကိုင်ကာ မွတ်စလင်ရပ်ကွက်တွေကို လိုက်လံ တိုက်ခိုက်ခဲ့ပြီး အဆောက်အဦးတွေကို ဖျက်ဆီးတာ မီးရှို့တာတွေလည်း လုပ်ဆောင်ခဲ့ပါတယ်။

တိုက်ခိုက်မှုတွေကြောင့် သေဆုံးသူ အနည်းဆုံး ၂၀ လောက်ရှိပြီး၊ ဒဏ်ရာရသူက ၁၅၀ လောက် ရှိတယ်လို့ ဒေလီမြို့ ကျန်းမာရေးအာဏာပိုင်တွေနဲ့ ရဲတပ်ဖွဲ့က သတင်းထုတ်‌ပြန်ပါတယ်။ ဒဏ်ရာရသူတွေထဲမှာ သေနတ်နဲ့ ပစ်ခံရတာတွေလည်း ပါဝင်တယ်လို့ ဆိုပါတယ်။

ဒေလီရဲတပ်ဖွဲ့ဟာ အခြေအနေကို ထိန်းသိမ်းဖို့ ကြိုးစားပေမယ့် တစ်ချို့နေရာတွေမှာ ရဲတပ်ဖွဲ့ဝင်တွေကိုယ်တိုင်က ဟိန္ဒူလူအုပ်ကို ကူညီပေးနေတယ်လို့ မျက်မြင်သက်သေအချို့က ပြောကြားခဲ့ပါတယ်။ ရဲကားတွေ၊ မီးသတ်ကားတွေ မီးရှို့ဖျက်ဆီးခံရတာလည်း ရှိနေပြီး သေဆုံးသူတွေထဲမှာ အနည်းဆုံး ရဲတပ်ဖွဲ့ဝင်တစ်ဦး ပါဝင်ပါတယ်။

မတည်မ‌ငြိမ်ဖြစ်ရာဒေသတွေမှာ ကျောင်းတွေနဲ့ အများပြည်သူ သယ်ယူပို့ဆောင်ရေး ဝန်ဆောင်မှုတွေကိုလည်း ပိတ်ထားပါတယ်။ ဒေလီဝန်ကြီးချုပ် အာရ်ဗင်ဒ် ကက်ဂျ်ရီဝဲလ်က တည်တည်ငြိမ်ငြိမ်ရှိကြဖို့ ပြည်သူတွေကို တိုက်တွန်းခဲ့ပါတယ်။

Ref: Aljazeera