လက်ရှိပြဿနာကို အာဏာသိမ်းစစ်တပ်နှင့် ညှိနှိုင်းအဖြေရှာရန် တရုတ်တိုက်တွန်း

ဖေဖော်ဝါရီ ၁၉၊ ၂၀၂၁
M-Media

-လက်ရှိမြန်မာနိုင်ငံမှာဖြစ်နေတဲ့ ပြဿနာတွေအတွက် ညှိနှိုင်းဆွေးနွေးအဖြေရှာကြဖို့ တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ဟွာချွမ်ယင်က တိုက်တွန်းလိုက်ပါတယ်။

ဖေဖော်ဝါရီလ ၁ ရက်နေ့ စစ်တပ်က အာဏာသိမ်းမှုမှာ တရုတ်နိုင်ငံက ထဲထဲဝင်ဝင် ပါဝင်ပတ်သက်နေတယ်ဆိုတဲ့သတင်း၊ အင်တာနက်ကန့်သန်ရေး ပစ္စည်းကိရိယာ၊ ပညာရှင်တွေ ထောက်ပံ့နေတယ်ဆိုတဲ့သတင်းတွေ ထွက်ပေါ်နေတာပါ။

ဟွာချွမ်ယင်က ဒီသတင်းတွေဟာ ကောလဟာလတွေသာဖြစ်ပြီး တရုတ်-မြန်မာ ချစ်ကျည်ရေးကို ပျက်ဆီးစေလိုတဲ့အတွက် ဖြန့်တာမျိုးဖြစ်တယ်လို့ ဒီကနေ့ပြုလုပ်တဲ့ နေ့စဉ် သတင်းစာရှင်းလင်းပွဲအကျဉ်းချုပ်မှာ ထည့်သွင်း ပြောဆိုခဲ့ပါတယ်။

မြန်မာပြည်သူလုထုရဲ့အကျိုးကို ဦးထိပ်ထားပြီး ပါဝင်ပတ်သက်သူအားလုံး အခြေခံဥပဒေအောင်၊ ပြဌာန်းဥပဒေအောက်မှာ ညှိနှိုင်းအဖြေရှာသွားဖို့၊ နိုင်ငံရေးနဲ့ လူမှုရေး တည်ငြိမ်အေးချမ်းမှုိကို ထိန်းသိမ်းသွားဖို့ မျှော်လင့်တယ်လို့ သူမက ပြောကြားခဲ့ပါတယ်။

စစ်အာဏာသိမ်းမှုကိစ္စ တရုတ်နိုင်ငံတဲ့ပတ်သက်တယ်ဆိုတဲ့သတင်းတွေဟာ အခြေအမြစ်မရှိဘူးလို့ မြန်မာနိုင်ငံဆိုင်ရာ တရုတ်သံအမတ်က ပြီးခဲ့တဲ့ရက်ပိုင်းမှာ ပြောကြားခဲ့ပါတယ်။

ဟွာချွမ်ယင်က NLD အစိုးရ၊ မြန်မာစစ်တပ် နှစ်ဖွဲ့စလုံးနဲ့ ကောင်းမွန်တဲ့ ဆက်ဆံရေးရှိပြီး လက်ရှိ မြန်မာနိုင်ငံမှာ ဖြစ်ပျက်နေတာတွေကို မမြင်ချင်ဘူးလို့ ဆိုပါတယ်။ လက်ရှိအခြေအနေက မြန်မာနိုင်ငံမှာရှိနေတဲ့ တရုတ်ကုမ္ပဏီတွေ၊ တရုတ်နိုင်ငံသားတွေအပေါ် ဘယ်လောက်အထိ သက်ရောက်မှုရှိနေလဲဆိုတာ ဆန်းစစ်ဖို့ သတင်းအချက်အလက်တွေ စုဆောင်းနေတယ်လို့လည်း ထည့်သွင်းပြောဆိုခဲ့ပါတယ်။

မြန်မာနိုင်ငံက စစ်အာဏာသိမ်းမှုကိစ္စ တရုတ်နိုင်ငံနဲ့ ဆက်စပ်ပြောဆိုမှုတွေဟာ အနောက်နိုင်ငံတွေရဲ့ လီဆယ်လုပ်ကြံမှုလို့လည်း ဟွာချွမ်ယင်က ဆိုပါတယ်။

Ref : Rebublic World