Covid-19 ကြောင့် ဂျပန်ကျန်းမာရေးစနစ် ပြိုလဲနိုင်ဟု ပညာရှင်များ သတိပေး

ဧပြီ ၁၉၊ ၂၀၂၀
M-Media

-Covid-19 ကူးစက်သူအရေအတွက် မြင့်တက်လာရင် တိုင်းပြည်ရဲ့ ကျန်းမာရေးစနစ် ပြိုလဲနိုင်တယ်လို့ ဂျပန် ဆရာဝန်တွေက အစိုးရကို သတိပေးလိုက်ပါတယ်။

တရုတ်နိုင်ငံအပြင်ဘက်မှာ ဒုတိယမြောက် အစောဆုံးကူးစက်ခဲ့တဲ့ ဂျပန်နိုင်ငံဟာ ပြန့်ပွားမှုကို ထိန်းချုပ်နိုင်တော့မယ်လို့ အစောပိုင်းမှာ ထင်ခဲ့ရပေမယ့် နောက်ပိုင်းမှာ ကူးစက်မှု ပြန်လာပြီး အခုဆိုရင် ကူးစက်သူ တစ်သောင်းကျော်လာပြီ ဖြစ်ပါတယ်။ သေဆုံးသူက ၂၀၀ ကျော်ရှိလာပြီး မြို့တော်တိုကျိုဟာ ဗိုင်းရပ်စ်ဒဏ်ကို အဆိုးဝါးဆုံးခံရတဲ့နေရာ ဖြစ်ပါတယ်။

ကူးစက်သူ မြင့်တက်လာတာနဲ့အမျှ ဆေးရုံတွေက လက်ခံကုသမပေးနိုင်တာတွေ ဖြစ်ပေါ်နေပြီး ကိုဗစ်သံသယလူနာတစ်ဦးကိုဆိုရင် ဆေးရုံ ၈၀ လောက်က ငြင်းပယ်မှုကို ခံခဲ့ရပါတယ်။

ဂျပန်ဆရာဝန်များအသင်းက ကျန်းမာရေးဝန်ထမ်းတွေအားလုံး လာရောက်ကူညီပေးဖို့လိုအပ်ပြီး ဒီလိုမှမဟုတ်ရင် ကျန်းမာရေးစနစ် ပြိုလဲသွားမယ်လို့ မနေ့မှာ သတိပေးခဲ့ပါတယ်။

အခြား ဆေးဘက်ဆိုင်ရာ အသင်း ၂ ခုကလည်း ကိုရိုနာဗိုင်းရပ်စ်ကူးစက်သူ မြင့်တက်လာတာနဲ့အမျှ ဆေးရုံတွေရဲ့ ကုသနိုင်စွမ်းကလည်း ကျဆင်းလာတယ်လို့ ထောက်ပြခဲ့ပါတယ်။ ဆေးဘက်ဆိုင်ရာဝန်ထမ်းတွေမှာ ကာကွယ်ရေးဝတ်စုံတွေ လုံလုံလောက်လောက်မရှိတာလို လိုအပ်ချက်တွေလည်း ရှိနေပါတယ်။

ဝန်ကြီးချုပ် ရှင်ဇိုအာဘေးအစိုးရရဲ့ ကိုဗစ်တားဆီးနှိမ်နှင်းရေး ပေါ်လစီတွေကို နိုင်ငံအတွင်းမှာ ဝေဖန်မှု မြင့်တက်နေပါတယ်။

Ref: BBC