အိန္ဒိယကို ထွက်ပြေးခိုလှုံသွားသည့် ရဲတပ်ဖွဲ့၀င်ဦးရေ ၂၀၀ နီးပါးရှိလာ

မတ် ၁၃၊ ၂၀၂၁
M-Media

– အာဏာသိမ်းစစ်ကောင်စီအောက်မှာ တာ၀န်မထမ်းဆောင်လိုတဲ့အတွက် အိန္ဒိယကို ထွက်ပြေးခိုလှုံသွားတဲ့ ရဲတပ်ဖွဲ့၀င်အရေအတွက်ဟာ ၂၀၀ နီးပါး ရှိလာပြီလို့ သိရပါတယ်။

ဖေဖော်၀ါရီနှောင်းပိုင်းကစပြီး မြန်မာဖက်ကရဲတွေနဲ့ မိသားစု၀င်တွေဟာ အိန္ဒိယနိုင်ငံ မီဇိုရမ်ပြည်နယ်ကို ထွက်ပြေးခိုလှုံလာတာ ဖြစ်ပါတယ်။ မနေ့ကအထိ စုစုပေါင်း ၂၆၄ ဦးရှိပြီး အဲဒီအထဲက ၁၉၈ ဦးဟာ ရဲတပ်ဖွဲ့၀င်တွေဖြစ်ကာ ကျန်တာက မိသားစု၀င်တွေ ဖြစ်ပါတယ်။

အာဏာသိမ်းစစ်ကောင်စီရဲ့ အမိန့်တွေကို မနာခံနိုင်တော့လို့ အခုလို ထွက်ပြေးလာတာလို့ ရဲတပ်ဖွဲ့၀င်တွေက အိန္ဒိယတာ၀န်ရှိသူတွေ၊ မီဒီယာတွေကို ဖြေကြားထားပါတယ်။
အခုတစ်ပတ်အစောပိုင်းကလည်း ရဲတပ်ဖွဲ့၀င် ၄ ဦးက အထက်အရာရှိတွေဟာ ဆန္ဒပြသူတွေကို အသေပစ်သတ်ဖို့ အမိန့်ပေးခဲ့ပြီး ဒီအမိန့်ကို သူတို့ ဖီဆန်ကာ ထွက်ပြေးခဲ့ကြောင်း ရိုက်တာသတင်းဌာနကို ဖွင့်ဟခဲ့ပါတယ်။

ဆန္ဒပြတဲ့အထဲမှာ မပါ၀င်တဲ့သူတွေ၊ ဘေးကရပ်ကြည့်နေသူတွေအပါအ၀င် တွေ့သမျှလူကို ရဲတပ်ဖွဲ့က ဖမ်းဆီးပြီး ရိုက်နှက်နှိပ်စက်တာတွေ လုပ်ဆောင်တယ်လို့ ခိုလှုံသွားတဲ့ နောက်ထပ် ရဲတပ်ဖွဲ့၀င်တစ်ဦးက မနေ့မှာ ထပ်မံဖွင့်ပြောခဲ့ပါတယ်။

“ပထမတစ်ချက်က စစ်အာဏာရှင်လက်အောက်မှာ ဆက်လက် တာ၀န်မထမ်းဆောင်ချင်တော့တဲ့အတွက် အိန္ဒိယကို ထွက်ပြေးလာတာပါ။ နောက်တစ်ချက်က အာဏာရှင်လက်အောက်ကထွက်ပြီး ပြည်သူတွေနဲ့ ပူးပေါင်းတိုက်ပွဲ၀င်ရင် စစ်အာဏာရှင်ကို အနိုင်တိုက်နိုင်မယ်လို့ ယုံကြည်လို့ပါ” လို့ အမည်မဖော်လိုတဲ့ အဲဒီရဲက ပြောကြားခဲ့ပါတယ်။

စစ်ကောင်စီဟာ အိန္ဒိယရောက်သွားတဲ့ ရဲတပ်ဖွဲ့၀င် အနည်းဆုံး ၈ ဦးကို ပြန်လွှဲပေးဖို့ စာပို့ခဲ့ပြီး အိန္ဒိယအစိုးရကလည်း ပြန်ပို့ခဲ့ပါတယ်။

Ref: AFP