ကိုဗစ်ကြောင့် အိန္ဒိယပြည်သူများ သေဆုံးမှုကို တရုတ်အစိုးရက လှောင်ပြောင်သရော်

မေ ၄၊ ၂၀၂၁
M-Media

-ကိုဗစ်ဒုတိယလှိုင်းမှာ အိန္ဒိယပြည်သူတွေ အကြီးအကျယ်သေဆုံးမှုကို တရုတ်အစိုးရရဲ့ ဥပဒေရေးရာ ထိပ်တန်းအဖွဲ့က ဆိုရှယ်မီဒီယာမှာ လှောင်ပြောင်ရေးသားခဲ့ပြီး ဝေဖန်မှုတွေ မြင့်တက်လာတဲ့အတွက် နောက်ပိုင်းမှာ ပြန်ဖြုတ်သွားပါတယ်။

ပြီးခဲ့တဲ့လ အစောပိုင်းကစလို့ အိန္ဒိယနိုင်ငံမှာ ကိုဗစ်ဒုတိယလှိုင်း ရိုက်ခတ်တာကြောင့် နေ့စဉ် လူ သိန်းချီ ကူးစက်ပြီး သေဆုံးသူကလည်း ထောင်ချီ ရှိပါတယ်။ သေဆုံးသူတွေ များလွန်းတဲ့အတွက် မြေကွက်လပ်တွေမှာ စုပေါင်းပြီး သဂြိုဟ်ရတဲ့ ပုံတွေဟာ ဆိုရှယ်မီဒီယာမှာ ပြန့်နှံ့ခဲ့ပြီး တစ်ကမ္ဘာလုံးက အိန္ဒိယပြည်သူတွေအပေါ် ဂရုဏာသက်ခဲ့ပါတယ်။

တရုတ်ကွန်မြူနစ်ပါတီရဲ့ နိုင်ငံရေးနဲ့ ဥပဒေရေးရာ ဗဟိုကော်မရှင်က သူတို့ရဲ့ တရားဝင် Weibo အကောင့်မှာ ကိုဗစ်ကြောင့် အိန္ဒိယပြည်သူတွေ သေဆုံးမှုကို လှောင်ပြောင်တဲ့ပို့စ်မျိုး မေ ၁ ရက်နေ့က တင်ခဲ့ပါတယ်။

တရုတ်နိုင်ငံက အာကာသစခန်းအတွက် ပထမဆုံး အစိတ်အပိုင်းပို့မယ့် ဒုံးပျံ လွှတ်တင်မှုဓာတ်ပုံနဲ့ အိန္ဒိယက ကိုဗစ်ကြောင့် သေဆုံးသူတွေ အစုလိုက်အပြုံလိုက်သင်္ဂြိုဟ်တဲ့ ဓာတ်ပုံကို ယှဉ်တွဲကာ “တရုတ်ရဲ့ မီးထွန်းမှုနဲ့ အိန္ဒိယရဲ့ မီးထွန်းမှု” လို့ ရေးသားလွှင့်တင်ခဲ့တာပါ။

တရုတ်ပြည်သူတွေက ဆိုရှယ်မီဒီယာမှာ ဝေဖန်မှုတွေ ပြုလုပ်လာတာကြောင့် နောက်ပိုင်းမှာ ဒီပို့စ်ကို ပြန်ဖျက်သွားခဲ့ပါတယ်။

တရုတ်နိုင်ငံခြားရေးဝန်ကြီးဌာနက ဒီကိစ္စထက် တရုတ်အစိုးရနဲ့ ပြည်သူတွေက အိန္ဒိယရဲ့ ကိုဗစ်တိုက်ဖျက်ရေးအပေါ် အားပေးထောက်ခံနေတာကို ပိုပြီး အာရုံစိုက်ကြည့်ရှုဖို့ မျှော်လင့်တယ်လို့ မှတ်ချက်ပေးခဲ့ပါတယ်။

တရုတ်ကွန်မြူနစ်ပါတီရဲ့ အဘော်သတင်းစာ Global Times ရဲ့ အယ်ဒီတာချုပ် ဟူရှီကျင်းက အစိုးရရဲ့ တရားဝင် ဆိုရှယ်မီဒီယာအကောင့်တွေဟာ လူသားချင်းစာနာမှု၊ အိန္ဒိယအတွက် စာနာမှုနဲ့ တရုတ်​လူ့အဖွဲ့အစည်းရဲ့ စိတ်နေစိတ်ထား မြင့်မြတ်မှုကို ပြသတာမျိုးပဲ ဖြစ်သင့်တယ်လို့ ရေးသားခဲ့ပါတယ်။

ပြီးခဲ့တဲ့ သောကြာနေ့ကလည်း တရုတ်အစိုးရ ပြည်သူ့လုံခြုံရေးဌာနရဲ့ Weibo အကောင့်မှာ အိန္ဒိယက ကိုဗစ်ကြောင့်သေဆုံးသူတွေ အစုလိုက်အပြုံလိုက်သင်္ဂြိုဟ်တဲ့ ဓာတ်ပုံကို ‘တရုတ်နိုင်ငံရဲ့ မီးဘုရား တောင်တန်း’ လို့ရေးပြီး လှောင်ပြောင် လွှင့်တင်ခဲ့ပါသေးတယ်။ နောက်ပိုင်းမှာတော့ ဒီပို့စ်ကို ပြန်ဖျက်သွားပါတယ်။

Ref: The Star