ဖျက်ဆီးခံ ဟိန္ဒူဘုရားကျောင်းကို အစိုးရက ပြန်ဆောက်ပေးရန် ပါကစ္စတန်တရားရုံးချုပ် အမိန့်ထုတ်

ဇန်နဝါရီ ၆၊ ၂၀၂၀
M-Media

-ပြီးခဲ့တဲ့တစ်ပတ် နိုင်ငံအနောက်မြောက်ပိုင်းမှာ ဒေါသထွက်နေတဲ့ လူအုပ်ကြီးရဲ့ဖျက်ဆီးမှုကို ခံခဲ့ရတဲ့ ဟိန္ဒူဘုရားကျောင်းကို အစိုးရက ကမကထပြုကာ ပြန်လည်ဆောက်လုပ်ပေးဖို့ ပါကစ္စတန်တရားရုံးချုပ်က ဒီကနေ့မှာ အမိန့်ထုတ်လိုက်ပါတယ်။

ကာရက်မြို့က Shri Paramhans Ji Maharaj Samadhi ဘုရားကျောင်းကို မြို့တွင်းက မွတ်စလင်ဘာသာရေးခေါင်းဆောင်တစ်ချို့နဲ့ အမျိုးဘာသာစောင့်ရှောက်ရေးပါတီဝင်တွေ ဦးဆောင်တဲ့ လူအုပ်ကြီးက ဒီဇင်ဘာနှောင်းပိုင်းမှာ ဖျက်ဆီးခဲ့ကြတာပါ။

၁၉၉၇ ခုနှစ်က ဖျက်ဆီးခံခဲ့ရတဲ့ အဲဒီဘုရားကျောင်း ပြန်လည်ဆောက်လုပ်ရာမှာ အနားကအိမ်ကို ဝယ်ယူကာ တိုးချဲ့တယ်ဆိုတဲ့ ကောလဟာလနဲ့ ဒီလို တိုက်ခိုက်မှု ဖြစ်လာတာလို့ ရဲတပ်ဖွဲ့က ပြောပါတယ်။

​ဒီကနေ့မနက် မြို့တော်အစ္စလာမ်မာဘတ်မှာ တရားရုံးချုပ်ရဲ့ ကြားနာမှုအတွင်း တရားသူကြီးချုပ် ဂူလ်ဇာရ် အဟ်မဒ်က ဖျက်ဆီးခံခဲ့ရတဲ့ ဘုရားကျောင်းကို အစိုးရက ကမကထပြုက ပြန်ဆောက်ပေးဖို့၊ ဖျက်ဆီးမှုကို ဦးဆောင်ခဲ့တဲ့ မွတ်စလင်ဘာသာရေးခေါင်းဆောင်တွေက ကုန်ကျစားရိတ်ကျခံဖို့ ဆုံးဖြတ်ခဲ့ပါတယ်။

ပါကစ္စတန်ရဲ့ ၂၀၇ သန်းသော လူဦးရေမှာ ၁.၆ ရာခိုင်နှုန်းက ဟိန္ဒူဘာသာဝင်တွေ ဖြစ်ပါတယ်။ ပါစ္စတန်ဟာ အမေရိကန်ရဲ့ ဘာသာရေးလွတ်လပ်ခွင့် ချိုးဖောက်တဲ့နိုင်ငံစာရင်းမှာ မြန်မာနိုင်ငံနည်းတူ ပါဝင်နေတာပါ။

Shri Paramhans Ji Maharaj Samadhi ဘုရားကျောင်း တိုက်ခိုက်ခံရမှုအတွက် ပါကစ္စတန်ရဲတပ်ဖွဲ့က အနည်းဆုံး လူ ၁၀၀ ကျော် ဖမ်းဆီးထားပြီး၊ တိုက်ခိုက်မှုကို ထိထိရောက်ရောက် ဟန့်တားခြင်းမရှိတဲ့အတွက် အခင်းဖြစ်ပွားရာဒေသက ရဲတပ်ဖွဲ့ဝင် တော်တော်များများလည်း ရာထူးကနေ ထုတ်ပယ်ခံခဲ့ရပါတယ်။

ဒီကိစ္စနဲ့ပတ်သက်ပြီး ဇန်နဝါရီ ၁၉ ရက်နေ့မှာ တရားရုံးချုပ်က ထပ်မံ ကြားနာမှာ ဖြစ်ပါတယ်။ ကာရက်မြို့တည်ရှိရာ ခိုင်ဘာ ပက်သွန်ခွါပြည်နယ် အစိုးရကလည်း ဘုရားကျောင်း ပြန်ဆောက်ဖို့အတွက် ပြည်နယ်ဘက်ဂျက်ကနေ သုံးစွဲသွားမယ်လို့ အစောပိုင်းမှာ ထုတ်ပြန်ခဲ့ပါတယ်။

Ref: Aljazeera