အီရန်သိပ္ပံပညာရှင် လုပ်ကြံခံရခြင်းက မွတ်စလင်ကမ္ဘာအတွက် ဆုံးရှုံးမှုဟာ ဆော်ဒီပြော

ဒီဇင်ဘာ ၂၊ ၂၀၂၀
M-Media

-အီရန်ရဲ့ ထိပ်တန်းနျူသိပ္ပံပညာရှင် မိုဆန် ဖက္ကရီဇာဒါ လုပ်ကြံခံရမှုဟာ မွတ်စလင်ကမ္ဘာအတွက် ဆုံးရှုံးမှုတစ်ခု ဖြစ်တယ်လို့ ကုလဆိုင်ရာ ဆော်ဒီသံအမတ် အဘ်ဒူလာ အလ်-မူအဲလီမီက ပြောကြားလိုက်ပါတယ်။

အီရန် ဒုံးကျည်စီမံကိန်းနဲ့ အရက်ဖက် နျူစီမံကိန်းမှာ အရေးပါတဲ့ အခန်းကဏ္ဍကနေ ပါဝင်နေတဲ့ ဖက္ကရီဇာဒါဟာ သောကြာနေ့က မြို့တော်တီဟီရန်အနီးမှာ လုပ်ကြံခံလိုက်ရတာပါ။ အီရန်ကတော့ ဒါဟာ အစ္စရေးလက်ချက်ဖြစ်တယ်လို့ စွပ်စွဲခဲ့ပြီး အမေရိကန်တာဝန်ရှိသူတစ်ချို့ကလည်း အစ္စရေးက လုပ်ကြံတာဖြစ်ကြောင်း ပြီးခဲ့တဲ့တစ်ပတ်က နယူးယောက်တိုင်းမ်စ်သတင်းဌာနကို အတည်ပြုခဲ့ပါတယ်။

ရုရှားသတင်းဌာန RT နဲ့ အင်္ဂါနေ့က အင်တာဗျူးမှာ ကုလက ဆော်ဒီအမြဲတမ်းသံတမန် အလ်-မူအဲလီမီဟာ ဒီလုပ်ကြံမှုကို ရှုတ်ချခဲ့ပါတယ်။

“မွတ်စလင် သိပ္ပံပညာရှင်တစ်ယောက်ကို ဆုံးရှုံးတာဟာ မွတ်စလင်ကမ္ဘာအတွက် ဆုံးရှုံးမှုတစ်ခုပါ”

အီရန်အနေနဲ့ စိတ်ခံစားမှုကို ဦးစားပေးပြီး အလျင်စလို လက်တုန့်ပြန်မှုတွေ မလုပ်ဖို့လည်း အလ်-မူအဲလီမီက တိုက်တွန်းခဲ့ပါတယ်။

ဖက္ကရီဇာဒါ လုပ်ကြံခံရမှုနဲ့ပတ်သက်ပြီး ယူအေအီး၊ ဘာရိန်းတို့အပါအဝင် ပင်လယ်ကွေ့နိုင်ငံအားလုံးက ပြင်းပြင်းထန်ထန်ရှုတ်ချခဲ့ကြပါတယ်။ ဒီရှုတ်ချမှုထဲမှာ ဆော်ဒီအာရေဗျ မပါဝင်တဲ့အတွက် အီရန်နိုင်ငံခြားရေးဝန်ကြီးက ဝေဖန်ခဲ့ပြီးတဲ့နောက် အလ်-မူအဲလီမီရဲ့ ဒီမှတ်ချက် ထွက်ပေါ်လာတာ ဖြစ်ပါတယ်။

Ref: Alaraby