Pfizer-BioNTech ထုတ် ကိုဗစ်ကာကွယ်ဆေးကို အသုံးပြုခွင့်ပေးသည့် နိုင်ငံ ၅ နိုင်ငံ ရှိလာ

ဒီဇင်ဘာ ၁၂၊ ၂၀၂၀
M-Media

-အမေရိကန်-ဂျာမန် ဆေးကုမ္ပဏီ Pfizer-BioNTech က ထုတ်လုပ်တဲ့ ကိုဗစ်ကာကွယ်ဆေးကို အရေးပေါ်အခြေအနေတွေမှာ အသုံးပြုဖို့ မက္ကဆီကိုနိုင်ငံက မနေ့မှာ ခွင့်ပြုလိုက်ပြီး ဒီဆေးကို အသုံးပြုခွင့်ပေးတဲ့နိုင်ငံ ၅ နိုင်ငံ ရှိလာတာပါ။

Pfizer-BioNTech ရဲ့ ကိုဗစ်ကာကွယ်ဆေးဟာ ၉၀ ရာခိုင်နှုန်းထိရောက်မှုရှိပြီး ယူကေက ပြီးခဲ့တဲ့တစ်ပတ်မှာ ပထမဆုံး ပြည်သူတွေကို ထိုးပေးခဲ့ပါတယ်။ အဲဒီနောက် မနေ့က ကနေဒါ၊ အမေရိကန်နဲ့ ဘာရိန်းအစိုးရတို့ဟာ အရေးပေါ်အခြေအနေမှာ ဒီဆေးကို အသုံးပြုခွင့် ပေးခဲ့ပါတယ်။

မက္ကဆီကို အစိုးရဟာ ကာကွယ်ဆေးအလုံးရေ ၂၄.၄ သန်း မှာယူဖို့ စာရင်းပေးထားပြီး အခုလနှောင်းပိုင်းမှာ ၂ သိန်းခွဲ စတင်ရရှိကာ ပြည်သူတွေကို ထိုးပေးမှာဖြစ်ပါတယ်။ စုစုပေါင်း လူ ၁၂၅၀၀၀ ထိုးနှံခွင့်ရမှာဖြစ်ပြီး၊ ရှေ့တန်းက ကျန်းမာရေးဝန်ထမ်းတွေက ပထမဦးစားပေးအဆင့် ဖြစ်ပါတယ်။ မက္ကဆီကိုဟာ ကိုဗစ်ကူးစက်မှု စတုတ္ထအဆိုးရွားဆုံးနိုင်ငံလည်း ဖြစ်ပါတယ်။

လက်ရှိ ယူကေမှာ ထိုးနှံမှုရလဒ်တွေအရ Pfizer-BioNTech ထုတ် ကိုဗစ်ကာကွယ်ဆေးဟာ အစားအစာနဲ့ ဆေးဝါး ဓာတ်မတည့်သူတွေမှာသာ ဘေးထွက်ဆိုးကျိုးရှိတာကို တွေ့ရပါတယ်။

Ref: Reuters