သာသနာညှိုးနွမ်းစေမှုဖြင့် မွတ်စလင်တစ်ဦးကို အင်ဒိုနီးရှား ထောင်ချ

ဩဂုတ် ၉၊ ၂၀၂၀
M-Media

-ကုရ်အာကျမ်းစာကို အဂါရ၀ပြုခဲ့တဲ့ အစ္စလာမ်ဘာသာဝင်တစ်ဦးကို အင်ဒိုနီးရှားက ထောင်ဒဏ် ၃ နှစ် ချမှတ်လိုက်ပါတယ်။

ထောင်ဒဏ်ချမှတ်ခံရသူဟာ အသက် ၄၄ နှစ်အရွယ် ဒိုနီ အီရာဝမ် မလေးဆိုသူဖြစ်ပြီး မြောက်ဆူမားတြားပြည်နယ် မီဒန်မြို့က ဗလီတစ်လုံးမှာ ကုရ်အာန်ကျမ်းစာတွေကို ဆုတ်ဖြဲလွှတ်ပစ်ခဲ့သူပါ။ အခုနှစ်အစောပိုင်းက ဖြစ်ပွားခဲ့တဲ့ အဲဒီအဖြစ်အပျက်မှာ မလေးကို ပြည်သူတွေက ဝိုင်းဖမ်းကာ ရဲလက်အပ်ခဲ့ပြီးတဲ့နောက် သာသနာညှိုးနွမ်းစေမှုနဲ့ တရားစွဲဆိုခဲ့ပါတယ်။

အင်္ဂါနေ့အမိန့်ချမှတ်မှုမှာ တရားသူကြီးက မလေးဟာ အစ္စလာမ်သာသနာကို စော်ကားခဲ့တဲ့အတွက် သာသနာညှိုးနွမ်းစေမှုနဲ့ အပြစ်ရှိကြောင်း တွေ့ခဲ့ရတယ်လို့ ပြောကြားခဲ့ပါတယ်။ အစိုးရရှေ့နေတွေက အမြင့်ဆုံးထောင်ဒဏ် ၄ နှစ်အထိ ချမှတ်ပေးဖို့ တောင်းဆိုခဲ့ပြီး တရားရုံးက ၃ နှစ် ချမှတ်ခဲ့ပါတယ်။

အစ္စလာမ်ဘာသာဝင်အများစုရှိတဲ့ အင်ဒိုနီးရှားနိုင်ငံမှာ သာသနာ ညှိုနွမ်းစေမှု ဥပဒေကို အလွဲသုံးစားလုပ်ပြီး ခရစ်ယာန်တွေ၊ ဗုဒ္ဓဘာသာဝင်တွေအပေါ် တရားစွဲဆိုမှုတွေ ရှိနေတယ်လို့ လူ့အခွင့်အရေး လှုပ်ရှားသူတွေက ဝေဖန်ထားပါတယ်။

အာဇန်နိဗ္ဗာန်ဆော်သံကို စော်ကားပြောဆိုတဲ့ တရုတ်လူမျိုး ဗုဒ္ဓဘာသာဝင်တစ်ဦးကို အင်ဒိုနီးရှားက ပြီးခဲ့တဲ့နှစ်မှာ ၁၈ လ ထောင်ချခဲ့ပြီး၊ ဂျကာတာမြို့ရဲ့ မြို့တော်ဝန်ဟောင်း တရုတ်လူမျိုး၊ ခရစ်ယာန်ဘာသာဝင်တစ်ဦးလည်း ၂၀၁၇ ခုနှစ်မှာ သာသနာ ညှိုးနွမ်းစေမှု ပုဒ်မနဲ့ ထောင် ၂ နှစ်ချမှတ်ခံခဲ့ရပါတယ်။

အင်ဒိုနီးရှားမှာ သမိုင်းနဲ့ချီရှိခဲ့တဲ့ အလယ်အလတ် အစ္စလာမ်သာသနာဟာ အစွန်းရောက်တွေရဲ့ လွှမ်းမိုးမှုကို ခံနေရပြီဆိုတဲ့ ထောက်ပြမှုတွေလည်း ရှိလာပါတယ်။

Ref: CNA