မြန်မာပါဝင်သည့် ၉ နိုင်ငံ အာကာသစီမံကိန်း သဘာ၀ပတ်ဝန်းကျင် ထိန်းသိမ်းရန် ရည်ရွယ်

ဇူလိုင် ၂၅၊ ၂၀၂၀
M-Media

-အရှေ့တောင်အာရှ နိုင်ငံတွေ ပူးပေါင်းထားတဲ့ အာကာသစီမံကိန်းတစ်ခုမှာ ပါဝင်နေတဲ့ မြန်မာနိုင်ငံဟာ လာမယ့်နှစ်မှာ ပထမဆုံး ဂြိုဟ်တု လွှတ်တင်နိုင်ဖို့ စီစဉ်နေပါတယ်။

စီမံကိန်းမှာ မလေးရှား၊ ထိုင်း၊ ဘင်္ဂလားဒေ့ရှ်၊ မွန်ဂိုလီးယား၊ ဖိလစ်ပိုင်၊ ဗီယက်နမ်၊ အင်ဒိုနီးရှား၊ မြန်မာအပါအဝင် အာရှနိုင်ငံ ၉ နိုင်ငံ ပါဝင်မှာပါ။

စီမံကိန်းကနေ မုန်တိုင်း၊ မြေငလျင်နဲ့ ပင်လယ်ရေစီးကြောင်းတွေကို ခြေရာခံနိုင်မှာဖြစ်ပြီး၊ မြေယာအသုံးပြုမှု၊ သစ်တောပြုန်းတီးမှု၊ မြို့ပြ အကောင်အထည်ဖော်မှု၊ တရားမဝင် သစ်ခုတ်မှု၊ သတ္ထုတွင်းတူးဖော်မှုနဲ့ သဘာ၀ဘေးအန္တရာယ်ဆိုင်ရာ အချက်အလက်တွေကို အချိန်နဲ့တစ်ပြေးညီ သိရှိနိုင်မှာ ဖြစ်ပါတယ်။

မိတ္ထီလာ လေကြောင်းနှင့် အာကာသပညာတက္ကသိုလ် ပါမောက္ခချုပ် ဒေါက်တာကြည်သွင်က ဂြိုဟ်တုတွေကို ကိုယ်တိုင်တည်ဆောက်နိုင်ရင် အကုန်အကျ သက်သာမှာဖြစ်ပြီး အခုစီမံကိန်းက မြန်မာနိုင်ငံရဲ့ စီးပွားရေးကို ခုန်ပျံကျော်လွှား တိုးတက်စေလိမ့်မယ်လို့ ပြောကြားခဲ့ပါတယ်။

စီမံကိန်းအရ တစ်နှစ်ကို ဂြိုဟ်တုငယ် ၅ လုံးနဲ့ အလုံး ၅၀ အထိ လွှတ်တင်သွားမှာ ဖြစ်ပါတယ်။ ကန်ဒေါ်လာ သန်း ၁၀၀ ကျော်လောက်ကုန်ကျမှာဖြစ်ပြီး မြန်မာနိုင်ငံက ကနဦးအနေနဲ့ ဒေါ်လာ ၁၆ သန်း ထည့်ဝင်ထားပါတယ်။

ဂြိုဟ်တုတွေကို နိုင်ငံရပ်ခြားကနေ လွှတ်တင်မှာဖြစ်ပြီး ဂျပန်ရဲ့အကူအညီနဲ့ မြန်မာနိုင်ငံမှာ ထိန်းချုပ်စင်တာတစ်ခု ထားရှိမှာ ဖြစ်ပါတယ်။

စီမံကိန်းအတွက် မြန်မာနိုင်ငံက ပညာရှင် ၇ ဦး ဂျပန်နိုင်ငံကို သွားရောက်ဖို့ စီစဉ်ထားပေမယ့် ကိုဗစ်ပြန့်နှံ့မှုကြောင့် ဒီအစီအစဉ်ကို ရပ်ဆိုင်းထားရပါတယ်။ မြန်မာနိုင်ငံဟာ ၂၀၂၁ ခုနှစ် အစောပိုင်းမှာ ဂြိုဟ်တုလွှတ်တင်နိုင်ဖို့ ရည်မှန်းထားပါတယ်။

Ref: Frontier Myanmar