ဧပြီ ၈၊ ၂၀၂၁
M-Media

-မြန်မာနိုင်ငံက မလေးရှားသံအမတ် စစ်ကောင်စီဝန်ကြီးနဲ့ တွေ့ဆုံတာဟာ အာဏာသိမ်းစစ်ကောင်စီကို အသိအမှတ်ပြုတာမဟုတ်ဘူးလို့ မလေးရှားနိုင်ငံခြားရေးဝန်ကြီးဌာနက ဒီနေ့ ကြေငြာချက် ထုတ်ပြန်ပါတယ်။

မလေးရှားသံအမတ် ဇာဟိုင်ရီ ဘာရာဟင်နဲ့ အဖွဲ့ဟာ ဧပြီလ ၇ ရက်နေ့က စစ်ကောင်စီက ခန့်အပ်ထားတဲ့ စွမ်းအင်ဝန်ကြီး ဦးအောင်သန်းဦးနဲ့ တွေ့ဆုံဆွေးနွေးခဲ့ပြီး ဒီကိစ္စကို စစ်ကောင်စီက နိုင်ငံပိုင်သတင်းစာနဲ့ ရုပ်သံတွေမှာ ထည့်သွင်း ထုတ်ပြန်ခဲ့တာပါ။

အာဏာသိမ်းစစ်ကောင်စီကို တရားဝင်အစိုးရအဖြင့် ကမ္ဘာ့နိုင်ငံတွေနဲ့ အာဆီယံနိုင်ငံတွေက အသိအမှတ် မပြုသေးဘဲ အခု ဒီသတင်းကြောင့် မလေးရှားအပေါ် နိုင်ငံတကာက​ ဝေဖန်မှုတွေ မြင့်တက်လာတာ ဖြစ်ပါတယ်။

မလေးရှားနိုင်ငံခြားရေးဝန်ကြီးဌာနရဲ့​ ဒီနေ့ကြေငြာချက်မှာ သံအမတ် ဘရာဟင်ဟာ မလေးရှား စွမ်းအင်လုပ်ငန်း PETRONAS ရဲ့ လက်ခွဲဖြစ်တဲ့ PETRONAS Carigali Myanmar (Hong Kong) Limited (PCML) က ရဲတံခွန် ဓာတ်ငွေ့တူးဖော်မှု စီမံကိန်းကို ဆက်မလုပ်တော့ဘူးဆိုတာ တွေ့ဆုံပြောကြားတာဖြစ်တယ်လို့ ဖော်ပြထားပါတယ်။

“ဒီအစည်းအဝေးဟာ နိုင်ငံတော်စီမံအုပ်ချုပ်ရေးကောင်စီ (SAC) ကို အသိအမှတ်ပြုတယ်ဆိုတဲ့ အဓိပ္ပါယ်မျိုး မသက်ရောက်ပါဘူး”

မြန်မာနိုင်ငံနဲ့ ပတ်သက်တဲ့ မလေးရှားရဲ့ ရပ်တည်ချက်ဟာ ရှင်းလင်းပြီး တစ်သမတ်တည်းရှိတယ်လို့လည်း ကြေငြာချက်က ဆိုပါတယ်။

“အကြမ်းဖက်မှုတွေ ချက်ခြင်းရပ်တန့်ဖို့၊ ဖမ်းဆီးထားတဲ့ နိုင်ငံရေးအကျဉ်းသားတွေကို ချက်ခြင်းပြန်လွှတ်ပေးဖို့၊ နိုင်ငံရေး အသွင်ကူးပြောင်းမှုနဲ့ လက်ရှိပြဿနာကို မြန်မာနိုင်ငံ၊ မြန်မာပြည်သူတွေရဲ့ အကျိူးစီးပွားကို ရှေ့ရှုပြီး ငြိမ်းချမ်းစွာ အဖြေရှာရေး သက်ဆိုင်သူတွေအားလုံး ပါဝင်တဲ့ ဆွေးနွေးမှုတစ်ခု စတင်ဖို့ ထပ်လောင်းတိုက်တွန်းလိုက်ပါတယ်”

Ref: မလေးရှား နိုင်ငံခြားရေး ဝန်ကြီးဌာန

mmMyanmarNews