အာဖရိကတွင် ၆ လအတွင်း လူသန်းချီ ကိုဗစ်ကူးနိုင်ဟု WHO သတိပေး

ဧပြီ ၁၉၊ ၂၀၂၀
M-Media

-အာဖရိကတိုက်မှာ ကိုရိုနာဗိုင်းရပ်စ် ကူးစက်သူ အရေအတွက်ဟာ ၆ လအတွင်း သန်းချီ ဖြစ်လာနိုင်တယ်လို့ ကမ္ဘာ့ကျန်းမာရေးအဖွဲ့ WHO က သတိပေးလိုက်ပါတယ်။

လက်ရှိ အာဖရိက တစ်တိုက်လုံးမှာ ကူးစက်သူ ၁၇၀၀၀ ကျော်နဲ့ သေဆုံးသူ ၉၀၀ လောက်သာ ရှိသေးတဲ့အတွက် အခြားဒေသတွေနဲ့ယှဉ်ရင် အလွန်အမင်း နည်းပါးနေတာ ဖြစ်ပါတယ်။ ဒါပေမယ့် ကမ္ဘာ့အဆင်းရဲဆုံးတိုက်ဖြစ်ပြီး ကောင်းမွန်တဲ့ ကျန်းမာရေးစနစ်တွေ မရှိတဲ့အတွက် ကူးစက်သူ အလွန်အမင်း များလာနိုင်တယ်ဆိုတဲ့ စိုးရိမ်မှုတွေ ရှိနေပါတယ်။

“ဗိုင်းရပ်တွေဟာ နိုင်ငံတွေအလိုက် ဆက်လက် ကူးစက်ပြန့်နှံ့သွားမှာကို ကျွန်တော်တို့ စိုးရိမ်ပါတယ်။ ကူးစက်သူ အရေအတွက်ဟာ တစ်နေ့တစ်ခြား တိုးလာပါတယ်” လို့ WHO အာဖရိကဒေသ ဒါရိုက်တာ မက်ရှီဒီဆို မိုတီက ပြောကြားခဲ့ပါတယ်။

လန်ဒန်မြို့ Imperial ကောလိပ်ရဲ့ ခန့်မှန်းတွက်ချက်မှုမှာတော့ အာဖရိကမှာ Covid-19 ကူးစက်မှုကို အကောင်းဆုံး တုန့်ပြန်နိုင်ရင်တောင် လူ ၃ သိန်းလောက် သေဆုံးနိုင်ခြေရှိပြီး အဆိုးဆုံးအခြေအနေမှာ လူ ၃.၃ သန်းလောက် သေဆုံးကာ သန်း ၁၂၀၀ လောက် ကူးစက်နိုင်တယ်လို့ ဆိုပါတယ်။

အာဖရိကတိုက်အတွင်း ကူးစက်မှုအများဆုံးဖြစ်တဲ့ တောင်အာဖရိကနိုင်ငံမှာ တိုင်းပြည်ကို တံခါးပိတ်ကာ ရွေ့လျားသွားလာမှု ကန့်သတ်ထားတာကြောင့် ကူးစက်မှုအရေအတွက် ကျဆင်းနေပေမယ့် ဘာကီနာဖာဆို၊ ကွန်ဂို၊ အလ်ဂျီရီးယားတို့လို အခြား အာဖရိက နိုင်ငံတွေမှာတော့ ကူးစက်မှု၊ ပျမ်းမျှသေဆုံးမှုအရေအတွက်တွေဟာ မြင့်မားနေပါတယ်။

Ref: Aljazeera