အိန္ဒိယတွင် လူအုပ်စုလိုက် ရထားကြိတ်ခံရ၊ ၁၄ ဦး သေဆုံး

မေ ၈၊ ၂၀၂၀
M-Media

-ရထားလမ်းပေါ်မှာ အိပ်နေသူတွေကို ရထားက တက်ကြိတ်မှုတစ်ခု အိန္ဒိယနိုင်ငံမှာ ဖြစ်ပွားခဲ့ပြီး အနည်းဆုံး လူ ၁၄ ဦး သေဆုံးခဲ့တယ်လို့ သိရပါတယ်။

ကိုရိုနာဗိုင်းရပ်စ် ပြန့်နှံမှုကြောင့် ဧပြီလစောပိုင်းက တိုင်းပြည်ကို တံခါးပိတ်ကာ ရွေ့လျားသွားလာမှု ကန့်သတ်မိန့် ထုတ်ပြန်ခဲ့ပြီးတဲ့နောက် အိန္ဒိယနိုင်ငံ မြို့ကြီးတွေက သိန်းနဲ့ချီတဲ့လူတွေဟာ အလုပ်အကိုင်တွေ ဆုံးရှုံးခဲ့ပြီး အုပ်စုလိုက် နေရပ်ပြန်တာတွေ ဖြစ်လာခဲ့ပါတယ်။

အများသုံး သယ်ယူပို့ဆောင်မှုစနစ်ကို ရပ်ဆိုင်းထားတာကြောင့် လူအများစုဟာ လမ်းလျှောက် ပြန်ကြရတာ ဖြစ်ပါတယ်။

ဒီကနေ့မနက် ရထားကြိတ်မှုဟာ နိုင်ငံအနောက်ပိုင်း မဟာရက်ရှ်ထရာ ပြည်နယ်မှာ ဖြစ်ပွားခဲ့တာပါ။ စတီးစက်ရုံတစ်ခုမှာ အလုပ်လုပ်နေတဲ့ အလုပ်သမားတွေဟာ အိမ်နီးချင်း မဒ်ယာပရာဒက်ရှ်ပြည်နယ်က ရွာတစ်ရွာကို လမ်းလျှောက်ပြန်လာခဲ့ပြီး ညဖက် ရထားလမ်းပေါ်မှာ အိပ်နေစဉ် ကုန်တင်ရထား ကြိတ်မိခဲ့တာ ဖြစ်ပါတယ်။

ဒီအဖြစ်အပျက်တွင်း အနည်းဆုံး ၁၄ ဦး သေဆုံးခဲ့ပြီး၊ ၅ ဦး ဒဏ်ရာရခဲ့ပါတယ်။ အိန္ဒိယ ရထားပို့ဆောင်ရေး ဝန်ကြီးဌာနကတော့ ဒီအဖြစ်အပျက်အတွက် စုံစမ်းစစ်ဆေးမှု ပြုလုပ်ဖို့ အမိန့်ပေးခဲ့တယ်လို့ ထုတ်ပြန်ခဲ့ပါတယ်။

ဝန်ကြီးချုပ် နရန်ဒရာ မိုဒီက လူ့အသက်တွေ ဆုံးရှုံးရမှုအတွက် အလွန်ဝမ်းနည်းမိကြောင်း ပြောကြားခဲ့ပြီး လိုအပ်တဲ့ ကူညီထောက်ပံ့မှုတွေအားလုံး ဆောင်ရွက်ပေးသွားမယ်လို့ Twitter စာမျက်နှာမှာ ရေးသားခဲ့ပါတယ်။

Ref: Aljazeera