ကာကွယ်ဆေးထုတ်နိုင်စွမ်းကို လူသားထုအတွက် အသုံးပြု ကူညီမည်ဟု အိန္ဒိယကတိပြု

စက်တင်ဘာ ၂၇၊ ၂၀၂၀
M-Media

-အိန္ဒိယနိုင်ငံရဲ့ ကာကွယ်ဆေးထုတ်လုပ်နိုင်မှုနဲ့ ပို့ဆောင်ပေးနိုင်မှု လုပ်နိုင်စွမ်းကို ကိုဗစ်တိုက်ဖျက်ရေးမှာ တစ်ကမ္ဘာလုံးအတွက် အသုံးပြုသွားမယ်လို့ ဝန်ကြီးချုပ် နရန်ဒရာမိုဒီက ကုလမိန့်ခွန်းမှာ ထည့်သွင်းပြောကြားခဲ့ပါတယ်။

“ကမ္ဘာ့အကြီးဆုံး ကာကွယ်ဆေးထုတ်လုပ်တဲ့နိုင်ငံတစ်ခုအနေနနဲ့ ကမ္ဘာ့အသိုင်းအဝိုင်းကို အာမခံချက်တစ်ခု ဒီကနေ့ ကျွန်တော် ပေးချင်ပါတယ်။ အိန္ဒိယနိုင်ငံရဲ့ ကာကွယ်ဆေးထုတ်လုပ်မှုနဲ့ ပိုဆောင်မှု လုပ်နိုင်စွမ်းကို ဒီကပ်ရောဂါ တိုက်ဖျက်နေတဲ့ လူသားအားလုံးအတွက် အသုံးပြုသွားမှာ ဖြစ်ပါတယ်”

အိန္ဒိယဟာ ကမ္ဘာပေါ်မှာ ကိုဗစ်ကပ်ရောဂါဒဏ်ကို တတိယမြောက် အဆိုးရွားဆုံး ခံစားနေရတဲ့ နိုင်ငံဖြစ်ပြီး ကူးစက်သူ ၅.၉ သန်း၊ သေဆုံးသူ ၉၃၀၀၀ ကျော် ရှိနေပါတယ်။

မိုဒီက အိန္ဒိယဟာ ကာကွယ်ဆေး အဆင့် ၃ စမ်းသပ်မှုကို ပြုလုပ်နေပြီး အအေးပေးစနစ်နဲ့ ကာကွယ်ဆေးပို့ဆောင်ပေးနိုင်တဲ့ မိမိတို့ရဲ့ လုပ်နိုင်စွမ်းနဲ့ နိုင်ငံအားလံုးကို ကူညီသွားမယ်လို့လည်း ဆိုပါတယ်။

အဆင့် ၃ စမ်းသပ်မှုဟာ ကာကွယ်ဆေးရဲ့ ထိရောက်မှု အန္တရာယ်ကင်းမှုတွေနဲ့ ပတ်သက်ပြီး နောက်ဆုံးနဲ့ အကျယ့်ပြန့်ဆုံး စမ်းသပ်စစ်ဆေးမှု ဖြစ်ပါတယ်။ ဒီအဆင့်မှာ အောင်မြင်ရင် ကာကွယ်ဆေးကို စိတ်ချလက်ချ အသုံးပြုနိုင်မှာ ဖြစ်ပါတယ်။

သိပ္ပံပညာရှင်တွေကသာ မီးစိမ်းပြမယ်ဆိုရင် အိန္ဒိယဟာ ကိုဗစ်ကာကွယ်ဆေး အမြောက်အများ ထုတ်လုပ်ဖို့ အဆင်သင့်ဖြစ်နေတယ်လို့ ဩဂုတ်လမှာ မိုဒီက ပြောကြားခဲ့ပါတယ်။

Ref: Aljazeera