ရုရှားနှင့် တူရကီတို့ ဆီးရီးယားတွင် စစ်ရာဇဝတ်မှု ကျူးလွန်ဖွယ်ရှိဟု ကုလထုတ်ပြန်

မတ် ၃၊ ၂၀၂၀
M-Media

-ဆီးရီးယားစစ်ပွဲမှာ ပါဝင်နေတဲ့ ရုရှားနဲ့ တူရကီတို့ဟာ အရပ်သားတွေကိုအပေါ် ပစ်မှတ်ထားတိုက်ခိုက်​မှုတွေ ရှိတဲ့အတွက် စစ်ရာဇဝတ်မှု ကျူးလွန်တာမျိုး ရှိနိုင်တယ်လို့ ကုလ စုံစမ်းစစ်ဆေးရေးမှူးတွေက မနေ့မှာ အစီရင်ခံစာတစ်စောင် ထုတ်ပြန်လိုက်ပါတယ်။

ရုရှားဟာ အာဆတ်အစိုးရရဲ့ အဓိက မဟာမိတ်ဖြစ်ပြီး တူရကီက သူပုန်တွေဖက်ကနေ ဝင်ရောက် တိုက်ခိုက်ပေးနေတာ ဖြစ်ပါတယ်။

ပြီးခဲ့တဲ့ ဇူလိုင်လနဲ့ ဩဂုတ်လတွေမှာ သူပုန်တွေထိန်းချုပ်ထားရာ ဒေသက လူစည်ကားရာ စျေးတစ်ခုနဲ့ စစ်ရှောင်စခန်းတစ်ခုတို့ကို ရုရှားက လေကြောင်းကနေ တိုက်ခိုက်ခဲ့ပြီး အရပ်သားအများအပြား သေဆုံးခဲ့တာကို ကုလရဲ့ အခုအစီရင်ခံစာမှာ ဖော်ပြထားပါတယ်။

“ဒီအဖြစ်အပျက် ၂ ခုစလုံးမှာ ရုရှားဟာ စစ်ဖက်ပစ်မှတ်ကို တိုက်ရိုက်တိုက်ခိုက်တာမျိုး မရှိပါဘူး။ အရပ်သားဧရိယာမှာ စစ်သား၊ အရပ်သား မခွဲခြားဘဲ တိုက်ခိုက်ခဲ့တာဟာ စစ်ရာဇဝတ်မှုမြောက်ပါတယ်” လို့ အစီရင်ခံစာက ဆိုပါတယ်။

တူရကီနဲ့ မဟာမိတ်ဖွဲ့ထားတဲ့ ဆီးရီးယားသူပုန်တွေ ကာ့ဒ်ဒေသအတွင်း တိုက်ခိုက်တဲ့အချိန်မှာ ကျူးလွန်မှုတွေရှိခဲ့ပြီး အဲဒီတပ်ဖွဲ့တွေသာ တူရကီတပ်မှူးတွေရဲ့ ထိန်းချုပ်မှုအောက်မှာရှိခဲ့တယ်ဆိုရင် တူရကီကလည်း စစ်ရာဇဝတ်မှု ကျူးလွန်မှုမှာ ပါဝင်မယ်လို့ ကုလ စုံစမ်းစစ်ဆေးရေးမှူးတွေက ထည့်သွင်းပြောကြားခဲ့ပါတယ်။

စုံစမ်းစစ်ဆေးရေးကော်မရှင် ဥက္ကဌ ပေါ်လို ပင်ဟီရိုက ၉ နှစ်တာကြာမြင့်နေပြီဖြစ်တဲ့ ဆီးရီးယားပြည်တွင်းစစ်မှာ ကျူးလွန်မှုတွေကို အရေးယူဖို့ ကမ္ဘာတစ်ဝှမ်း တရားရေးတာဝန်ရှိသူ ၂၀၀ လောက်ရဲ့ တောင်းဆိုမှုကို ရရှိထားပြီး ကျူးလွန်တယ်လို့ သံသယရှိတဲ့ သူတွေစာရင်းကို ပြုစုထားကြောင်း၊ ဒီစာရင်းဟာ လျှို့ဝှက်စာရင်းဖြစ်ပြီး မကြာသေးခင်က ကိစ္စတွေမှာ ပါဝင်ပတ်သက်ခဲ့သူတွေကိုပါ ပေါင်းထည့်ထားကြောင်း ထည့်သွင်းပြောကြားခဲ့ပါတယ်။

၂၀၁၉ ခုနှစ် ဇူလိုင်လကနေ ၂၀၂၀ ခုနှစ် ဖေဖော်ဝါရီလအထိ အဖြစ်အပျက်တွေကို မှတ်တမ်းတင်ထားတဲ့ အခုအစီရင်ခံစာမှာ ​ဆေးရုံတွေ၊ ကျောင်းတွေလို့ အရပ်သားနေရာတွေကို ဆီးရီးယားအစိုးရနဲ့ မဟာမိတ်တပ်ဖွဲ့တွေက တမင်ပစ်မှတ်ထားတိုက်ခိုက်တာတွေကိုလည်း ရှုတ်ချထားပါတယ်။

Ref : Aljazeera