ပြင်သစ်သမ္မတ၏ရပ်တည်ချက်​ကို ထောက်ခံသည်ဟု ယူအေအီးဝန်ကြီးပြော

နိုဝင်ဘာ ၃၊ ၂၀၂၀
M-Media

-မွတ်စလင်တွေအနေနဲ့ ပြင်သစ်သမ္မတ အီမန်နျူယဲလ် မာခရွန်ရဲ့ ရပ်တည်ချက်ကို လက်ခံဖို့ လိုအပ်တယ်လို့ ယူအေအီး နိုင်ငံခြားရေးဝန်ကြီး အန်ဝါရ် ဂါဂက်ရှ်က တိုက်တွန်းလိုက်ပြီး မာခရွန်ဟာ လူ့အဖွဲ့အစည်းအတွင်း ပေါင်းစည်းရေး ဆောင်ရွက်နေတာ ဖြစ်တယ်လို့ ဆိုပါတယ်။

“မာခရွန်ရဲ့မိန့်ခွန်းတွေကို မွတ်စလင်တွေအနေနဲ့ ဂရုတစ်စိုက် နားထောင်ဖို့ လိုအပ်ပါတယ်။ သူက မွတ်စလင်တွေကို ဖယ်ကျဉ်ချင်တာ မဟုတ်ပါဘူး။ သူလုပ်တာက လုံး၀ မှန်ပါတယ်”

အန်ဝါရ် ဂါဂက်ရှ်ကို ဂျာမန်နေ့စဉ်သတင်းစာ Die Welt က တနင်္လာနေ့မှာ အင်တာဗျူးခဲ့တာပါ။ အနောက်နိုင်ငံတွေမှာ မွတ်စလင်တွေဟာ အခုထက်ပိုမိုကောင်းမွန်တဲ့ အနေအထားနဲ့ ပေါင်းစည်းဖို့လိုအပ်တယ်လို့လည်း အန်ဝါရ်က ဆိုပါတယ်။

“အစွန်းရောက်ဝါဒ တိုက်ဖျက်ရေးနဲ့ လူ့အဖွဲ့အစည်း ပေါင်းစည်းရေး တစ်ပြိုင်တည်းလုပ်ဆောင်ရာမှာ နည်းလမ်းရှာဖွေဖို့ ပြင်သစ်မှာ လုပ်ပိုင်ခွင့်ရှိပါတယ်”

ပြင်သစ်က အစ္စလာမ်ဘာသာဝင်လူ့အဖွဲ့အစည်းကြားမှာ ဝင်နေတဲ့ ‘အစွန်းရောက်ဝါဒ’ ကို တိုက်ဖျက်ရမယ်၊ ဘာသာရေးခေါင်းဆောင်တွေကို ရုပ်ပြောင်ရေးဆွဲမှုအပါအဝင် လွတ်လပ်စွာ ဖော်ပြခွင့်ကို ကာကွယ်သွားမယ်ဆိုတဲ့ မာခရွန်ရဲ့ ပြီးခဲ့တဲ့လက မှတ်ချက်တွေကြောင့် ကမ္ဘာတစ်ဝှမ်းက အစ္စလာမ်ဘာသာဝင်တွေဟာ မာခရွန်ကို ဝေဖန်ဆန့်ကျင်တာတွေ လုပ်ခဲ့ပါတယ်။

အာရပ်ကမ္ဘာမှာလည်း ပြင်သစ်ထုတ်ကုန်ပစ္စည်းတွေ သပိတ်မှောက်ရေးလှုပ်ရှားမှု စတင်ခဲ့ပါတယ်။ မာခရွန်က နောက်ပိုင်းမှာ လေသံပျော့သွားခဲ့ပြီး တမန်တော်မိုဟာမက်ကို ရုပ်ပြောင်ရေးဆွဲတဲ့အတွက် မွတ်စလင်တွေ ဒေါသထွက်တာကိုနားလည်ကြောင်း၊ မိမိတစ်ကိုယ်ရေသဘောထားအရ ဒီကိစ္စကို အားမပေးကြောင်း ပြီးခဲ့တဲ့တစ်ပတ် နှောင်းပိုင်းမှာ ပြန်လည် ပြောကြားခဲ့ပါတယ်။

ဒါပေမယ့် တိုင်းပြည်ရဲ့ ဒီမိုကရေစီမူဖြစ်တဲ့ လွတ်လပ်စွာ ရေးသားဖော်ပြခွင့်ကို ဆက်လက်ကာကွယ်သွားမယ်လို့ ဆိုပါတယ်။

Ref: Aljazeera