ကိုဗစ်ကိစ္စ သတင်းမှားဖြန့်သူကို ယူအေအီး ဒဏ်တပ်မည်

ဧပြီ ၁၉၊ ၂၀၂၀
M-Media

-နိုင်ငံအတွင်း Covid-19 ကပ်ရောဂါနဲ့ပတ်သက်တဲ့ သတင်းမှားတွေ ဖြန့်ဝေသူကို ဒီရ်ဟမ် ၂ သောင်း (ဒေါ်လာ ၅၅၀၀) ရိုက်မယ်လို့ အာရပ်စော်ဘွားများပြည်ထောင်စု (ယူအေအီး) နိုင်ငံက မနေ့မှာ ကြေငြာလိုက်ပါတယ်။

ယူအေအီးမှာ လက်ရှိအချိန်အထိ ကူးစက်သူ ၆၃၀၀ ကျော်နဲ့ သေဆုံးသူ ၃၇ ဦး ရှိနေပါတယ်။

ဆိုရှယ်မီဒီယာမှာ ဗိုင်းရပ်စ်ပြန့်နှံ့မှု၊ ကုသမှုတွေနဲ့ပတ်သက်တဲ့ သတင်းမှားတွေလည်း ပြန့်နှံ့နေပြီး ယူအေအီးအစိုးရရဲ့ မနေ့က ကြေငြာချက်ဟာ ဒါတွေကို ထိန်းသိမ်းဖို့ ဖြစ်ပါတယ်။

ကိုဗစ်နဲ့ပတ်သက်တဲ့ သတင်းတွေကို ကျန်းမာရေး၀န်ကြီးဌာနတစ်ခုတည်းကသာ ထုတ်ပြန်သွားမှာဖြစ်ပြီး အဲဒီအချက်အလက်တွေနဲ့ ကွဲလွဲတဲ့ သတင်းတွေ၊ သတင်းမှားတွေ၊ တရားဝင်ထုတ်ပြန်ထားခြင်းမရှိတဲ့ သတင်းတွေကို ပုံနှိပ်ဗားရှင်း၊ အသံဗားရှင်း၊ အီလက်ထရောနစ်ဗားရှင်း ဘယ်လို ပုံစံနဲ့မဆို ဖြန့်ချီတာကို တားမြစ်တယ်လို့ ကြေငြာချက်မှာ ဖော်ပြထားပါတယ်။

ဒါပေမယ့် ဒီတားမြစ်ချက်ဟာ သတင်းသမားတွေ၊ မီဒီယာသမားတွေအပေါ်မှာ အကျုံးဝင်လားဆိုတာ အသေးစိတ် ဖော်ပြထားခြင်း မရှိပါဘူး။

Ref: Aljazeera